သစ်ခက်သံလွင် ကဗျာစင်မြင့်၊ ဂျိုဇော်၊ နေစိမ့်၊ ခက်သီ၊ တေဇလင်း -နည်းပညာတက္ကသိုလ်တို့၏ကဗျာများ

တောဟေမဝန်

KT#

တတောလုံး
ယုန်တကောင်ပဲ နှာစေးတတ်တယ် ။

ခြင်္သေ့အတွက် သွားကြားထိုးတံ
မြေခွေးက တင်ဒါရထားတယ် ။

ကျွဲတွေ နွားတွေက ကစဥ့်ကလျား
ကျားတွေက စည်းစည်းလုံးလုံး ။

ဇီးကွက်စကား
ကြက်တူရွေးနှုတ်ဖျားမှာ လမ်းဆုံးပေါ့။

သမင် ဒရယ် ချေငယ် စိုင် ဆတ်
မြက်တစ်ဖတ် ရေတစ်ပေါက်အတွက်
ခွာက မီးပွင့်ထွက်နေပြီ..။

အဆိုးဆုံးက..တောကြောင်
တောမီး မလောင်သေးဘူး
လက်ခမောင်းကြီး ခတ်နေတယ် ။ ။

ဂျိုဇော်

4-9-16

 …

 ဖြတ်ထုံး

KT#

မဟာပထဝီမြေကြီးက ငါ့ဝိညာဉ်

ငလျင်ကိုခံနိုင်ရည်ရှိဖို့က

ငါကိုယ်တိုင်ငလျင်ဖြစ်လိုက်ရုံသာ

ဒါဟာ ဓာတ်ကြီးလေးပါးရဲ့ပွတ်တိုက်မှု

သယံဇာတတွေစိတ်ဝမ်းကွဲမှု

အစုလိုက်အပုံလိုက်ရှိနေသေးတာက

ပြိုကျတဲ့အပျက်အစီးတွေလို

အသိုက်ထဲကြက်ဝင်ယက်သွားတဲ့အတိုင်း

တွေ့လား

စားခွက်လုနေကြတဲ့ငရဲသားတွေ

ကမ္ဘာသာပျက်သွားမယ်ဝေစုမတည့်တဲ့အပေးအယူနဲ့

ရာဇဝင်မှာမျက်နှာမများခဲ့တာ

ရေများရာရေမစီးခဲ့တာ

လာဘ်ပေးလာဘ်ယူကင်းရှင်းခဲ့တာ

သစ္စာတရားကို မြင်းလိုစီးခဲ့ပါတယ်

အခု ဖြစ်ပျက်နေပုံက

သမိုင်းဝင်မှာမဟုတ်လို့

ငါ့ ရူးသွပ်မှုကိုကြိုတင်မှာကြားသူများအတွက်သာ…

နေစိမ့်

….

 မရေးတဲ့ကဗျာ

KT#

 ကဗျာက ရတယ်

မရေးတာ ။

မရေးတဲ့ကဗျာက

ရေမြွှာပေါက်လာတယ်

မရေးတဲ့ကဗျာက

မီးတောင် ပေါက်လာတယ်

မရေးတဲ့ကဗျာက

ရင့်မှည့်လာတဲ့တော်လှန်ရေးလို ။

မရေးတဲ့ကဗျာက

ငါ့ကိုစေ့စေ့ကြည့်

နဂါးမျက်စောင်းနဲ့

တည့်တည့်မေးတယ်။

ငါဟာ တခွန်းပဲ

ပြန်ပြောနိုင်ခဲ့တယ်

" ပြောစရာတွေ အများကြီးပဲ

အဲ့ဒါကြောင့် ငါ့မှာ ဘာပြောစရာမှမရှိဘူး"။

မရေးတဲ့ကဗျာက

သူ့သဘောနဲ့သူ ချရေးသွားတယ်

အခု ဒီကဗျာကိုပဲ။

ငါ့မှာ အမြန်ဖတ် ကမန်းကတမ်း

သက်ပြင်းချမိတယ်

တော်ပါသေးရဲ့

သူဘာမှ ပြောမသွားလို့

ဘာမှမပြောချင်တဲ့ဒီကဗျာဟာ

သင်တို့ရှေ့ကို တစ်ရှူးပေပါတစ်ခုလို ရောက်လာပါပြီ

လိုသလို သုံးဆောင်ကြပါ။ ။

ခက်သီ

 …

 ရင်ထဲက ငြိမ်းချမ်းရေး

KT#

အတောင်အလက်တွေညှပ်
လှောင်အိမ်ထဲမှာဒဏ်ခတ်ပြီး
မပျံနိုင်တဲ့ငှက်ကလေးကို
တေးမဆိုစေချင်ဘူး
ပင်လယ်နဲ့အလှမ်းဝေး
စကားမပြောတတ်တဲ့ငါးကလေးကို
ဖန်အိမ်မှာရေသေထည့်
အလှမဖွဲ့စေချင်ဘူး
မပွင့်နိုင်တဲ့အရွယ်
လူမမယ်လိုပန်းကလေး
သဘာဝနဲ့ဝေးကွာ
အရောင်ဆေးမာယာတွေနဲ့
အလှစိုက်အိုးထဲမထည့်စေချင်ဘူး
လွတ်လပ်စွာပျံသန်း လှပစွာသီကျူးပါစေ
လွတ်လပ်စွာကူးခတ် လှပစွာခရီးဆက်ပါစေ
လွတ်လပ်စွာပွင့်လန်း လှပစွာစံမြန်းပါစေ
သဘာဝရေသဘာဝမြေမှာ
ငြိမ်းချမ်းရေးမှန်သမျှ လွတ်ငြိမ်းချမ်းသာခွင့်ရကြပါစေ။ ။

တေဇလင်း   နည်းပညာတက္ကသိုလ်