Wednesday, February 15, 2017

k

သစ်ခက်သံလွင် လွမ်းမောအောက်မေ့ခြင်း၊ မြတ်လှိုင်း၏ "ပိတောက်တွေပွင့်ပြီး မသစ်နိုင်သေးတဲ့ရာသီ "

စီးဆင်းနေသောမြစ်များနှင့်

ပြန်မစီးသောမြစ်များ

ပိတောက်တွေပွင့်ပြီး မသစ်နိုင်သေးတဲ့ရာသီ
Khant Minn Htet' FB မှ ယူပါသည်
မဂ္ဂဇင်းအတွက်ခေတ်ပေါ်ကဗျာဝေဖန်ရေးကဏ္ဍကိုရေးဖို့ တိုင်ပင်ကြတော့ ရေးချင် သူတွေများခဲ့ပါတယ်။ ကိုစိမ်းနီက မြတ်လှိုင်းပဲရေးကွာဆိုပြီးပြောတော့ အကိုကြီးတွေဖြစ်တဲ့ ကိုမင်းသစ်နဲ့ ကိုဟိန်းလတ်ကထောက်ခံကြတယ်။ ကျွန်တော်လည်း မြတ်လှိုင်းနဲ့မရေးပဲ ကိုနိုင်းနာမယ်ကို ယူခဲ့ပြီး ခေတ်ပေါ်ကဗျာဝေဖန်ရေးတွေကို စရေးခဲ့ပါတယ်။
အဲဒီအချိန်က ကျွန်တော့်အတွက်ဆုံးဖြတ်ရတာအခက်ခဲဆုံးကာလတခုလို့ ပြောမယ်ဆိုရင်ပြောလို့ရပါတယ်။
ပထမအကြိမ်ကလည်း တက္ကသိုလ်ရိပ်သာလမ်းက စွန့်ခွာခဲ့ရပြီးပြီ။ ဒါပေမဲ့ တက္ကသိုလ်ရိပ်သာလမ်းကို စွန့်ခွာခဲ့ရတာက အိမ်ပြောင်းရသလိုပါ။ အခုတော့ ဒီအိမ်ကအပြီးနှုတ်ဆက်ပြီး ထွက်ခွာသွားရတော့မယ့် အခြေအနေမျိုး။
ပြောမယ်ဆိုရင် NLD စတင်မွေးဖွားစဉ်ကတည်းက ထဲထဲဝင်ဝင်ပါဝင်လှုပ်ရှားခဲ့တာကြောင့် သံယောဇဉ် ကြီးခဲ့ရပါတယ်။ တိုင်းစည်းရုံးရေးအဖွဲ့ဝင်ကစပြီး ဗဟိုတတ်သိအဖွဲ့ဝင်၊ ဗဟိုသတင်းနဲ့ပြန် ကြားရေး မှတ်တမ်းလွှာအယ်ဒီတာ စတဲ့ တာဝန်တွေကိုထမ်းဆောင်ခဲ့ပါတယ်။
အခုသံယောဇဉ်ကြီးမားခဲ့တဲ့ရွှေဂုံတိုင် အုတ်လမ်းကနေအပြီးထွက်ခွာသွားရတော့မယ့်အခြေအနေကို ရင်ဆိုင်နေရပါပြီ။ NLD ကိုခွဲခွာဖို့ဆိုတဲ့ ဆုံးဖြတ်ချက်ကို ချရပါတော့မယ်။ ဒီဆုံးဖြတ်ချက်ကို ပြတ်ပြတ်သားသားချပြီး ကျွန်တော့်အရင် ထွက်ခွာသွားတဲ့သူတွေ ရှိနေပါတယ်။
ဥပမာအနေနဲ့ပြောရရင် ဗဟိုအလုပ်အမှုဆောင်ဒေါ်မြင့်မြင့်ခင်နဲ့ ဒေါ်စမ်းစမ်းနွဲ့(စမ်းစမ်းနွဲ့ သာယာဝတီ) တို့ပါပဲ။
ကျွန်တော်လည်းဆုံးဖြတ်ရခက်တဲ့ အခြေအနေပါ။ NLD ကထုတ်တဲ့ မှတ်တမ်းလွှာအယ်ဒီတာအဖြစ် အဖမ်းခံရပြီး၊
ထောင်ကလွတ်တဲ့အချိန်မှာ ကျွန်တော်လုပ်ဆောင်နေတဲ့ NLD မှတ်တမ်းလွှာကို စစ်အစိုးရက ပိတ်ပင် လိုက်ပါတယ်။ NLD ဗဟိုအလုပ်အမှုဆောင်အဖွဲ့ကလည်း ဗဟိုသတင်းနဲ့ပြန်ကြားရေးကော်မတီကို ဖျက်သိမ်းလိုက်ပါတယ်။ အဲဒီထက်ဆိုးတာကဗဟိုတတ်သိအဖွဲ့ကိုလည်း လုပ်ငန်းတွေရပ်ဆိုင်းလိုက်တယ်။
ဒီလိုအခြေအနေဖြစ်သွားတာက ဗဟိုတတ်သိနဲ့ဗဟိုပြန်ကြားရေးခေါင်းဆောင်တွေဖြစ်တဲ့ ဗိသုကာ ဦးကျော်မင်းနဲ့ ဦးခင်မောင်ဆွေတို့ကို ဖမ်းလိုက်တဲ့အခြေအနေပါပဲ။
အဖွဲ့ဝင်တွေထဲမှာလည်း တော်တော်များများ အဖမ်းခံလိုက်ရသလို၊ ဦးတင်ထွဋ်တို့ ဒေါက်တာစိန်ဝင်းတို့က လည်း တိမ်းရှောင်ထွက်ခွာသွားကြပါတယ်။ ကျန်ခဲ့တာဆိုလို့ ဆရာဦးတင်မိုး၊ ဒေါ်စမ်းစမ်းနွဲ့၊ ဒေါက်တာ   အောင်ခင်ဆင့်၊ ဦးအောင်ကျော်ဦး(ပိန်ပိန်)တို့ပါပဲ။
ဒေါ်စမ်းစမ်းနွဲ့တို့ကလည်း စွန့်ခွာသွားပြီးပြီ။ ကျွန်တော်တို့ NLD ကိုစွန့်ခွာမလား။ ဘာတာဝန်မှမရှိ။ ဘာအလုပ်မှမရှိပဲနေမလား။ ပာမယ်ဆိုရင်တော့ NLD ကစစ်အစိုးရကို ဆန့်ကျင်တိုက်ခိုက်နေသူတွေကို နှင် ထုတ်လိုက်တာပါပဲ။ NLD ခေါင်းဆောင်ဦးအောင်ရွှေကတော့ စစ်အစိုးရနဲ့သဘောတူချက် ယူခဲ့ပုံရပါတယ်။
ထားတော့။ ကျွန်တော့်အနေနဲ့ဆုံးဖြတ်ရ အင်မတန်ခက်တဲ့ဆုံးဖြတ်ချက်ကို ချခဲ့ရပါတယ်။
ဒီလိုနဲ့ကျွန်တော်ရဲ့မိခင်ရပ်ဝန်းထဲကို ခြေပြန်ချခဲ့ရပါတော့တယ်။
အဲဒီအချိန်မှာ ပိတောက်ပွင့်သစ်ဆိုပြီး ကဗျာမဂ္ဂဇင်းကိုစထုတ်ဖို့ တိုင်ပင်ခဲ့ကြတာပါ။ အကိုမောင်စိမ်းနီရယ်၊ ကိုမင်းနွယ်စိုးနဲ့ ကိုမြမြင့်မိုရ်။ ကျွန်တော်ရယ်ပေါ့။
ရန်ကုန်တိုင်းမ် ဂျာနယ်မှ မူရင်းဆောင်းပါး

အစက ပိတောက်ပွင့်သစ်မဟုတ်သေးဘူး။ ၁၉၈၈ မှာ အကိုမင်းသစ်နဲ့ ကိုစိမ်းနီထုတ်ဖို့ကြိုးစားပြင်ဆင် ခဲ့တဲ့ ကောင်းကင်သစ်မဂ္ဂဇင်းမထုတ်ဖြစ်လို့ အခုပိတောက်သစ်ဆိုပြီး ပြန်စီစဉ်ခဲ့တယ်။ ဆရာဒဂုန်တာရာက ပွင့် တစ်လုံးထပ်ဖြည့်ပေးလိုက်လို့ ပိတောက်ပွင့်သစ် ကဗျာမဂ္ဂဇင်း ဖြစ်လာခဲ့တာပါ။ ကဗျာမဂ္ဂဇင်းဆိုပေမယ့် ဝတ္ထု၊ဆောင်းပါး၊ ဝေဖန်ရေးကဏ္ဍစုံမဂ္ဂဇင်းအဖြစ် စပုံဖော်ဖို့ကြိုးစားခဲ့ပါတယ်။ ပိတောက်ပွင့်သစ်ပန်းဖလက်ကို ကိုမင်းနွယ်စိုးနဲ့ ကျွန်တော် စီစဉ်ခဲ့ရတယ်။ နောက် ကိုမင်းနွယ်စိုးက အယ်ဒီတာမလုပ်ချင်ဘူးဆိုပြီး ထွက်သွားတယ်။ အယ်ဒီတာအဖွဲ့ကိုမောင်စိမ်းနီ၊ မြမြင့်မိုရ်၊ ပန်းချီ တင်ထွဏ်း၊ မြတ်လှိုင်းတို့နဲ့ တင်လိုက်တယ်။ ဒါပေမဲ့ ကျွန်တော့်ကို စာပေစိစစ်ရေးက ပယ်ချလိုက်ပါတယ်။
အယ်ဒီတာအဖွဲ့စာရင်းထဲမှာ ကျွန်တော့်နာမယ်ကိုဖြုတ်လိုက်ရတဲ့အတွက် ကိုစိမ်းနီသားအကြီး ဇော်ဇော့် နာမယ် ထည့်လိုက်တယ်။
နာမယ်ထည့်ခွင့်မရပေမယ့် ကိုစိမ်းနီက မင်းအဓိကလုပ်ရမှာပဲလို့ပြောခဲ့ပါတယ်။ အဲဒီလိုနဲ့ ပိတောက် ပွင့်သစ်မဂ္ဂဇင်းဟာ ဗိုလ်ချုပ်လမ်းနဲ့လမ်း ၅၀ ထိပ်က ကိုကျော်ဇင်ရဲ့ခိုင်ယဉ်မွန်ပုံနှိပ်တိုက်မှာ စပွင့်ဖူး လာခဲ့တယ်။ မဂ္ဂဇင်းအဖုံးကို ပန်းချီကိုမျိုးမြင့်က ဆွဲပေးပါတယ်။
စစချင်းမှာပဲ ပန်းချီသန်းဋ္ဌေးမောင် ပါဝင်လာခဲ့သလို ကိုဇော်မျိုးသက်နဲ့စောဒေဝေါတို့လည်း လုပ်နိုင်တာ လုပ်ပေးခဲ့ပါတယ်။ မဂ္ဂဇင်းအတွက်ခေတ်ပေါ်ကဗျာဝေဖန်ရေးကဏ္ဍကိုရေးဖို့ တိုင်ပင်ကြတော့ ရေးချင် သူတွေများခဲ့ပါတယ်။ ကိုစိမ်းနီက မြတ်လှိုင်းပဲရေးကွာဆိုပြီးပြောတော့ အကိုကြီးတွေဖြစ်တဲ့ ကိုမင်းသစ်နဲ့ ကိုဟိန်းလတ်ကထောက်ခံကြတယ်။ ကျွန်တော်လည်း မြတ်လှိုင်းနဲ့မရေးပဲ ကိုနိုင်းနာမယ်ကို ယူခဲ့ပြီး ခေတ်ပေါ်ကဗျာဝေဖန်ရေးတွေကို စရေးခဲ့ပါတယ်။
မဂ္ဂဇင်းလောကမှာ ကဗျာကိုလေးရောင်ပေးပြီးဖော်ပြတာ မရှိခဲ့သေးပါဘူး။ မျက်နှာစာကဗျာနဲ့ ပန်းရိုင်းလွင်ပြင်ကဗျာကဏ္ဍတွေ ပါဝင်ခဲ့ပါတယ်။
ပထမဦးဆုံး မဂ္ဂဇင်းဖြန့်တဲ့နေ့မှာ ကျွန်တော်တို့အဖွဲ့ကို ရုပ်ရှင်တေးကဗျာမဂ္ဂဇင်းထုတ်ဝေသူ အဝကျွန်း ဦးချစ်မောင်က ကူညီပေးပါတယ်။
အတွင်းဖလင်တွေကိုလည်း ရုပ်ရှင်တေးကဗျာမဂ္ဂဇင်းတိုက်က ကိုအေးကျော် ကူညီခဲ့ပါတယ်။
အစစအရာရာအဆင်ပြေနေပေမယ့် စာပေစိစစ်ရေးကိုတင်တဲ့အခါ ထုံးစံအတိုင်းစိတ်ညစ်စရာတွေ၊ စိတ်ပျက်စရာတွေနဲ့ အမြဲကြုံတွေ့နေရတယ်။ စာပေစိစစ်ရေးကအများဆုံး ဂရုတစိုက်နဲ့စောင့်ကြည့် တာကတော့ ကျွန်တော်တို့မဂ္ဂဇင်းမှာပါတဲ့ကဗျာတွေပါပဲ။ ကျွန်တော်စာပေစိစစ်ရေးရုံးကိုသွားတဲ့နေ့ဆိုရင် မဂ္ဂဇင်းတိုက်မှာကျန်ခဲ့တဲ့ ကိုစိမ်းနီဟာ ရင်မပြီးစောင့်နေရတာပါ။ ကျွန်တော်ပြန်ရောက်ရင်လည်း ပြုံးသွားရတဲ့နေ့မရှိခဲ့ပါဘူး။
၈၈ အရေးတော်ပုံမှာ မြန်မာနိုင်ငံတိုက်ပွဲဝင်ကဗျာဆရာသမဂ္ဂရဲ့ဥက္ကဋ္ဌ အဖြစ်ဆောင်ရွက်ခဲ့တဲ့ ကိုစိမ်းနီထုတ်တဲ့မဂ္ဂဇင်းဆိုပြီး စာပေစစ်ရေးက ပြူးပြဲနေအောင် စောင့်ကြည့်ခံခဲ့ရပါတယ်။
အတော်ပင်ပန်းခက်ခဲစွာ ရုန်းကန်ခဲ့ရပါတယ်။
ကိုစိမ်းနီကတော့ဇွဲမလျော့ဘဲထုတ်ဝေခဲ့တာပါ။ မဂ္ဂဇင်းကလည်း လတိုင်းအရှုံးပေါ်ခဲ့တယ်။
ကျွန်တော့်အနေနဲ့ထွက်ငွေနဲ့ဝင်ငွေစာရင်းစာအုပ်နှစ်မျိုးလုပ်ခဲ့ရတယ်။ ကိုစိမ်းနီအမျိုးသမီးကိုပြဖို့နဲ့ အမှန်တကယ် ကုန်ကျနေတဲ့စာရင်းစာအုပ်နှစ်မျိုးပါ။
နောက်လမ်း ၅၀ ကနေ ၃၃ လမ်းက ထပ်ခိုးလေးကို မဂ္ဂဇင်းတိုက်ပြောင်းရွှေ့ခဲ့တယ်။ လေထန်ကုန်းဘေးက အခန်းပါ။ အဲဒီထပ်ခိုးလေးပေါ်မှာ စာပေလောကက လူစုံလာကြတယ်။ လာသမျှလူတွေကို လေထန်ကုန်းကလက်ဖက်ရည်မှာ တိုက်တယ်။ ညနေကိုစိမ်းနီလာရင်မှာသောက်ထားတဲ့ လက်ဖက်ရည်ဖိုးရှင်းရတာတင် မနည်းပါဘူး။ ညနေစောင်းလို့ရှိရင် လေထန်ကုန်းက ကိုစိမ်းနီကိုစောင့်နေတဲ့လူတွေကို အကုန်ပိုက်ဆံလျှောက်ပေးတယ်။
မဂ္ဂဇင်းအတွက်ပုံမှန်လစာသဘောမျိုးပေးထားရတဲ့လူက ကိုမြမြင့်မိုရ်၊ ကိုတင်ထွဏ်း၊ ကိုသန်းဋ္ဌေးမောင်နဲ့ ကျွန်တော်ပဲရှိပါတယ်။ အမြဲကူညီနေတဲ့ကိုဇော်မျိုးသက်နဲ့စောဒေဝေါတို့ကိုတော့ လိုအပ်သလိုပေးပါတယ်။ အဲဒီအချိန် ကိုစိမ်းနီအိမ်မှာတည်းခိုနေတဲ့ အောင်ဘညိုနဲ့ ကိုတောက်(နေဇော်နိုင်)တို့ကိုလည်း တာဝန်ယူ ထားရပါတယ်။
နောက်ပြီး ငါတတ်နိုင်တုန်း မင်းတို့ကဗျာစာအုပ်ထုတ်ကြဆိုပြီး ထုတ်ခိုင်းတယ်။ အဲဒီမှာ ပထမဦးဆုံး ကိုမောင်မောက်ရဲ့ကဗျာစာအုပ်ကို စထုတ်တယ်။ ကိုမောင်မောက်ရဲ့ကဗျာစာအုပ်ကို ကျွန်တော်ပဲဖြန့်ချိရေး တာဝန်ယူရတယ်။ ကိုမောင်မောက်ကဗျာစာအုပ်ကရောင်းရပါတယ်။ နောက်ထုတ်မယ့်ကဗျာစာအုပ်တွေက ကိုသင်းခိုင်၊ ကိုမြင့်ဦးဦးမြင့်တို့ ကဗျာစာအုပ်တွေပေါ့။
နယ်ကလာတဲ့စာပေသမားတိုင်းက အကူအညီတောင်းတာအမြဲပေးတတ်ပါတယ်။ စာပေလောကကြီးတခုလုံးကို ကိုစိမ်းနီနဲ့ကိုမင်းသစ်တို့နှစ်ယောက်က ထမ်းပိုးထားတယ်လို့ စာပေသမားတိုင်းကပြောတတ်ပါတယ်။
ကျွန်တော်တို့ပိတောက်ပွင့်သစ်မဂ္ဂဇင်းတိုက်မှာ ဦးမြတ်လေးက အမြဲလိုလိုရှိနေတတ်တယ်။ မဂ္ဂဇင်း အတွက်လည်း နိုင်ငံတကာရုပ်ရှင်မင်းသားကြီးတွေအကြောင်း အမြဲရေးပေးတယ်။
ဆရာကိုရဲ(သစ္စာနီ)၊ မြတ်သစ်၊ မောင်သင်းခိုင်၊ ကိုအောင်ပွင့်၊ ကိုအောင်ဝေးတို့က ပုံမှန်လာကြတယ်။
ကျွန်တော်တို့က ကိုမြမြင့်မိုရ်ကို မဂ္ဂဇင်းကြိုဆိုဧည့်ခံရေးကော်မတီဥက္ကဋ္ဌဆိုပြီးခေါ်ကြတယ်။ လူအစည်ကားဆုံးမဂ္ဂဇင်းတိုက်ကိုပြပါဆိုရင် ကျွန်တော်တို့မဂ္ဂဇင်းတိုက်ပါပဲ။
အပျော်ဆုံးသူကိုပြပါဆိုရင် အကိုစိမ်းနီကိုပြရပါလိမ့်မယ်။ ပိုဆိုးတာက ဒေါ်ခင်ဆွေဦးရဲ့စပယ်ဖြူမဂ္ဂဇင်းကိုပြန်ထုတ်ကြမယ်ဆိုပြီး ကျွန်တော်တို့ပိတောက်ပွင့်သစ် တိုက်မှာလာထိုင်တယ်။ အယ်ဒီတာတွေက ကိုမင်းသစ်၊ ကိုဟိန်းလတ်၊ ကိုလှထွန်း(မြန်မာစာ)တို့သုံးယောက်။
ထပ်ခိုးအခန်းကျဉ်းလေးမှာ အနောက်ဖက်အခန်းက အကိုတင်ထွဏ်းနဲ့ သန်းဋ္ဌေးမောင်တို့ထိုင်တဲ့စားပွဲနှစ်လုံး၊ အရှေ့ခန်းမှာက ကိုမြမြင့်မိုရ်အတွက်စားပွဲတစ်လုံး၊ ကျွန်တော့်အတွက် စားပွဲတစ်လုံး။ နောက်ဆက်တီခုံတွေ။
စပယ်ဖြူမဂ္ဂဇင်းအတွက်စားပွဲမရှိဘူး။ ကျွန်တော့်ကိုစပယ်ဖြူမဂ္ဂဇင်းရဲ့အုပ်ချုပ်သူခန့်ကြတယ်။ မဂ္ဂဇင်းအခန်းလေးထဲမှာလူတွေပြည့်ကျပ်နေတယ်။ ဒါကိုပဲမောင်စိမ်းနီကတော့ ပျော်နေတာပေါ့။ ပိတောက်ပွင့်သစ်မဂ္ဂဇင်းကတော့ လတိုင်းရှုံးနေတာပဲ။
ပြည်သူချစ်လျှင် ကမ္ဗည်းတင်မည်ဆိုပေမယ့်
မဂ္ဂဇင်းဖြန့်ရင်စာအုပ်ဆိုင်တိုင်းကမယူချင်ကြပါဘူး။အဲဒီအချိန်ကတည်းကလူတွေစာမဖတ်ကြတာသိသာနေပါတယ်။
ကဗျာမဂ္ဂဇင်းဆိုရင်ပြည်သူတွေစိတ်မဝင်စားခဲ့ကြပါဘူး။
စာပေနယ်ကလူတွေကတော့ စာပေလောကကို နိုင်သလောက်ထမ်းခဲ့တဲ့မောင်စိမ်းနီကိုချစ်ခဲ့ကြပါတယ်။
ပိတောက်ပွင့်သစ်မဂ္ဂဇင်းကိုလည်း အရှုံးခံပြီး ထုတ်ခဲ့ပါတယ်။ စာပေတာဝန်ကိုကျေနိုင်သလောက်ကျေအောင်ဆောင်ရွက်မယ်ဆိုတဲ့စိတ်ဓာတ်နဲ့ပါ။
ဒါပေမဲ့ ပိတောက်ပွင့်သစ်ကဗျာမဂ္ဂဇင်းဟာ အမှတ် ၇ မှာ ရပ်လိုက်ရပါတယ်။ ကဗျာဆရာ၊ တက္ကသိုလ် ဆရာတစ်ဦးဖြစ်တဲ့ ကိုမင်းသိုက်မွန်က ကျွန်တော့်ကိုတိုးတိုးခေါ်ပြောပါတယ်။ မင်းတို့မဂ္ဂဇင်းကို စစ်ထောက်လှမ်းရေးက လိုက်စုံစမ်းနေပြီ။ အယ်ဒီတာအဖွဲ့ကိုဖမ်းနိုင်တယ်တဲ့။ သူ့တပည့် တယောက် ကထောက်လှမ်းရေးတပ်မှူးရဲ့သားတဲ့။ သူ့ကိုသတင်းပေးလိုက်တာတဲ့။
ပိတောက်ပွင့်သစ်မဂ္ဂဇင်းက စစ်အစိုးရကိုဆန့်ကျင်နေတဲ့မဂ္ဂဇင်းလို့ ယူဆနေတယ်တဲ့။
ဒီသတင်းကို ကျွန်တော် ကိုစိမ်းနီကိုပြောပြလိုက်တယ်။ အယ်ဒီတာအဖွဲ့တိုင်ပင်ကြတော့ ဆက်လုပ်ချင်ကြတယ်။ ကျွန်တော်က မဂ္ဂဇင်းက အရမ်းအရှုံးပေါ်နေပြီလို့ပြောပြလိုက်တော့ အားလုံး တိတ်ဆိတ်နေတယ်။ ရပ်လိုက်ပါတော့အကို ဆိုပြီးကျွန်တော်ပြောလိုက်တယ်။ ကိုစိမ်းနီငိုနေတယ်။
ပိတောက်ပွင့်ခဲ့ပေမယ့် မသစ်နိုင်သေးတဲ့ခေတ်ပါ။ ခုလည်း ပိတောက်တွေတော့ ပွင့်နေဦးမှာပါ။ ဆင်းရဲမှုတွေနဲ့ရုန်းကန်နေရတဲ့ပြည်သူတွေ စာမဖတ်နိုင်သေးတော့ စာပေခေတ်က မသစ်နိုင်သေးပါဘူး။။ ပိတောက်ပွင့်တွေမြင်တွေ့ရတာကိုပဲကျေနပ်ပါတော့အကို။


မြတ်လှိုင်း

အတွဲ(၁၃)၊ မှတ်(၆)၊ ၉-၁၅၊ ဖေဖော်ဝါရီ ၂၀၁၇ -ရန်ကုန်တိုင်းမ် ဂျာနယ်ပါ ဆောင်းပါးကို စာရေးသူ၏ခွင့်ပြုချက်အရ ပြန်လည်ဖော်ပြပါသည်။

သစ်ခက်သံလွင်