သစ်ခက်သံလွင်ကဗျာ၊ ဒီလူည နှင့် တေဇလင်း (နည်းပညာတက္ကသိုလ်) တို့၏ ကဗျာများ

KT#

ဝတ်ရုံ

ဖွာရှိုက်လိုက်တိုင်း မှန်ကွဲစတွေပဲထွက်လာတယ်။

ဆေးလိပ်မီးခိုးငွေ့တွေလိုရွာနေတဲ့ တစ်ပတ်ခုနစ်ရက်တွေထဲကနေ
ပြန်ဆယ်ယူထားတဲ့အသက်ရှူလမ်းကြောင်းများ

အဆုပ်အားမကောင်းတဲ့လေကောင်းလေသန့်ဟာ
တိမ်တွေထဲဝင်ပြီး အိပ်ပျော်သွားတယ်။ ။

ဒီလူည
9.7.17
...

KT#

 တဆစ်ဆစ်မိုး

မသတ်ဆိုင်တဲ့အရပ်က ………
ရေခြားမြေခြားမိုးလိုအပြေးလာ

အပြေးပြန်ထွက်
ရက်ရက်စက်စက်စိမ်းတယ်

ဘဝဟာ ………
နာတာရှည်နေ့များစွာအစားထိုးကုထုံးရှာရင်း ရှင်သန်
ဝိယောဓိမနက်ဖြန်တွေ

အရိပ်တွေလိုလိုက်ကပ်………
မလတ်ဆတ်တဲ့အာဟာရထဲပြေးလွားရှင်သန်နေကြ
သူလိုငါလိုဘဝတွေ

ဗိုင်းရပ်စ်ပျံ့နေတဲ့နိုင်ငံတော်ထဲ ………
ပုံမှန်ရှင်သန်ခွင့်ဟာဗီဇာမလိုဘဲခံယူနေထိုင်ခြင်းမှာ
အသက်ရှင်ခြင်းအကြောင်းမပြောကြတော့

မိုးတွေ ………
အငြှိုးတကြီးရွာခြင်းမရွာခြင်းထက်
တဆစ်ဆစ်တက်နေတဲ့အဖျားတွေနဲ့ ။။

တေဇလင်း [ နည်းပညာတက္ကသိုလ် ]

...