သစ်ခက်သံလွင် ကဗျာသုံးသပ်ချက်၊ ကိုနိုင်း ၏ ''လွတ်လပ်လှိုင်းခေတ်ပေါ်ကဗျာများကိုကြိုဆိုခံစားကြည့်ခြင်း(အဆက်) ''

ပြတင်းတံခါးအဖွင့် ဇာခန်းဆီးအလွင့်( ၄၃ )

လွတ်လပ်လှိုင်းခေတ်ပေါ်ကဗျာများကိုကြိုဆိုခံစားကြည့်ခြင်း(အဆက်)

ကိုနိုင်း

နှစ်ပေါင်းငါးဆယ်ကြာမှပြန်လည်ကျင်းပခွင့်ရတဲ့ စာပေညီလာခံကြီးကို အောင်မြင်စွာကျင်းပပြီးစီး သွားပါပြီ။ ဒီစာပေညီလာခံကြီးမှာစာပေဆိုင်ရာ နယ်ပယ်အသီးသီးမှစာတမ်းတွေတင်ကြ၊ ဆွေးနွေး ကြ၊ အဆိုတွေကို မဲပေးဆုံးဖြတ်ကြနဲ့ပေါ့။ မဲပေးဆုံးဖြတ်ပြီးတဲ့အဆိုတွေကို ပြည်ထောင်စုအစိုးရရဲ့ ပြည်ထောင်စုအဆင့်ပြန်ကြားရေးဝန်ကြီးဆီတင်လိုက်ပြီး အဆုံးအဖြတ်ခံယူပါတော့မယ်။

ပြည်ထောင်စု ပြန်ကြားရေး ဝန်ကြီးကအဆုံးအဖြတ်ပေးပြီးပြန်ချမှာကိုတော့ စာပေညီလာခံဦးဆောင် ကျင်းပတဲ့ဗဟိုကော်မတီကလုပ်ငန်းစဉ်တွေရေးဆွဲပြီး အကောင် အထည်ဖော်ရတော့မှာပါ။ ကျန်တဲ့ စာပေအပိုင်းတွေထားပါတော့။ ကဗျာနဲ့ပတ်သက်တာကိုပြောချင်ပါတယ်။

ကျောင်းသင်ခန်းစာ ပြဋ္ဌာန်းစာအုပ်တွေထဲမှာ ခေတ်ပေါ်ကဗျာကိုထည့်ဖို့အဆိုကို အပြည့်အဝဆို သလောက် ထောက်ခံလိုက်ပါတယ်။ ဒါဟာ အင်မတန်မှကောင်းတဲ့အဆိုပါပဲ။ တခုရှိတာကခေတ်ပေါ်ကဗျာကို အထက်တန်းအဆင့်ကျောင်းသားတွေစိတ်ဝင်စားရဲ့လား။ စိတ်ဝင်စားရင်တောင် ခံစား နားလည်နိုင်ပါ့မလား။ တက္ကသိုလ်ကျောင်းသားတွေကိုမေးကြည့်တဲ့အခါ ကျောင်းသား ၁၀၀ မှာ တယောက်တောင် စိတ်မဝင်စားတဲ့အခြေအနေ ဖြစ်နေပါတယ်။ စိတ်ဝင်စားခဲ့ရင် ခံစားနားလည်နိုင် အောင် ဆောင်ရွက်နိုင်ဖို့အတွက် ဆက်ဆောင်ရွက်လို့ရနိုင်ပါတယ်။ 

ကျွန်တော်ပြောချင်တာက ခေတ်ပေါ်ကဗျာကို  လူငယ်ကျောင်းသားတွေ စိတ်ပါဝင်စားလာအောင် ဘယ်လိုလုပ်မလဲ၊ ဘယ်လိုစည်းရုံးသွေးဆောင်နိုင်မလဲဆိုတာပါပဲ။ အခုအချိန်မှာခေတ်ပေါ်ကဗျာ စာအုပ်တအုပ်ထုတ်နိုင်ဖို့အရှုံးခံပြီး ထုတ်ဝေနေရတဲ့အခြေအနေပါ။ ကျောင်းသင်ခန်းစာမှာပြဋ္ဌာန်း လိုက်ရင် ကျောင်းသားတွေစိတ်ပါဝင်စားပါမှအောင်မြင်မှာပါ။ ကျောင်းသင်ခန်းစာတွေထဲထည့် ပြဋ္ဌာန်းလိုက်ပြီး ကျောင်းသားတွေ စိတ်မဝင်စားရင် ပြဋ္ဌာန်းထားတာပဲရှိပါလိမ့်မယ်။

ခေတ်ပေါ်ကဗျာနဲ့ပတ်သက်လို့တွေးလိုက်မိတာကိုပြောတဲ့သဘောပါ။ လွတ်လပ်လှိုင်းခေတ်ပေါ်ကဗျာတွေ ကို ဆက်ခံစားကြပါစို့။ လွတ်လပ်လှိုင်း အွန်လိုင်းမဂ္ဂဇင်းဟာ ကလောင်အစုံနဲ့ခေတ်ပေါ်ကဗျာအကြောင်း အရာပေါင်းစုံ၊ ပုံသဏ္ဍာန်မျုးစုံကိုဖတ်ရှုခံစားခွင့်ရလိုက်ပါတယ်။

ဒီအကြောင်းအရာပေါင်းစုံနဲ့ပုံသဏ္ဍာန်မျိုးစုံထဲက ခေတ်ပေါ်ကဗျာထဲမှာ ခံစားမိတဲ့ကဗျာတစ်ပုဒ်ကတော့ ကဗျာဆရာသင်းရည်လွင် ရဲ့ လွတ်လပ်နိဒါန်း ပါ။

          တိုင်ကပ်နာရီအဟောင်းကြီး

         တချက်တချက်

         အဲသည်ထဲ၊ ပေကျန်ခဲ့တဲ့အချိန်တွေလို

         ယန္တယားဟာ၊ ဆက်လက်လည်ပတ်နေမယ်။

         ရိုးမတောင်ပေါ်မှာ

         ကျကျန်ခဲ့တဲ့ဘဝတွေရှိတယ်။

         ကျည်ဆံအခွံတစ်ခုလို

         ဘာမှမသိခဲ့တာတော့မဟုတ်ဘူး

         ကြယ်တွေလည်း သမျုင်းရှိတယ်။

         တချို့မေ့ထားတဲ့မြစ်မှာ

         တချို့လွှင့်ပစ်လိုက်တဲ့ထောင်ဗူးဝမှာ

         ဒါကို ညတွေက မမေ့ဘူး။

         အကျဉ်းထောင်အခန်းတခုရဲ့

         နံရံမှာရေးထွင်းခဲ့

         ထောင်ဆေးရုံတခုရဲ့ လူနာဆောင်မှာ

         ဘယ်သူမှ မဖတ်ရတဲ့ရောဂါကိုမမေ့ဘူး။

         ညသန်းခေါင် လန့်လန့်အော်တတ်တဲ့

         နှီးနှောခဲ့တာမမေ့ဘူး

         အမှန်တခုရဲ့ကွယ်ဝှက်မှု ရေသောက်မြစ်

         ခုတ်ထစ်ပိုင်းဖြတ်ခဲ့တဲ့အရာတွေ

         ရုပ်ရှင်အနှေးပြကွက်လိုပြန်ပြန်ကြည့်

         မင်းဟာ သူခိုးလား

         မင်းဟာ လမ်းနံဘေး ရေအိုးစင်လား

         အပြောအဟောကောင်းတဲ့ တရားဟောဆရာလား

         ချောက်ကမ်းပါးကြီးက နက်လိုက်တာ

         ဘဝက လမသာတဲ့နေ့ပဲ။

         မိုးမှောင်တဲ့ညတွေပဲ

         ခရီးမသိတဲ့လမ်းပဲ

         ပေါင်မုန့်လို သိုးခဲ့တယ်။

         ပြန်မလာသူအတွက်၊ ပန်းတွေသီနေတုန်း

         ပြန်ရှာချင်သူအတွက်၊ လမ်းတွေထွင်နေတုန်း

         ဒါ အိပ်မက်လို သစ်နေတုန်း

         မေ့သူက မေ့ကောင်းတုန်း

         သူပြန်လာခဲ့တယ်။

         အသေအချာခေါက်လို့၊ သူပြန်လာခဲ့တယ်။

         နံရံတွေဖြိုဖျက်ဖို့

         ကမ်းခြေ အပြေးလာတဲ့လှိုင်းလို

         သောင်ပြင်လေးမှာ ကျကျန်ခဲ့တဲ့

         ငါ့ ခြေရာတွေ ရှာဖို့။

ဒီကဗျာကိုဖတ်ပြီး ကျွန်တော်တို့ရဲ့ဘဝညတွေကိုပြန်သတိရလိုက်မိတယ်။ ကျွန်တော်တို့ညတွေနေ့တွေဟာ အထီးကျန်ဆန်ခဲ့ရတယ်။ ဒုက္ခယန္တရားကြီးထဲမှာ တပတ်ပြီးတပတ်လည်ပတ်နေခဲ့ရတယ်။ ဒီဒုက္ခယန္တရားကြီးထဲကထွက်ဖို့ ထွက်ပေါက်ကိုရှာရင်းနဲ့ထွက်ပေါက်ပျောက်နေခဲ့ရတယ်။

အမှောင်ညတွေကို လမ်းမသိပဲလျှောက်ခဲ့ရတဲ့ခရီးရှည်ကြီးတခုလိုပါပဲ။ ထမင်းသိုး၊ ပေါင်မုန့်ဆို ပေါင်မုန့်သိုး သွားကြမှာပါပဲ။ နောက်ဆုံးနံရံတွေကို ဖြိုဖျက်ဖို့အတွက်ကလည်း အင်အားအခိုင်အမာရှိဖို့လိုအပ်နေပါသေး တယ်။ သောင်ပြင်မှာကျကျန်ရစ်ခဲ့တဲ့ခြေရာကိုပြန်ရှာနေသလိုပါပဲဆိုတာကိုတော့ ကဗျာဆရာက အတိ အလင်းပုံဖော်ပြလိုက်ပါတယ်။ တချိန်က ထောင်နံရံမှာရေးခဲ့တာကိုပြန်တွေးမိရင်း၊ ကဗျာဆရာ မိုးသက် ငြိမ်ဦး ရဲ့ ”မော်စကို” ကဗျာကို ဖတ်လိုက်မိတယ်။

          မော်စကိုကပြန်ခဲ့တယ်

         တော်သလိုနေဖို့မှာခဲ့တယ်။

        

         အုတ်ရိုးအမြင့်ကြီးတွေရဲ့အတွင်းမှာ မော်စကို

         အုတ်ရိုးအမြင့်ကြီးတွေရဲ့အပြင်မှာ လွတ်လပ်ခြင်း

         ဘယ်သူကရော အထဲမှာအကြာကြီးနေချင်မှာတဲ့လဲ

         ဘယ်သူကရော အပြင်ထွက်ရဖို့ငြင်းဆန်မှာတဲ့လဲ

         လျင်သူစားစတမ်း အ,သူ ခံစတမ်း မော်စကို

         ငွေပေးရင် ဘုရင်တပါးလို စံစားနိုင်တဲ့မော်စကို

         ငွေမပေးရင် သေစာရင်းသွင်းဖို့ အမြဲအဆင်သင့်ဖြစ်နေတဲ့ မော်စကို

         မော်စကိုသူ မော်စကိုသားတို့ရဲ့အသက်ဟာ ဝင်စာပဲ။

         ပုံမှန် ဝင်စာ မလာနိုင်ခြင်းဟာ

         ခြေသုတ်ပုဆိုး မြွေစွယ်တွေလည်း ကျိုးစေတယ်

         ငွေဝယ်ကျွန်လည်းဖြစ်စေတယ်

         ကော်ဖီမစ်တထုပ် ဆေးပေါ့လိပ်တတိုကအစ

         တန်ဖိုးက ကြီးမားတယ်။

         လူတွေအကြောင်း ငွေတွေအကြောင်း

         အချိန်ကာလအကြောင်း

         အကြောင်းပေါင်းများစွာကို

         ကျောင်းကြီးတခုလို မော်စကိုက သင်ပေးလိမ့်မယ်။

         မျှော်လင့်ချက်တွေကို ဝင်စာထဲထည့်ပေးပြီး

         သက်ပြင်းပူပူတွေကို အပေါက်ဝမှာထားခဲ့ချိန်

         အုတ်ရိုးမြင့်မြင့်ကြီးတွေက

         ငါ့ကို

         အပေါ်စီးဆန်ဆန် အုပ်မိုးကြည့်ရှုနေကြတယ်။

ကျွန်တော်တို့မြန်မာပြည်မှာသိကြတဲ့အတိုင်း မော်စကိုဆိုတာထောင်ကိုခေါ်ဝေါ်သုံးနှုန်းကြတယ်ဆိုတာကို။ ကဗျာဆရာပြောတဲ့အတိုင်း မြန်မာပြည် က အကျဉ်းထောင်ထဲကအကြောင်းတွေကို မီးမောင်းထိုးပြလိုက် တာပါ။ ထောင်ထဲမှာထောင်ဝင်စာလာဖို့အရေးကြီးပါတယ်။ ထောင်ဝင်စာလာရင် အရာရာကိုငွေပေးဝယ် လို့ ရသလိုပါပဲ။ ဆေးပေါလိပ်ဆိုတာကလည်း လဲလှယ်ရေးငွေကြေးတခုလိုဖြစ်နေပါတယ်။ ငွေပေးရင် ဘုရင်တပါးလို စံစားနိုင်တဲ့မော်စကို၊ ငွေမပေးရင် သေစာရင်းသွင်းဖို့အမြဲအဆင်သင့်ဖြစ်နေတဲ့မော်စကို ဆိုတဲ့ကဗျာစာသားလေးတပုဒ်ဟာလည်း ထောင်တွေထဲမှာဖြစ်နေတဲ့အခြေအနေမှန်ကိုပြသွားပါတယ်။ 

ငွေအရေးကြီးပုံနဲ့ထောင်ထဲမှာ စည်းမျဉ်းစည်းကမ်းမရှိပုံတွေ၊ ထောင်အတွင်းမှာ ဥပဒေက ပြင်ပ ရောက်နေ ပုံတွေကို တွေ့နိုင်ပါတယ်။ ပြောမယ်ဆိုရင် မော်စကိုဆိုတဲ့ထောင်နဲ့မြန်မာပြည်ကြီးက အတူတူဖြစ်နေပါ တယ်။ ထောင်အပြင်လောကမှာ လည်း ငွေများတရားနိုင်ခေတ်ကြီးကပြည်သူတွေရဲ့ဆင်းရဲမွဲတေမှုကို ဝါးမြိုပစ်နေပါတယ်။ ဥပဒေရဲ့ပြင်ပကိုရောက်နေပါတယ်။ ဒါတွေဟာ လောကရဲ့ လောကဓံတရားတွေပါပဲ။

ဒါကို ”ခြေသုတ်ခုံမှာရပ်နေတဲ့ဖိနပ်ကလေးတရံ” ဆိုတဲ့ခေတ်ပေါ်ကဗျာနဲ့ရေးဖွဲ့ပြသွားသူက ကဗျာဆရာ ကိုသက်အောင်ပါပဲ။

         

လောကဓံ ခွာသံတွေကို နားရည်ဝနေတဲ့

         ဖိနပ်အဟောင်းလေးတရံကပြောတယ်။

        

         မြေကြီးနဲ့ခြေဖ၀ါးကြား

         သူ့အရိုးတွေညက်ညက်ကြေသွားတာတောင်

         မငြီးတွားခဲ့ပါဘူးတဲ့၊

         သူတောင်းစားကောင်လေးတယောက်ဆီမှာ

         တနွေစာလောက် ၀င်စားကြည့်ချင်တယ်တဲ့။

         သူဟာ အပျိုမဟုတ်တော့ပါဘူးတဲ့

         နှလုံးသားသဲကြိုးပြတ်နေတဲ့စစ်ဖိနပ်တွေနဲ့

         နှစ်ပေါင်းငါးဆယ်ကျော်အလိုမတူဘဲ ပေါင်းသင်းခဲ့ရတယ်တဲ့။

         သူ ပထမဦးကားအကောင်းစားကြီးစီးရတဲ့ညက

         သူ့ကိုယ်ပေါ်မှာ မိုးတွေသည်းသည်းမည်းမည်းရွာတယ်တဲ့

         အဲ့ဒီနောက် သူအိမ်ပြန်မလျှောက်ဖြစ်တဲ့ညတွေပါတဲ့

         ဟိုတယ်ပေါင်းစုံမှာ လူကုံထံဖိနပ်ပေါင်းစုံနဲ့

         ခြေသုတ်ခုံအမျိုးမျိုးမှာ ရပ်နေခဲ့ရဖူးပါတယ်တဲ့

         စံပယ်ပန်းကုံးထဲကတပွင့်

         သူ့ကိုယ်ပေါ်ပြုတ်ကျကျန်ရစ်တယ်။

         ဆည်းလည်းသံတွေကို

         အေးအေးလူလူ နားစွင့်နေတယ်။

         အခု … သူ

         ဘုရားရင်ပြင်တော်အောက်က ခြေသုတ်ခုံမှာ ရပ်နေတာပါတဲ့။

ခြေသုတ်ခုံအမျိုးမျိုးမှာရပ်ခဲ့ရတဲ့ဒုက္ခတွေကိုစဉ်းစားကြည့်လိုက်ရင် ကြေကွဲစရာဇာတ်လမ်းတွေကို တွေ့ရပါ လိမ့်မယ်။ ဒီခြေသုတ်ခုံတွေပေါ်မှာ ရပ်နေခဲ့ရတဲ့ဘဝလေးတွေကို ကျွန်တော်တို့မကယ်တင်နိုင်တာကိုတွေး လိုက်မိရင် ရင်နာစရာအလွန်ကောင်းပါတယ်။ နောက်ဆုံးမှာတော့ ကဗျာဆရာရေးသလို ဘုရားရင်ပြင် တော် အောက်က ခြေသုတ်ခုံပေါ်မှာ ရပ်နိုင်ကြပါစေလို့ဆုတောင်းနေရုံပါပဲ။

ကိုနိုင်း

ခံစားသုံးသပ်မိသောကဗျာများ

လွတ်လပ်လှိုင်းအွန်လိုင်းမဂ္ဂဇင်းခေတ်ပေါ်ကဗျာများ။

၁။ သင်းရည်လွင်(လွတ်လပ်နိဒါန်း)

၂။ မိုးသက်ငြိမ်ဦး(မော်စကို)

၃။ ကိုသက်အောင်(ခြေသုတ်ခုံမှာရပ်နေတဲ့ဖိနပ်ကလေးတရံ)

-

The Sun Rays-Vol 1. No 179. 23 Dec 2017

ပထမပိုင်း - http://www.jojar.net/2017/12/blog-post_17.html