Friday, June 9, 2017

k

သစ်ခက်သံလွင် ဝတ္ထုတို၊ ယဉ်မင်းထက် ၏ ခုတင်အမှတ် ၂၂



ခုတင်အမှတ် ၂၂
 
ယဉ်မင်း ထက်



 
ဝါကျင့်ကျင့်မီးရောင်အောက်မှာ အပြင်ဘက်လှမ်းကြည့်လိုက်တော့ ညကသိပ်သိပ်သည်းသည်း မည်းမှောင်လို့။

ရေဆာတယ် အာခေါင်တွေခြောက်လိုက်တာ။ ရေသောက်ဖို့ ရေလိုက်ရှာတော့မှ ကျမရောက်နေတာ သံခုတင်လေးလုံးရှိတဲ့ဆေးရုံတရုံရဲ့အခန်းတခုထဲမှာပဲ။ ခေါင်းရင်းဘက်ဘီရိုပုလေးပေါ်က ရေသန့်ဗူးကို လှမ်းယူလိုက်တော့ ခုတင်ခေါင်းရင်းမှာ ဂဏာန်းတခု၊ နံပါတ် ၂၂။ 

ကျမ ရေကို အငမ်းမရသောက်ချ လိုက်တော့ သီးချင်သလိုဖြစ်သွားတယ်။ 

ကျမ ဆေးရုံကိုဘယ်လိုရောက်လာတာလဲ။ ဘယ်သူတွေလိုက်ပို့တာလဲ။ အခုရော ကျမအနားမှာ ဘယ်သူမှ မရှိဘူးလား။ ဒီအခန်းထဲမှာ တယောက်ယောက်များရှိမနေဘူးလား။  ခုတင်နံပါတ် ၂၂ မှာ ကျမ လွင့်မျောချင်တိုင်း လွင့်မျောခွင့်ရနေတယ်။ 

ကျမဆိုးထားတဲ့လက်သည်းဆိုးဆေးရဲ့အရောင်လို ကျမဘဝဟာအနက်ရောင်ထလို့ ဂျင်းအင်္ကျီအနား သားတွေဖွာလန်နေတာတွေ့တော့ ဖွာလန်ကျဲနေ့ရက်တစ်ချို့ကို မေ့ပစ်လိုက်ချင်တယ်။ 

မပြေလည်တာတွေကို တော်လှန်ရေးလုပ်ဖို့ ကျမဖြတ်သန်းခဲ့တဲ့နေ့ရက်တွေဟာ ညစ်နွမ်းနွမ်း ဖြစ်ခဲ့တာတွေ ပဲ။ ငွေကြေးကိုကိုးကွယ်ရင်း ရွှေသမင်အလိုက်မှားခဲ့တဲ့နေ့တွေမှာ တဏှာရမ္မက်ကြီးသူတွေရဲ့ လက်ထဲ ကျမသားကောင်ငယ်လေးဖြစ်မှန်းမသိဖြစ်ခဲ့ရတယ်။ အခု သူတို့တွေတယောက်မှ ကျမအနား မကပ်ကြ တော့ဘူး။ လျော့ရဲလာတဲ့ခန္ဓာကိုယ် ခြောက်ခမ်းလာတဲ့အသားအရေ ပြာနှမ်းနှမ်းနှုတ်ခမ်းတစုံ စွဲမက်စရာ မရှိတော့တဲ့အခါ ကျမအနား ဘယ်သူမှမရှိတော့ဘူး။ 

ရာသီဥတုကအေးပေမယ့် ကျမခေါင်းထဲချွေးစေးတွေထွက်ပြီး ဆံပင်တွေ စီးကပ်ကပ်ဖြစ်လာတော့ ပန်ကာ ခလုတ်ကိုလှည့်လိုက်တယ်။ ပန်ကာသံ တဒီးဒီးကိုကြားရတာ စိတ်မသက်မသာဖြစ်ပေမယ့်  ခုမှ စိတ်ထဲ နည်းနည်းအေးချမ်းသလိုဖြစ်သွားတယ်။ မနက်မိုးလင်းရင်ဆီးကြိုနေမယ့်အကြောင်းအရာတွေ မျက်တောင် မွှေးတဆုံးသာပဲ စဉ်းစားဖြစ်တော့တယ်။ ဘဝဟာ သင့်တော်သလို မွေ့လျော်ပစ်လိုက်ဖို့ပဲ ကျန်တော့တယ်။ ဆေးရုံတခုရဲ့ကူးစက်ရောဂါသည်တွေထားတဲ့ အခန်းငယ်လေးထဲကနေ ပြန်ခွင့်ရရင် ကျမကိုကျမပြန်လည် ထူထောင်နိုင်ဖို့ အားမွေးရဦးမယ်။ ကျမအိပ်စက်နားနေတဲ့ ခုတင်နံပါတ်ဟာ ၂ ဂဏန်း နှစ်ခုပူးလို့။
အပြင်ဘက်လှမ်းကြည့်မိတော့ ညကမှောင်မဲနေလိုက်တာ။

အမှောင်ထဲ စမ်းတဝါးဝါးပျော်မွေ့ခဲ့တဲ့အချိန်တွေ ကျမဘဝမှာ ဘယ်လောက်တောင် ကြာခဲ့လိုက်သလဲ။ ခရီးဝေးကနေပြန်လာရသူတယောက်လို ကျမနှုံးချည့်မောပန်းလို့။ အာရုဏ်လာချိန်ကိုစောင့်ရင်း ဒီခုတင်မှာ နေဖူးသွားတဲ့ အရင်လူနာတွေရော ဘယ်လိုအနေအထားနဲ့ဆေးရုံရောက်လာတာလဲ။ သူတို့မှာ မိ

သွေးကြောထဲကနေ အနီဝတ်သူနာပြုလေးတယောက်သွင်းသွားပေးတဲ့ အချိုရည်ပုလင်းထဲက တစ်စက် ချင်းကျနေတဲ့ဆေးရည်တွေကိုကြည့်ရင်း အဲဒီအချိုရည်တွေ ခန္ဓာကိုယ်ထဲဝင်သွားပြီးရင် ကျမပြန်လည် ချိုမြိန်လာပါဦးမည်လား။ အရင်က ချိုမြိန်လွန်းလှပါတယ်လို့ဆိုကြတဲ့ နီထွေးထွေးနှုတ်ခမ်းတစုံဟာ ခုချိန်မှာ ညိုပြာရောင်ထလို့။ ကျမဆီက အချိုရည်တွေကိုခပ်သောက်သွားကြတဲ့ တဏှာဘီးလူးတွေ ရဲ့ ရုပ်ပုံတွေကို ဆေးရုံမျက်နှာကျက်က မီးသီးထဲ ရိပ်ခနဲ ရိပ်ခနဲ ဖြတ်ပြေးသလိုမြင်နေမိတယ်။ 

ကျမနဘေးက  တိကျသေချာစွာဆေးသွင်းပေးနေတဲ့ သူနာပြုဆရာမလေးကိုတော့ အမှောင်ထဲလင်းနေတဲ့ မီးသီးလေး ဒါမှမဟုတ် စိမ်းလန်းသစ်ပင်လေးတပင်အဖြစ် မျက်စိထဲတွေးမြင်နေမိတယ်။ ဒါဖြင့် ကျမက ရော  လူ့ပတ်ဝန်းကျင် ကမ္ဘာမြေကြီးအတွက်ဘာတွေများ အကျိုးပြုခဲ့ဖူးသလဲ။ ကျမက ကမ္ဘာမြေကြီး အတွက် အမှိုက်တစ .. ဟင့်အင်း အဲလိုလည်းမဟုတ်သေးဘူး၊ ဘဝတူတွေအပေါ်မှာတော့ ကျမအနစ်နာခံ ဖေးမခဲ့ဖူးတဲ့အချိန်တွေရှိခဲ့တာပဲ။ 

ကျမခန္ဓာကိုယ်ကထွက်တဲ့အနံ့ဆိုးတွေကို နှာခေါင်းမရှုံ့ပဲ ပူစပ်စပ် နဖူးပေါ်ရေတဘက်အုပ်ပေးနေတဲ့ သူနာပြုလေးရဲ့နွေးထွေးမှုအောက်မှာ လူနာခုတင်ဟာ ခင်တွယ်စရာအဖြစ် ခံစားမိလာတယ်။ ဆေးရုံခုတင်က ဂျပိုးတွေသွေးစုပ်နေတာကို အလှူတမျိုးရယ်လို့ တွေးဖြစ်လာတယ်။ မျက်နှာကျက်က ပန်ကာလည်နေတာကိုစိုက်ကြည့်နေရင်း ခေါင်းတွေမူးလိုက် ပျိုချင်အန်ချင်ဖြစ်လိုက်နဲ့။ 

အန်ထုတ်မိလိုက်တဲ့ ထွေးကန်ခွက်ထဲက တံတွေးမှာ သွေးစအနည်းငယ်ပါနေတာကိုမြင်လိုက်ရတော့ ခုတင်ခေါင်းရင်းက ၂ ဂဏန်း နှစ်လုံးဟာ နီးလာလိုက် ဝေးသွားလိုက်နဲ့။

မှောင်လွန်းတဲ့ညလယ်ခေါင်ကြီးမှာ လူကပင်ပန်းနွမ်းနယ်လွန်းပြီး ကြိုးတန်းပါးပါးလေးပေါ် လမ်းလျှောက် နေရသူလို၊ တခုခုကိုလက်ထဲ ဖမ်းဆုပ်လို့ရခါနီးမှလက်လွတ်လိုက်ရသူလို၊ သဲသောင်ပြင်မွမွလေး ပေါ် ဖိနပ်မပါပဲ လမ်းလျှောက်နေရသူလို အဝေးကြီးကနေ ကျမနာမည်ကိုခေါ်လိုက်တဲ့ပဲ့တင်သံတွေလိုလို မျက်လုံးထဲအရာအားလုံးဟာ ဝေဝေဝါးဝါး။

ဘေးနားမှာ အရိပ်တခု ဖြတ်ခနဲတွေ့လိုက်တော့ ကျွမတကိုယ် လုံးဟာတုန်ရီနေတယ်။ 

ခုတင်ခေါင်းရင်းဘက်နားက အောင်ဆီဂျင်အိုးထဲကပလုံစီလေးတွေလို ခန္ဓာကိုယ်ထဲကဆဲလ်တွေဟာ ပေါက်ကွဲပျက်စီးနေတယ်လို့ခံစားနေရတယ်။ ပူလောင်လွန်းလှတဲ့ခန္ဓာဟာ လောင်ကျွမ်းပျက်စီးတော့မည် လား။ အောက်ဆီဂျင်ပိုက်နဲ့ ရှုနေပေမယ့် အသက်ရှုမဝဘူး။ သူနာပြုဆရာမလေးက တချက်တချက် ချွဲစုပ် စက်နဲ့ ချွဲတွေစုပ်ထုတ်နေပေမယ့် အသက်ရှုလမ်းကြောင်းဟာ ရှင်းလင်းမသွားဘူး။ 

မြတ်ဗုဒ္ဓရဲ့အဆုံးအမတွေ တရားတော်တွေနဲ့ဝေးခဲ့တဲ့ အမှိုက်တိုက်ကြီးဒီခန္ဓာဟာ ပြီးဆုံးခါနီးပြီလား။ 

ကျမက အလင်းရောင်မရှိတော့တဲ့ မီးသီးကျွမ်းတလုံး စိမ်းလန်းခွင့်မရှိတော့တဲ့ သစ်ကိုင်းခြောက်တခု။ 

ငယ်ငယ်ကလို ဂါဝန်အနီရဲရဲလေးကိုရချင်လို့မြေဘကီးပေါ်လူးလှိမ့်ငိုနေတဲ့ ကလေးမလေးတယောက်ကို ပွေ့ယူလိုက်တဲ့အမေတယောက်ရဲ့မေတ္တာမျိုးကို အငမ်းမရမျှော်လင့်နေမိတယ်။ သူနာပြုမလေးချပေးတဲ့ ရေပေါက်လေးတွေကိုတောင် ကျမပါးစပ်ကမျိုချဖို့ခက်ခဲလွန်းနေပြီ။ အဝေးကြီးကနေ ပုံသဏ္ဏာန်မျိုးစုံရှိတဲ့ အရာတွေ လှမ်းလာနေကြပြီ။ ဟင့်အင်း ကျမ မလိုက်ဘူး မလိုက်နိုင်ဘူး။ 

ငယ်သံပါအောင်အော်လိုက်ပေမယ့် ဘာအသံမှထွက်မလာနိုင်တော့ဘူး။ တတ်နိုင်သမျှအားကုန်ကျုံးရုန်းထလိုက်တော့ လက်တဖက်က ခုတင်ခေါင်းရင်မှာချိတ်ထားတဲ့ နံပတ်ပြားကိုခိုက်မိပြီး ပြုတ်ထွက်သွားလိုက်သလား၊ ခုတင်အမှတ် ၂၂ နံပတ်ပြားဟာ ခုတင်တိုင်မှာချိတ်မိပြီး လေထဲမှာ ယမ်းခါနေတာလား။ 

ကျမတကိုယ်လုံးလည်း ယမ်းခါယိမ်းထိုးနေတာပဲလား။

ဆရာဝန်သူနာပြုများက လူနာ၏အရေးပေါ်အခြေအနေအားကုသမှုပေးရန်လာသောအချိန်၌ လူနာသည် ကယောင်းကတမ်းပြောပြီး ကုန်းရုန်းထလေသည်။ လိုအပ်သောကုသမှုများပြုလုပ်ပေးပြီး ပြုတ်ထွက် လာသောနံပတ်ပြားကို ဆရာဝန်က မူလနေရာတွင်ပြန်လည်ချိတ်ထားပေးလိုက်သည်။

အပြင်ဘက်တွင် ညသည် ပိန်းပိတ်အာင်မှောင်လွန်းနေသည့်ကြားက သစ်ရွက်ခြောက်ကလေးရဲ့ရှိုက်သံကိုကြားလိုက်ရသလိုလို။

ပြီးနောက် ......


ယဉ်မင်း ထက်
18 _ 22 .Feb .2017