ခက်စိမ်း - ငြိမ်နေတဲ့မြို့

ငြိမ်နေတဲ့မြို့
ခက်စိမ်း
(သစ်ခက်သံလွင်) ဇန်နဝါရီ ၂၈

ယုံကြည်မှုဆိုတာ
ငါတို့ဖြစ်နေတဲ့ ဂယက်ပဲ
ဒီဝဲထဲ 
တယောက်ပြီးတယောက်
ပျောက်ပျက်ကြ

မရှိသင့်တဲ့အရာတွေက မလုပ်သင့်တာလုပ်ကြ
မပုပ်မသိုးတဲ့
 အဆိပ်တွေ မကြာမကြာလောင်းချ

အရှက်တွေကို လုယူခံလိုက်ရတဲ့ ကျိန်စာမှာ
မတရားမှုတွေဟာ ရဲရင့်စွာဖူးပွင့်ခဲ့ကြ

ဒီမြို့ကြီးလည်း
ရောင်​နေ​တာတော်တော်ကြာခဲ့ပြီ
အတွင်းသားတွေကလဲ ပုပ်ပွရိရွဲလို့

နိုင်ငံကို ကျည်ထိုးမိတော့
ခေါင်းထဲတည့်တည့် နှလုံသားထဲ တည့်တည့်။

ဝမ်းနည်းစရာကောင်းတာ 
တဘက်က
အလွမ်းပေါ်မှာ လမ်းတွေ၊ 
လမ်းတွေပေါ်မှာ
ဦးနှောက် အသတ်ခံခဲ့ရတဲ့ 
အသေကောင်တွေ သွားလာနေ

တဘက်မှာ
တခြားသူတွေရဲ့ချစ်ရသူအားလုံး
ကြည့်ရတာ
မျှော်လင့်ချက် တခုခု ရနေသလိုလို။

-

Comments