သစ်ခက်သံလွင် နှစ်ယောက်ကဗျာ- စိုးနောင်(မုံရွာ)၊ ဟိန်းလတ်မိုး

 
mulpix.com
သူငယ်တန်းအဆင့်ဥပဒေ
စိုးနောင်(မုံရွာ)

  သစ်တစ်ပင်ခုတ်ထောင်(၃)နှစ်ဆိုတာ
ဘာကိုဆိုလိုတာလဲဖေဖေ။

သစ်တစ်ပင်တည်းခုတ်ရင်
ထောင်(၃)နှစ်ကျမယ်
သစ်ပင်အများကြီးခုတ်ရင်
ထောင်မကျဘူးလို့ဆိုလိုတာသားရဲ့။

တရားဥပဒေဆိုတာ
ဘာလဲဖေဖေ။

တရားဥပဒေဆိုတာ
တခြားနိုင်ငံတွေမှာအထီး
ဖေဖေတို့နိုင်ငံမှာအမ
ဒါကြောင့်မတရားဥပဒေလို့ခေါ်တယ်သားရဲ့။

တရားဥပဒေအထက်မှာနေတယ်ဆိုတာ
ဘာလဲဖေဖေ။

တရားဥပဒေရဲ့အောက်မှာအခန်းတစ်ခန်းနဲ့
တရားဥပဒေရဲ့အထက်မှာအခန်းတစ်ခန်းရှိတယ်
အောက်အခန်းနဲ့အထက်အခန်းကို
လှေကားတစ်ခုနဲ့ဆက်ထားတယ်
အာဏာနဲ့ငွေရှိတဲ့အောက်အခန်းကလူတွေက
အပေါ်အခန်းကိုသွားနေလို့ရတာကိုပြောတာသားရဲ့။

တရားသူကြီးတွေက
ဘာလုပ်ရတာလဲဖေဖေ။

တရားဥပဒေရဲ့
အောက်အခန်းနဲ့အပေါ်အခန်းကိုဆက်ထားတဲ့လှေကားမှာ
အစောင့်ကျနေသူတွေပေါ့သားရဲ့။     ။

... 
Pinterest

နှာစေးနေသောယုန်များနှင့်
ဟိန်းလတ်မိုး
 
ဒါဟာနောက်ဆုံးအခွင့်အရေးနဲ့နောက်ဆုံးမိနစ်
စီရိုနယ်ဒိုလို လျှာချက်သပ်
ခြေသုံးလှမ်းလောက်နောက်ကိုဆုတ်လို့
ခါးထောက် အသက်ဝဝရှူ ရှေ့ကိုကြည့်တယ်
ဆုံးဖြတ် မာန်သွင်း ကြံရင်း ငုံ့အကြည့်
တည်ထားတဲ့ဘောလုံးဘယ်ရောက်သွားခဲ့တာလဲ
ဘယ်ရောက်သွားတာလဲ မေးရင်းနဲ့မော့အကြည့်
ဘုရား...ကယ်တော်မူပါ
ဒိုင်မရှိ
ကစားဖော်မရှိ
ပရိတ်သတ်မရှိတော့တဲ့
ဒီကွင်းကြီးထဲမှာ
ငါတယောက်တည်း ဒီကွင်းကြီးထဲမှာ။  ။


Comments