 |
| www.taylorwinnart.com |
ရဲဘော်တို့ကိုသောက်မယ့်မိုးတိမ်
နေလင်း
(သစ်ခက်သံလွင်) ဇူလိုင် ၂၃၊ ၂၀၂၀
ကမ္ဘာ့အရေးကတော့
ရှားမီးကိန်းခွင်ထဲတိုးဝင်
အိပ်ရာအောက်ကို
ရေရောမြွေပါဝင်လာတဲ့နေ့စွဲတွေပေါ့
ပိုပိုသာသာဆာလောင်မိခြင်းတွေထဲ
အနာပေါ်ကျတဲ့တုတ်ကို
အုတ်ခဲနဲ့ထုချေပြီး လက်တုံ့ပြန်ဖို့ကြိုစားကြ
စစ်မီးထဲထိုးထည့်လိုက်ဖို့
လောဘမာနဟာလောင်စာပဲ
အတ္တကိုဗဟိုပြုထားတဲ့ပြေးလမ်းမှာ
ငရဲသားနဲ့ကောင်းကင်ဘုံဥပဒေသများ
ထုတ်ပြန်ပြဋ္ဌာန်းတိုက်ပွဲဝင်ခဲ့
အာဏာတွေနဲ့
အေးမြချင်နေတယ်ဆိုတဲ့ချောင်းကလေးကို
နျူကလီးယာထိပ်ဖူးတပ်ထားတယ်
ငါတို့စနစ်နဲ့ဦးဆောင်လမ်းပြလိုက်ရင်
အားလုံးငြိမ်းချမ်းမျှတသွားမယ်တဲ့
ဘယ်လိုပြောရမလဲ
မျောက်သင်းကွဲတွေရဲ့ရန်ပွဲ
မီးတုတ်ကိုယ်စီနဲ့ရေမှုတ်မပါသော နှစ်ဆယ့်တစ်ရာစု
သွေးရူးသွေးတန်းဖြစ်မှုတွေနဲ့
အသက်မှာချပ်ဝတ်တန်ဆာမပါဘဲ
တိုးဝင်နေကြပြန်တယ်
သတ္တန္တရ ကပ်ထဲအထိ ။ ။
Comments
Post a Comment