မောင်ခေတ်စည် - ဖေ့စ်ဘွတ်စာပေ (၆+၇) အခန်းဆက်

ဖေ့စ်ဘွတ်စာပေ 

မောင်ခေတ်စည်

(သစ်ခက်သံလွင်) နိုဝင်ဘာ ၇၊ ၂၀၂၂

ဖေ့စ်ဘွတ်စာပေ(၆)

5.11.22

ရသအမျိုးမျိုး ပေးစွမ်းသောစာတို့မှာ လူ့ဘဝ လူ့အဖြစ် လူ့ဝန်းကျင်မှ ကောင်းမှုဆိုးမှုသာယာမှု မသာယာမှု စသည်တို့ကို စာဆို၏စေတနာသက်ရောက်မှုအလိုက် ရေးဖွဲ့ကြသည့်စာများချည်းဖြစ်သည်။ 

ဟာသ(ရသ)စာများကိုလည်း လူ့လောက လူ့အဖြစ်သနစ်များနှင့် ကင်းကွာလျှက် ရေးဖွဲ့၍ရနိုင်ကောင်းသည်မဟုတ် သောကြောင့် ဟာသစာတို့တွင် ..လူနှင့်လူလောကအပေါ် ချစ်ခင်တွယ်တာဖွယ်များလည်းပါသည်။ 

လူ့လောကအတွင်း ဖြစ်သင့်မဖြစ်သင့်  ချင့်ချိန်ဖွယ်များလည်း ပါသည်။

လူတို့၏အပြုအမူ တရား၏မတရား၏တွေးဆစရာများလည်းပါ၍ ခေတ်ကာလအခြေအနေတခုအတွင်း နယ်ပယ်တခု  ဒေသတခု၌ ထိုခေတ် ထိုနယ်ပယ် ထိုဒေသနေလူတို့သတ်မှတ်ထားတတ်ကြသော စံတန်ဖိုးဟူသည်များ ဓလေ့ထုံးတမ်း နှင့်ယဥ်ကျေးမှုအစဥ်အလာ ဟူသည်များအပေါ်ထောက်ပြ ဝေဖန် ဆန်းစစ်ချက်များလည်းပါသည်။

{စာပြုသူစာဆို၏ စေတနာအာဘော်အတိုင်း စာရှုသူတို့၏စိတ်သန္နာန်၌ စေတနာ ပေါ်၏ မပေါ်၏ ဟူသည်မှာကား(စာက အကြောင်းအရာအရကော အရေးအဖွဲ့အရပါ ရသမြောက်နေလင့်ကစား) စာရှုသူ၏စေတနာအခံ ဉာဏ်အခံနှင့် သက်ဆိုင်လိမ့်မည်ထင်ပါသည်}"

အောက်တွင် ကျွန်တော်ဖတ်ခဲ့ ရယ်ခဲ့မိသော ဟာသဇာတ် စာတိုပေစကလေးများကို ဖောက်သည်ချကာပြန်လည်တင်ပြထားပါသည်။ *(မူရင်းစာများကိုတိုက်ရိုက်ကူးယူထားသည်မဟုတ်ဘဲ မှတ်မိသလို ရေးလိုက်ခြင်းဖြစ်ပါသည်။)

ပထမဇာတ်လမ်းမှာ တောင်_မြောက် ကိုရီးယားစစ်ပွဲကာလအတွင်းက ဇာတ်လမ်းဖြစ်ပါသည်။

တနေ့သောအခါ၌ တောင်ကိုရီးယားဖက်မှ ကူတိုက်နေသော မဟာမိတ်တပ်များ၏ တပ်မှူးချုပ်အမေရိကန်ဗိုလ်ချုပ်ကြီး မက်အာသာက တောင်ကိုရီးယားတပ်များစိတ်ဓာတ်တက်ကြွစေမည့် မိန့်ခွန်းပြောသည်။ 

သူပြောသည့်မိန့်ခွန်းကို အင်္ဂလိပ် + ကိုရီးယား ဘာသာစကား နှစ်မျိုးစလုံးတတ်ကျွမ်းသည့် ကိုရီးယားလူမျိုးတဦးက ဘာသာပြန်ပေးရသည်။

မိန့်ခွန်းပြောရင်း ရယ်ရွှင်ဖွယ်ဟာသဇာတ်လမ်းတပုဒ်ကို ဗိုလ်ချုပ်ကြီးက ပြောရာ၌ မပြောမီ ..."ဇာတ်လမ်းပြောမှာဖြစ်သည့်အတွက် ဝါကျတကြောင်းဆုံးလျှင် တခါဘာသာပြန်ပေးခြင်းမျိုးမလုပ်ဘဲ ဇာတ်လမ်းဆုံးသောအခါမှ တပုဒ်လုံးကို ဘာသာပြန်ပါ " ဟု ကိုရီးရီးယားဘာသာပြန်ဆရာကိုမှာကြားထား၏။

ဗိုလ်ချုပ်ကြီးပုံပြင်ပြောအပြီး၌ ဘာသာပြန်သူက ကိုရီးယားဘာသာသို့ အလွန်တိုတောင်းလှစွာဖြင့် ဘာသာပြန်ပေးလိုက်ရာ နားထောင်နေသော ကိုရီးယားတပ်ကြီးတတပ်လုံး ဝက်ဝက်ကွဲမျှရယ်မောကြသည်မှာအခမ်း အနားပြီးဆုံးပြီးသည့်တိုင် အတောမသတ်နိုင်ပဲရှိခဲ့သည်။

ဗိုလ်ချုပ်ကြီးမက်အာသာ၏စိတ်တွင်ကား သူ့ဇာတ်လမ်းအား ကိုရီးယားတပ်သားများနှစ်ချိုက်ကြသည်ကိုတွေ့မြင်ရသဖြင့် ကျေနပ်ပီတိဖြစ်ရသည်ထက် ဤမျှနည်းပါးသော စကားလုံးမျှဖြင့် ပွဲကျသွားအောင် ဘာသာပြန်နိုင်သော စကားပြန်၏အစွမ်းကို အံ့သြလှသည်ဖြစ်သောကြောင့် ပွဲသိမ်းပြီးချိန်၌ စကားပြန်အားခေါ်ယူ၍ ... "ကျုပ်ပြောတဲ့ ဟာသဇာတ်လမ်းတခုလုံးက်ု မောင်ရင်က တကယ့်ကို ဟာသမြောက်အောင် စကားလုံးနည်းနည်းလေးနဲ့ဘယ်လိုများ ဘာသာပြန်လိုက်သလဲဗျာ သိပ်နေရာကျတဲ့ဘာသာပြန်ပုံဗျ နည်းကောင်းလေးများရှိရင် သိစမ်းပါရစေ" ဟု မေးစမ်းတောင်းပန်သည်။

စကားပြန်က မက်အာသာအား သူ့ဘာသာပြန်နည်းကိုရှင်းပြသည်မှာကား..

"တပ်ဖွဲ့ကြီးခင်ဗျား ဗိုလ်ချုပ်ကြီးက ရယ်စရာပုံပြင်ပြောသွားတာပါ၊ ရယ်ဖွယ်ဖြစ်အောင် ကျုပ်ဘာသာပြန်မပေးတတ်လို့ပါ၊ ဗိုလ်ချုပ်ကြီးကျေနပ်သွားအောင်လို့ရယ်ပေးလိုက်ကြပါနော် " လို့ကျွန်တော်ဘာသာပြန်ပေးခဲ့တာပါဟူ၏။

 ဒုတိယ ဇာတ်ကလေးမှာ "သင်္ဂဇာဆရာတော်၏ပုံပြင်များ" ထဲတွင်ဖော်ပြထားသည့်ဇာတ်ဖြစ်ပါသည်။

သစ်တုံးတတုံးကို ငါးမန်းလွှဖြင့်ဖြတ်ရာ၌ သားငယ်နှင့်တဖက်တယောက် တွန်းဆွဲဖြတ်နေသော ဖခင်ဖြစ်သူအား ခရီးသွားတဦးကဝင်ရိုက်သည့်မှုအတွက် ယင်းခရီးသွားကိုရုံးတင်ကာ အဘယ့်ကြောင့် ဝင်ရောက်ရိုက်ပုတ်ရသနည်းဟုစစ်မေးရာ ခရီးသွားက ...သူသည်မတရားမှုကို စက်ဆုတ်လှသူဖြစ်သောကြောင့် တရားသည့်အမှုကို ပြုလိုသည်နှင့်အညီ ကလေးနှင့်လူကြီး လွှတစ်စင်းကိုလုယက်နေသည့်အခင်း၌ ကလေးအပေါ် အနိုင်ကျင့်နေသောလူကြီးကို ဝင်ရိုက်ခြင်းဖြစ်သည် ..ဟု ဖြေကြားသည်ဟူ၏။

နောက်ထပ် ကျွန်တော်တင်ပြဦးမည့် ပုံပြင်ကိုကား စာဖတ်သူအတော်များများ ဖတ်ဖူးကြားဖူးပြီးဖြစ်လောက်မည်ထင်ပါသည်။

 မြစ်ပြင်ကျယ်တဖက်ကမ်းမှ အခြားတဖက်ကမ်းသို့ပို့ဆောင်သည့် လှေပေါ်တွင် ခရီးသွားများပြတ်လတ်ခိုက်ဖြစ်သောကြောင့် စာတတ် ပေတတ်ပညာရှိကြီးဟူ၍ ကျော်ကြားသော ပုဂ္ဂိုလ်ခရီးသည်တဦးနှင့် လှေထိုးသားတဦးတို့သာပါသည်ဖြစ်ရာ မြစ်ပြင်ကျယ်ကို တရွေ့ရွေ့ဖြတ်ကျော်ရင်း နှစ်ဦးသား စကားစမြည်ပြောရာမှ လှေထိုးသားခမျာမှာ စာမတတ်သူဖြစ်ကြောင်း စာတတ်ပညာရှိသိရသည်ဖြစ်၍ ..

"အိမ်း ..လူဖြစ်ရပါသော်လည်း စာမတတ်သောသူကားဘဝတဝက် ဆုံးရှုံးပေ၏" ဟု ကရုဏာသက်စွာ မြွက်ဆိုမြည်တမ်းလိုက်၏။

လှေထိုးသားကား ပညာရှိစကားကို သက်ဝင်လျက် သူ့အဖြစ် သူ့ခြေအနေအပေါ်တွင် သိမ်ငယ်ညှိုးနွမ်းသောစိတ်ဖြစ်သောကြောင့် ​နှုတ်ဆိတ်ကာ လှေကိုသာလျှင် မှန်မှန်လှော်ခတ်နေခဲ့စဥ် မြစ်ပြင်ကျယ်ပေါ်သို့ ရုတ်ချည်းပင် လေမုန်တိုင်းကျလာ၏။ လှိုင်းတံပိုးကြီးလှ၍ လှေမှောက်လုတွင် လှေ ထိုးသားက...

 "ဆရာကြီးရေကူးတတ်ပါသလားခင်ဗျာ"ဟု စိုးရိမ်တကြီးအော်ဟစ်မေးရာ ဆရာကြီးခမျာ လက်ခါပြရုံမျှသာပြပြီး လှိုင်းအောက်သို့ နစ်မြုပ်သွားတော့၏။

တဖက်ကမ်းသို့ကူးခတ်ရောက်ရှိသွားသော လှေထိုးသားသည် လေငြိမ်၍ လှိုင်းငြိမ်စပြုပြီဖြစ်သော မြစ်ပြင်ကိုကြည့်ကာ ဆရာကြီးအတွက်စိတ်မကောင်းလှစွာဖြင့်  ဥဒန်းစကားတခုကို ဆိုခဲ့သည်မှာ...

"စာမတတ်သော် ဘဝတဝက်ဆုံး၍ ရေကူးမတတ်သော် ဘဝတခုလုံး ဆုံးတတ်ပေသည်တကား" ဟူ၏။

လောကအတွင်း ဆင်ခြင်ဖွယ်ရှိသည်တို့ကို ဆင်ခြင်မိစေရန် သတိပြုဖွယ်ရှိသည်တို့ကို သတိပြုမိစေရန် ရည်သန်လျက် ဟာသဉာဏ်ရှိသည့်စာဆိုတို့က ရယ်ဖွယ်ပုံပြင်ဇာတ်လမ်းလေးများဖြင့် တင်ပြတတ်ကြသည်ကိုလည်းကောင်း၊ 

 ဟာသစာတို့တွင် အခြားလေးနက်သည့် လောကခြင်းရာမျာ မပါသည့်တိုင်၊ အနည်းဆုံးအားဖြင့် ဖတ်သည့်အခိုက် ကြားသည့်အခိုက်၌ ဖတ်သူကြားသူတို့စိတ်နှလုံးပေါ့ပါးရွှင်ပျစေသည့်အစွမ်းသတ္တိပါရှိကြောင်း ပေါ်လွင်စေလ်ုသဖြင့်လည်းကောင်း၊ ဤဇာတ်လမ်းလေးများကို သာဓကအဖြစ်ကျွန်တော်ထုတ်ဆောင်ပြခြင်းဖြစ်ပါသည်။

မြန်မာစာပေလောကတွင် ထိုသို့သောဟာသစာများ (ဝတ္ထုတို ဝတ္ထုရှည် ဆောင်းပါး ပုံပြင် ပြဇာတ်) ဖန်တီးနိုင်သည့် စာပေအနုပညာရှင်များရှိခဲ့ပြီးဖြစ်ပါသည်။

ဤသို့ဖန်တီးနိုင်သည့် စာပေအနုပညာရှင်လောင်းလျာအများအပြားရှိနေသည်ဟုလည်း ကျွန်တော်ယုံကြည်ပါသည်။ 

ဤသို့ယုံကြည်သည်ဟုဆိုခြင်းမှာ FB platform တွင်တွေ့ရတတ်သော အချို့စာပေအရေးအသားများကို ဖတ်ရှုအကဲခတ်ပြီးဆိုခြင်းဖြစ်ပါသည်

5.11.22

*******

ဖေ့စ်ဘွတ်စာပေ(၇)

6.11.22

ဖေ့စ်ဘွတ်ပလက်ဖေါင်းတွင် ရေးကြသည့်စာများထဲ၌ ရယ်ရွှင်ဖွယ်စာတို စာရှည်လေးများကို အစဥ်လိုလိုပင် တွေ့ရ ဖတ်သဖြင့်ဝမ်းသာရသည်။

ထိုစာများတွင် ပုံနှပ်ထုတ်ဝေပြီးဖြစ်သော စာများလည်း(ပြန်လည်ဖော်ပြမှုအဖြစ်)ပါ၍အသစ်ရေးသည့်စာများလည်းပါသည်။ တချို့စာတိုလေးများမှာ ရယ်ရွှင်ဖွယ်အတွက်သက်သက်မျှ ရွယ်စူးရေးပုံရသည်။ အချို့စာတိုလေးများမှာမူ ချစ်ခင်ရင်းနှီးသူတဦးတယောက်က post တင်သည့် စာ /ဓာတ်ပုံအား ရယ်သွမ်းသွေးလိုသည့်သဘောဖြင့်comment အဖြစ်ရေးခြင်းဖြစ်သည်။ 

သို့သော်လည်း ယင်း comment ကိုဖတ်မိသူတိုင်း၏ ဟဒယနှလုံးကို ရွှင် ပြုံးလန်းဆန်းစေသည့်သတ္တိအစွမ်းပါသည်ဖြစ်သောကြောင့်ထို comment မျ်ုးကိုလည်း ဟာဿရသစာဟုပင် ကျွန်တော်မှတ်ယူပါသည်။

ယခုတလောတွင် ဇာတ်အငြိမ့်လူရွှင်တော်တဦးက သူ့ဘဝဖြတ်သန်းမှုအကြောင်း (စာပြီးနေ့စွဲနှင့်တကွ)နံပါတ်စဥ်ထိုးကာ အခန်းဆက်ဆောင်း ပါးရေးလျက်ရှိရာ သူ့စာထဲတွင်(သူဇာတ်စင်ပေါ်တွင် ဖျော်ဖြေသည့်ပြက် လုံးမဟုတ်သော) သူ့ဘဝအတွေ့အကြုံထဲမှရယ်မောဖွယ်ရာအများအပြားကိုတွေ့ရသည်။

 တကယ့်ဘဝထဲမှ ရယ်မောဖွယ် ကိစ္စများဖြစ်သောကြောင့် ရယ်ပြီးရုံမျှဖြင့် အစွမ်းပြယ်သွားသော ဟာသမျိုးများကားမဟုတ် ရယ်ပြီးသည်၏ နောက် တွေးဆ,စရာ ဆင်ခြင်စရာ သံဝေဂရစရာ စာနာစရာ ကရုဏာသက်စရာ အဖတ်တင်ကျန်ခဲ့တတ်သော ဟာသများဖြစ်သည်။

သူ့စာအရပညာရေးအနေဖြင့် မူလတန်းအောင်ရုံမျှသာ သူကျောင်းနေခဲ့ဖူး သည်ဟုဆိုထားသော်လည်း သူ့စာများကား ဝါရင့်ကျင့်သားရပြီးသား စာ ရေးဆရာတဦးက ရေးထားသည့်နှယ် ဆွဲဆောင်မှုရှိလှသည်။ သူ၏ လူရွှင် တော်အတတ်ပညာကြောင့် စကားအသွားအလာ စာအချိက်အဆက်သ​ဘောကို နားလည်တတ်ပွန်နေပုံရပါသည်။

နောက်တဦးမှာ သက်ပြည့်ပင်စင်စားအလယ်တန်း(အထက်တန်း ??) ကျောင်းအုပ်ဆရာမတဦး ရေးသည့်(သူ့ fb scc တွင် ထုံ့ပိုင်းထုံ့ပိုင်းဖော်ပြနေသည့်)စာများဖြစ်သည်။ သူက သူ့ဘဝဇာတ်ကြောင်းရေးသည့်အနေမျိုးဖြင့်ရေးသည်မဟုတ် သူ့ဘဝတလျှောက် အတွေ့အကြုံများထဲမှသူ့စိတ်ထဲတွင်အမှတ်ထင်ထင်သူ့စိတ်တွင် စွဲကျန် ရစ်သည့်အဖြစ်အပျက်များကိုသွက်လက်ပေါ့ပါးစွာပြန်လည်ပြောပြသည့်ဟန်ဖြင့် ရေးသည်။ 

သူ့စာများများမှာ ရေးဟန်ပေါ့ပါးရုံမျှမက(စာရေးနေစဥ်ရွှင်လန်းပေါ့ပါး သောစိတ်နှလုံးရှိနေသောကြောင့်ပေလောမသိ)အကြောင်းဆိုက်လျှင်ဆိုက်သလို ဟာသစကားလုံးလေးများ ဟာသအဆိုအမိန့်လေးများ ညှပ်ကာညှပ်ကာ မလွတ်တမ်း ထည့်ရေးတတ်ရေးထားတတ်သဖြင့် ဖတ်ရင်းပင် ရယ်ရပြုံးရသည်ဖြစ်ရာ စာရှည်သည့်တိုင် ဖတ်သူအဖို့ စာမဆုံးမချင်း ဖတ်ချင်သောစာမျိုးများဖြစ်သည်။

သူ့စာဖတ်ပြီးသူတိုင်း သူနှင့် လူပုဂ္ဂိုလ်ချင်းရင်းနှီးပြီးသား လိုလိုခံစားရအောင် သူ့စာများက ဆွဲဆောင်နိူင်သည်ဟုထင်မိ၏။

ထိုပုဂ္ဂိုလ်များရေးသည့် ဟာသစာများကိုနောက်ပိုင်းကျမှ ကောက်နုတ်ဖေါာ်ပြရန် ရည်ရွယ်ထားပါသည်။

*အထက်တွင်ရေးခဲ့သော အမှတ်_  ၆ _ ဆောင်းပါးအဆုံး၌ ဖေ့စ်ဘွတ်တွင် ဟာသစာလေးများ တွေ့ရကြောင်းရေးလိုက်သည့်အဆက်အစပ်ဖြင့် ယခု အမှတ်_၇_ဆောင်းပါးကိုအစချီလိုက်သော်လည်း ဖေ့စ်ဘွတ်စာများကို ဤဆောင်းပါးအစဥ်၏ နောက်ဆုံးပိုင်းကျမှသာ ရေးရန်ဖြစ်ပါသည်။

 

ယင်းသို့ရေးရန်အတွက် ကောက်နုတ်ဖော်ပြမည့်စာများရှာဖွေရွေးထုတ်ခြင်း ကောက်နုတ်စာသားများအတွက် စာရေးသူကာယကံရှင် (အကောင့်ပိုင်ရှင်) တို့ထံမှ ခွင့်ပြုချက်ယူခြင်း စသည့်အဆင့်များ လုပ်ရဦးမည်ဖြစ်ပါ သည်။ 

ထို့အပြင်စာရေးသူ(acc ပိုင်ရှင်)၏အမည်ကို ဖော်ပြရန် သင့်မသင့်ဟူသည်ကိုလည်း ချိန်ဆ,စရာရှိနေပါသည်။

 {မိမိနှင့်ရင်းနှီးသူ acc ပိုင်ရှင်အား  ချီးပ,ပွဲထုတ်,ဗန်းတင်(hypeလုပ်)သည့်အဖြစ်မျိုး ရောက်သွားမှာကိုလည်း စိုးရိမ်နေမိပါသည်။

တကယ့်အဖြစ်မှာ အထက်တွင်မိတ်ဆက်သဘောအဖြစ် ဖော်ပြလိုက်သည့် acc ပိုင်ရှင်များအပါအဝင် မည်သည့် ဟာသစာရေး/ဆရာဆရာမ များနှင့်မျှကျွန်တော်သိကျွမ်းသည်မဟုတ်ပါ}။

(ဆက်ရေးပါမည်)

မောင်ခေတ်စည်

6.11.22