မနအ
(သစ်ခက်သံလွင်) ဇွန် ၁၀၊ ၂၀၂၃
နိစ္စဓူဝ ဆိုသလို
သောကကို ကျောပိုးထားရတဲ့သူပါ တဲ့
ကျောနာတဲ့အခါ ခေါင်းပေါ်ရွက်
ခေါင်းမျက်တဲ့အခါ ခါးထစ်ခွင်ချီ နဲ့
သောကရင်ပြင်နီထဲမှာ
ရိုးအီနေတဲ့ ဘရိတ်ခ်ကင်းနယူး
အပ်ဒိတ်နယူး၊ လိတ်တက်နယူး
ထူးပြီး ချဥ်ခြင်းမပြေပျောက်နိုင်တော့
သတင်းနောက်ကို မလိုက်နိုင်ပါဘူးဗျာ တဲ့ ။
ဒါနဲ့ ကျနော်က
နှစ်ကိုယ်ကြား စကားတခွန်း သူ့ကိုပြောတယ် ။
ကျနော့်စကားအဆုံးမှာ
သူက မချိပြုံး ပြုံးလိုက်တယ် ။
ကျနော့်မှာ
အကြားချင်ဆုံးသတင်းတစ်ပုဒ် ရှိတယ် ။ ။
၆ ဇွန် ၂၀၂၃
Comments
Post a Comment