ဝင်းမင်းခိုင်
(သစ်ခက်သံလွင်) ဇူလိုင် ၁၆၊ ၂၀၂၄
လောလောဆယ်တော့
သူတို့ရင်ထဲကအကြောက်တရားဟာ
ကိုဗစ်ကပ်ရောဂါလိုသူတို့ကြားမှာကူးစက်တယ်
မနိုင်ဝန်ထမ်းထားရတဲ့သူတို့ရဲ့ပခုံးရိုးတွေ
တနေရာပြီးတနေရာအက်ကွဲကုန်ကြောင်းညည်းညူတယ်
ကုန်သွားတဲ့မီးစာကိုအသစ်ထဲ့ပြီး
ခမ်းနေတဲ့ဆီကိုပြန်ဖြည့်လိုက်ပြန်တော့
သူတို့ရဲ့မျှော်လင့်ချက်ဖန်မီးအိမ်က
ရိုက်ခွဲပစ်တာခံလိုက်ရပြန်တယ်
ထိုးမယ့်ဆင်နောက်တလှမ်းဆုတ်တယ်လို့ဆင်ခြေပေးနေရင်း
ဆုတ်ပြီးရင်းဆုတ်နေရတဲ့ဆင်တကောင်
အမှောင်ထုထဲပြုတ်ကျသွားခဲ့တာ
မြင်လိုက်ကြရတယ်
ကြွေပြီးရင်ပြန်ဝေမယ့်အထဲမှာ
ဒီမျိုးစိတ်မပါစေရဘူးတဲ့
လူငယ်တွေရဲ့ကတိစကား ကြားကြရပြန်တယ်
အင်း
မုတ်သုန်ရာသီဆိုတော့လဲ
ရှစ်ခွင်လုံးမှိုင်းသလောက်
သတင်းတွေ တစိမ့်စိမ့်ရွာနေတတ်တဲ့နေ့ရက်တွေ
၁၆.၇.၂၄
Comments
Post a Comment