လှိုင်း
မနအ
(သစ်ခက်သံလွင်) ဖေဖော်ဝါရီ ၃၊ ၂၀၂၃
ကောင်းကင်ယံက အသံကြားတိုင်း
မှုန်မှိုင်းသွားတဲ့ မျက်လုံးတွေနဲ့ မော့ကြည့်တတ်တဲ့
ဆော့လက်စကို ရပ်လိုက်တဲ့ ကလေးတစ်ယောက်လိုပါပဲ
မိုးက ခြိမ်း၊ ခြောက်နေတဲ့အခါ
ကဗျာတွေလည်း ကြွေတာပါပဲ ။
မြေပြင်ထက်က အက်ကွဲသံကြားတိုင်း
တုံ့ဆိုင်းသွားတဲ့ မျက်လုံးတွေနဲ့ ငေးကြည့်တတ်တဲ့
ဆော့လက်စကို ပစ်ပြေးတဲ့ ကလေးတစ်ယောက်လိုပါပဲ
အသံတွေက ဟိန်း၊ ဟောက်နေတဲ့အခါ
ကဗျာတွေလည်း ကြွေတာပါပဲ ။
ချစ်သူရေ
ကလေးက ကြွေ၊ ကဗျာက ကြွေ
ကြွေကြ
မင်းလည်း ကြွေ၊ ငါလည်း ကြွေ
ကြွေကြ
ရာသီကလည်း မလှပ
ကြွေကြ
မြေမခ ကြွေကျ
ကြွေသံတွေက တောလုံးထလို့ ။ ။
၁ ဖေဖော်ဝါရီ ၂၀၂၃
Comments
Post a Comment