Tuesday, November 29, 2016

k

သစ်ခက်သံလွင် စာပေနှင့် သဘောတရား။ မောင်သာမည၏ "ရှင်ဥက္ကဋ္ဌ (သို့ မဟုတ်) တော်လှန်သောပညာရှင်"





ရှင်ဥက္ကဋ္ဌ (သို့ မဟုတ်) တော်လှန်သောပညာရှင်

မောင်သာမည



( အသက်၂၀ ကျော်မှာ ရှင်ဥက္ကဋ္ဌကို လေ့လာဖြစ်တယ်။ စာရေးသားပုံ တင်ပြပုံကို သဘောကျ တယ်။ ရဲရင့်တာ ဖောက်ထွက်ရဲတာကို သဘောကျတယ်။ စည်းစိမ် အာဏာကို မမက်မောတာ ပညာကို မြတ်နိုးတာကို သဘောကျ တယ်။ လူသေလူဖြစ်ကျမ်းမှာ ဘာသာရေးကို ဝေဖန်တဲ့ အရေးအသားတွေ သဘောကျတယ်။ မောင်ဇေယျာစီစဉ်တဲ့ ရှင်ဥက္ကဋ္ဌ စာပေါင်းစု ထွက်တော့ ဧရာဝတီမဂ္ဂဇင်းမှာ စာအုပ်ဝေဖန်ချက် ရေးဖြစ်တယ်။ လူသေလူဖြစ် လေ့လာချက်ရေးဖို့  ဆန္ဒ ရှိပေမဲ့ ယခုထက်တိုင် မစဖြစ်သေး။ လူသေလူဖြစ်က ဒါဝင်ရဲ့ ကျမ်းတွေ၊ သီယိုဆီဖီအယူ အဆတွေ၊ အင်ဂါဆိုရဲ့ဘုရားမဲ့ အယူအဆတွေ ကို ရောသမမွှေထားတယ်လို့  မြင်မိပါတယ်။ ဒီစာအုပ်တွေကို ပြန်ဖတ်ပြန်ညွှန်းရမှာဖြစ်လို့  အချိန်တော့ ယူရလိမ့်မယ်။ ဧရာဝတီ မှာ ရေးဖြစ်တဲ့စာကို ပြန်တင်ပေးလိုက်ပါတယ်။ မဖတ်ရသေးသူတွေ ဖတ်ဖို့ပါပဲ။ )
.... 


၁၉၅၉ ခုနှစ်တွင် မြန်မာဗုဒ္ဓဘာသာလောကကို အကြီးအကျယ်ရိုက်ခတ် လှုပ်ရှားသွားစေသည့် စာအုပ် တအုပ် ထွက်ပေါ်ခဲ့သည်။ ယင်းစာအုပ်ကြောင့် စာအုပ်ရေးသူ၊ ထုတ်ဝေသူနှင့် ပုံနှိပ်သူတို့မှာ ဖမ်းဆီး ထိန်းသိမ်းခြင်း ခံရသည်။ တရားစွဲခံရသည်။ လေးနှစ်လောက်ကြာအောင် တရား ရင်ဆိုင်ရသည်။ စာအုပ်ရေးသူမှာ ဗုဒ္ဓ ဘာသာဝင် ရဟန်းတပါး ဖြစ်လေရာ စာအုပ်ပါအယူ အဆကို သဘောမကျသော အခြားရဟန်းတချို့၏ ဆန့်ကျင်မှုတို့လည်း ပေါ်ပေါက်ခဲ့သည်။
ဗုဒ္ဓဘာသာတွင် အကြီးမားဆုံးဆန့်ကျင်မှုဟု ဆိုရမည့် ပကာသနိယ ကံဆောင်ပွဲများဖြင့် ဆန့်ကျင်သည် အထိ ရှိခဲ့သည်။ ယင်းစာအုပ်၏အမည်မှာ “လူသေလူဖြစ်”။ ယင်းစာအုပ်ကိုရေးသူမှာ ပဉ္စမပေပင်အဖြစ် နာမည်ကျော်သော တောင်တွင်းကြီး နတ်မှီတောရဆရာတော် ရှင်ဥက္ကဋ္ဌ ဖြစ်သည်။
လူသေလူဖြစ်ဟု အမည်ပေးထားသည့် ယင်းစာအုပ်က ဖော်ကျူးသည့်အယူအဆကို စာရေးသူ ရှင်ဥက္ကဋ္ဌက စာတကြောင်းတည်းဖြင့် အနှစ်ချုပ်ထားသည်။ “ လူသားဆိုတဲ့ သတ္တ၀ါ သေဆုံးပြီး သွားတဲ့နောက်အခါ၌ အကယ်စင်စစ် ဖြစ်ခွင့်ဖြစ်စရာ ဖြစ်ဖို့အလားအလာများရှိသေးခဲ့လျှင် လူမှတပါး အခြားဘာမျှ ဖြစ်စရာလည်း မရှိ” ဟူလို။
ယင်းစာကြောင်းက မိရိုးဖလာဗုဒ္ဓဘာသာဝင်များ အပေါ် ဦးနှောက် မုန်တိုင်းကြီးတခု တိုက်ခတ်သကဲ့သို့ တုံလှုပ်ချောက်ချားစေခဲ့သည်မှာ ထူးလျက်နှင့် မဆန်းဟု ဆိုရမည်။ အဘယ်ကြောင့်ဆိုသော် လူသေလူဖြစ် အယူအဆသည် မိရိုးဖလာဗုဒ္ဓဘာသာ၏ မဏ္ဍိုင်ဖြစ်သော “သုံဆယ့်တဘုံ အယူအဆ” နှင့် လုံးဝခြားနား ဆန့်ကျင်သောကြောင့် ဖြစ်ပါသည်။
သုံးဆယ့်တဘုံအယူအဆအရမှာ“ လူသေလျှင် သူပြုခဲ့သည့် ကံအလျောက် ငရဲ တိရစ္ဆာန် ပြိတ္တာ အသူရကာယ် စသည့်ဘဝဆိုးများသို့ ဖြစ်စေ၊ လူ နတ် ဗြဟ္မာ စသော ဘဝကောင်းများသို့ ဖြစ်စေ သုံးဆယ်တဘုံအတွင်းက ဘုံတခုဆီသို့ ရောက်လိမ့်မည်” ဟူ၏။

လူသေလူဖြစ်ကျမ်းပြုဆရာ ရှင်ဥက္ကဋ္ဌက ယင်းသုံးဆယ့်တဘုံ ယုံကြည်မှုကို လူသားတို့၏အကြောက်နှင့် အမျှော်များ တိုးပွားရှင်သန်အောင် မြေဆီလောင်းပေးနေသည့်အရာအဖြစ်မြင်နေခဲ့ရာ လူသေလူဖြစ်စာအုပ်   ဖြင့် ကုစားပေးခဲ့ခြင်းဟု ယူဆရပေသည်။ ယင်းသုို့ကုစားရာတွင် ဆရာတော် ရှင်ဥက္ကဋ္ဌသည် ခေတ်သစ် သိပ္ဗံတွေ့ရှိချက်တခုဖြစ်သော ဒါဝင် ( Darwin )၏ ဆင့်ကဲဖြစ်စဉ်သဘောတရား ( Theory of Evolution ) ကိုလည်းကောင်း၊ ဖန်ဆင်းရှင် တန်ခိုးရှင်ကို လက်သင့် မခံသည့် ဘုရားမဲ့ဝါဒ ( Atheism ) ကို လည်းကောင်း၊ ဗုဒ္ဓ ဟောကြားခဲ့သည့် တရားကိုလည်းကောင်း အခိုင်အမာ ကိုးကားခဲ့သည်။
လူသေလူဖြစ်စာအုပ်တွင် ဒါဝင်၏ ဆင့်ကဲဖြစ်စဉ်သဘောတရားကို အသေးစိတ်ထည့်သွင်း ဖော်ပြထား သည်မှာ မြန်မာနိုင်ငံအတွင်းသို့ ကိုလိုနီစနစ်နှင့်အတူ ရောက်ရှိကျယ်ပြန့်လာသည့် ခရစ်ယာန် ဘာသာရေး ကို စိန်ခေါ်လိုက်ခြင်း ဖြစ်ပေသည်။ ဒါဝင်၏ ဆင့်ကဲဖြစ်စဉ်သဘောတရားက အနောက်တိုင်းခရစ်ယာန် ဘာသာ၏ ဖန်ဆင်းရှင်ယုံကြည်မှုအား အခြေကကိုင်လှုပ်ခဲ့သည်ကို ဆရာတော်ရှင်ဥက္ကဋ္ဌ ကောင်းကောင်း သိရှိပုံရသည်။ ဆရာတော်သည် နယ်ချဲ့ဝါဒကိုလက်မခံသကဲ့သို့  နယ်ချဲ့ဝါဒနှင့်အတူပါလာသော ခရစ်ယာန် ဘာသာကိုလည်း လက်သင့်ခံပုံမရ။
ယင်းအချက်မှာ ကျောက်ကွင်းအရေးတော်ပုံ ဖြစ်ရပ်ဖြင့် ထင်ရှားသည်။
ကျောက်ကွင်း အရေးတော်ပုံဖြစ်ရပ်မှာ ဗုဒ္ဓဘာသာဝင်ရဟန်းတပါးက ခရစ်ယာန်ဘာသာအပေါ် ပြတ်ပြတ် သားသား ဝေဖန်သုံးသပ်ပြခဲ့သည့်ဖြစ်ရပ်ဟု ဆိုနိုင်သည်။
ဒါဝင်၏ဆင့်ကဲဖြစ်စဉ်သဘောတရားကဲ့သို့ပင် ဖန်ဆင်းရှင်အယူဝါဒကို ကိုင်လှုပ်ခဲ့သော အတွေးအခေါ် တရပ်ကို ရောဘတ်အင်ဂါဆို ( Robert Ingersoll) အမည်ရှိ တွေးခေါ်ရှင်က ဒါဝင်နှင့် မရှေးမနှောင်း ပင် ဟောပြောတင်ပြခဲ့သည်။ ဘာသာရေးသမားတို့က လူတို့၏ ဦးနှောက်အတွင်း သို့ ဖန်ဆင်းရှင် God ကိုလည်းကောင်း၊ ငရဲဘုံနှင့် နတ်ဘုံများကိုလည်းကောင်း သွတ်သွင်းပြီး အကြောက်အမျှော်တိုးပွားအောင် လုပ်ကာ စီးပွားရှာနေသည်ဟု ဆရာကြီး အင်ဂါဆိုက ပြစ်ပြစ် နှစ်နှစ်ဝေဖန်ခဲ့ပါသည်။ အင်ဂါဆို၏ ဟောပြော ချက်များမှ ကောက်နုတ်ဘာသာပြန်ပြီး လူသေ လူဖြစ်ကျမ်းတွင် ဖော်ပြထားလေရာ ဆရာတော်၏ ပြောင်မြောက်လှသော ဘာသာပြန် အစွမ်းကြောင့် ဘာသာပြန်ဟုပင် မသိကြဘဲ ဆရာတော် ၏ ကိုယ်ပိုင်အယူအဆများအဖြစ် စွပ်စွဲကြသည်မှာ အံ့သြစရာ ကောင်းလှသည်။
( အင်ဂါဆို၏ ဟောပြောချက်တချို့ ကို ဆရာပါရဂူက “ တော်လှန်သော အတွေးအခေါ်” အမည်ဖြင့် ဘာသာပြန်ထုတ်ဝေခဲ့ဖူးသည်။ ယင်းစာအုပ် လည်း ထွက်ပြီးမှ အပိတ်ခံခဲ့ရပါသည်။)
ဒါဝင်၏ဆင့်ကဲဖြစ်စဉ်သဘောတရားကိုလည်းကောင်း၊ အင်ဂါဆို၏ ဘုရားမဲ့အတွေးအခေါ်ကို လည်းကောင်း ကြားဖူးနားဝမရှိသည့် သူတို့အတွက်မှာ လူသေလူဖြစ်စာအုပ်သည် လုံးဝအသစ် အဆန်း ဖြစ်နေပေလိမ့် မည်။
ဖန်ဆင်းရှင်အယူဝါဒကိုလည်းကောင်း၊ သုံးဆယ့်တဘုံ အယူဝါဒ ကိုလည်းကောင်း စွဲမြဲသက်ဝင်နေသူ တို့ အတွက်မှာလည်း အလွန်အန္တရာယ်ကြီးသော မိစ္ဆာအယူဝါဒ ဖြစ်နေပေလိမ့်မည်။ ဤသို့ဖြင့် ဆရာတော် ရှင်ဥက္ကဋ္ဌကို ပကာသနိယကံဆောင်ကာ ခါးခါးသည်းသည်း ဆန့်ကျင်ခဲ့ခြင်း ဖြစ်မည်။ 

သို့သော် လူသေလူဖြစ်အယူအဆကို တင်ပြရန် ပန်ကြားခဲ့သူသည် အမျိုးသားခေါင်းဆောင်ကြီး ဗိုလ်ချုပ်အောင်ဆန်းဖြစ်သည်ဟူသော ပြောဆိုချက်များရှိခဲ့လေရာ ကျမ်းပြုဆရာ၏ ရည်ရွယ်ချက် တွင် အမျိုးသားရေးနှင့် နိုင်ငံရေးလည်း ပါဝင်ခဲ့မည်လားဟု စဉ်းစားစရာ ရှိသည်။ လွန်ခဲ့သည့် နှစ်ပေါင်း လေးဆယ်ကျော်က အိုးဝေဂျာနယ်တွင် စတင်ဖော်ပြခဲ့သော စာရေးဆရာ မင်းအောင် ရေးသားသည့် ဆောင်းပါးတွင် ဗိုလ်ချုပ်အောင်ဆန်းက မြန်မာ့တပ်မတော်သားများ သေရဲ တိုက်ရဲ သည့် စိတ်ဓာတ်ရှိစေရန် ယင်းလူသေလူဖြစ်အယူအဆကို ကျမ်းတစောင်ပြုစုပေးပါဟု ဆရာတော် ရှင်ဥက္ကဋ္ဌအား ပန်ကြားခဲ့သည်ဟု ရေးသားထားသည်။
ဆရာတော်ကိုယ်တိုင်ရေးသားသည့် “ လူသေလူဖြစ်စစ်တန်းနှင့် ထောင်ကျ မှတ်တမ်း” စာမူတွင် “ ကွယ်လွန်သူအမျိုးသားခေါင်းဆောင်ကြီး ဗုိုလ်ချုပ်အောင်ဆန်းဟာ ဗမာ့တော်လှန်ရေး တပ်မတော် ကြီးကို တည် ထောင်ဖွဲ့ စည်းခဲ့တယ်မဟုတ်လား - - - အဲဒီတပ်မတော်အတွက် တိကျပြတ်သားတဲ့ အဘိဓမ္မာ ကျောထောက်နောက်ခံရှိတဲ့ Slogan (၀ါ) ကြွေးကြော်သံတခု လိုနေတာ တွေ့ရတယ်။ အဲဒါကြောင့် လူသေလူဖြစ် အဘိဓမ္မာကျောထောက်နောက်ခံရှိတဲ့ လူသေလူဖြစ်၊ လူဖြစ်လူသေ၊ တိုးလိုက်ဟေ တိုက်လိုက်ဟေ ဆိုတဲ့ ဆလိုဂန်ကို ဖော်ထုတ်လိုက်ခြင်း ဖြစ်တယ် ” ဟု ဖော်ပြ ထားပါသည်။
မည်သို့ဖြစ်စေ လူသေလူဖြစ်စာအုပ်ကို ရေးသားခဲ့သည့် ဆရာတော် ရှင်ဥက္ကဋ္ဌသည်ကား သူ အသက်ရှင်နေစဉ်ကာလတွင် ပကာသနိယကံဖြင့် အကြဉ်ခံခဲ့ရသကဲ့သို့  ပျံလွန်တော် မူပြီး နောက်တွင်လည်း သူ၏လူသေလူဖြစ်အယူအဆကို အဓမ္မဝါဒအဖြစ် သတ်မှတ်ခံခဲ့ရသည်။
( ဤနေရာတွင် အဓမ္မဝါဒ ဆိုသည်မှာ ထေရ၀ါဒဗုဒ္ဓဘာသာနှင့် ဆန့်ကျင်သည်ဟူသောအနက်ကိုသာ ရည် ညွှန်းပါသည်။ သတ်မှတ်သူများမှာ ထေရဝါဒဗုဒ္ဓဘာသာ၏သံဃနာယကအဖွဲ့ဝင်များသာ ဖြစ်သောကြောင့် ပင်။ မူရင်းမူလဗုဒ္ဓဘာသာနှင့် ခြားနားသည်ဟူသော အနက် မရှိပါ။ ထေရဝါဒသည် ဂိုဏ်းခွဲတခုသာဖြစ် သည်။ ထေရဝါဒတွင် ဟိန္ဒူ အယူဝါဒများစွာပါဝင်နေသည်မှာ ထင်ရှားသည်။ အဓမ္မဆိုလျှင် မမှန်သော အရာများဟု မမှတ်သင့်။ ဘာသာရေးအယူအဆအများစုမှာ မှန်မမှန် သက်သေပြသောအရာများမဟုတ်ဘဲ ယုံကြည်မှုသက်သက်မျှသာ ဖြစ်နေသည်က များပါသည်။)

ဆရာတော်ရှင်ဥက္ကဋ္ဌသည်ကား ယင်းကဲ့သို့သော ဆန့်ကျင်ဝေဖန်မှုများကို ကြိုတင်မျှော်လင့်ပြီးသား ဖြစ်ပုံရ သည်။ ဆရာတော်၏ဘဝတလျောက်လုံး ယင်းကဲ့သို့ ဆန့် ကျင်ခံရမှုများမှာ အများအပြားရှိခဲ့ သည်။
သိသာသောဖြစ်ရပ်တခုမှာ ဝန်ကြီးချုပ်ဟောင်းဦးနုဦးဆောင်ခဲ့သည့် ဆဋ္ဌသံဂါယနာတင်ပွဲတွင် ဖြစ်သည်။ ဆရာတော်၏အမြင်တွင် သံဂါယနာတင်ပွဲဆိုသည်မှာ မှတ်တမ်းတင်ထားသည့် ဗုဒ္ဓ၏ တရားတော်များကိုပြန်လည်စိစစ်ပြီး တည့်မတ်အောင် ပြင်ဆင်ရေးဖြစ်သည်။
ဗုဒ္ဓခေတ်က နှုတ်ဖြင့် ဆောင်ထားခဲ့သည့် တရား များကို ကျောက်ထက် အက္ခရာဖြင့်လည်းကောင်း၊ စာပေ ကျမ်းစာဖြင့် လည်း မှတ်တမ်းတင်ကြရာ တွင် နှစ်ကာလကြာရှည်သည်နှင့်အမျှ တိမ်းစောင်းသည်များလည်း ရှိသကဲ့သို့ တရားမသိ တရားမရှိသူများက လိုသလို ဖြည့်စွက်နုတ်ပယ်ပြုပြင်သည်များရှိသည်ဟု ဆရာတော်က ယူဆသည်။ နငယ် အမြီးတိုသည်ကို ရှည်အောင် လုပ်ပေးရုံထက်မကသော သာသနာရေး ဆိုင်ရာ မဟာတာဝန်ကြီးအဖြစ် ယူဆသည်။
သို့သော် ဆဋ္ဌသံဂါယနာတင်ပွဲတွင် ပါဝင်ဦးဆောင်သူအများစုမှာ မင်းတုန်းမင်းကြီးတင်ခဲ့သည့် ပဉ္စ္စမ သံဂါယနာမူအတိုင်းပင် ပုံနှိပ်မှတ်တမ်းတင်လိုရာ ဆရာတော်ရှင်ဥက္ကဋ္ဌနှင့် လုံးဝသဘောကွဲ လွဲခဲ့ ပုံရသည်။ ဆရာတော်က သံဂါယနာအစည်းအဝေးများကိုမတက်ဘဲ သပိတ်မှောက်ခဲ့ပြီး အစာငတ်ခံ ဆန္ဒပြသည် အထိ ဖြစ်ခဲ့သည်ဟု ဆိုသည်။

နောက်ထပ်ဖြစ်ရပ်တခုမှာ ဖက်ဆစ်ဂျပန်များလွှမ်းမိုးခဲ့သည့်ကာလတွင် ညီညွတ်သောသာသနာ့ တပ်ဦးဖြစ်မြောက်ရေးအတွက် ကြိုးပမ်းသည့်အတွက် ဖက်ဆစ်တို့၏ ဖမ်းဆီးမှုကိုခံရခြင်း ဖြစ်သည်။
စစ်ဦးဘီလူးခေတ်ဆိုးကြီးအတွင်း ဆရာတော်၏ကြိုးပမ်းမှုသည် ဖက်ဆစ်တို့အတွက် အကြီးမားဆုံး ရာဇ၀တ်မှုကြီး ဖြစ်လေရာ သေဒဏ်ပေးခံရတော့သည်။
သို့သော် ဆရာတော်နည်းတူ တော်လှန်သောဘာသာရေးပညာရှင် တဦးဖြစ်သူ ရှင်အာဒိစ္စဝံသ၏ ကြိုးပမ်းမှုဖြင့် သေဒဏ်ကလွတ်ခဲ့သည်။ (ရှင်အာဒိစ္စဝံသမှာ ရဟန်းများ အင်္ဂလိပ်စာသင်ရေးနှင့် အမျိုးသမီး များကို ဘိက္ခုနီဝတ်ခွင့်ပြုရေးအတွက် ကြိုးပမ်းမှုကြောင့် ပကာသနိယကံဖြင့် ရှင်ဥက္ကဋ္ဌအရင် အကြဉ်ခံခဲ့ရ သူ ဖြစ်ပါသည်)။
သေဒဏ်ကိုငံ့လင့်နေသောရှင်ဥက္ကဋ္ဌထံသို့ပေးပို့လိုက်သည့် ရှင်အာဒိစ္စဝံသ၏စာတစောင်မှာ တော် လှန်သောပညာရှင်တို့၏ ဘဝခံယူချက်ကို ရည်ညွှန်း နေပါသည်။ 

“ ဂျင်နရယ်အီဒါးထံ ရောက်အောင်သွား၍ သေဒဏ်ကိုဖျက်သိမ်းစေခဲ့ပြီ။ ကျန်တဲ့အပြစ်ဒဏ်ကိုတော့ ဗဟုသုတ ရအောင် ခံပါ“ ဟူလို။
ပိဋကတ်သုံးပုံကို ထုံးလိုချေ ရေလိုနှောက်နိုင်သော၊ ဗုဒ္ဓဘာသာကိုသာမက ဟိန္ဒူဘာသာ၊ ခရစ်ယာန် ဘာသာ ၊ အစ္စလာမ်ဘာသာ များကိုပါ နက်နက်နဲနဲ လေ့လာသင်ယူထားသော၊ မြန်မာ၊အင်္ဂလိပ်၊ဟိန္ဒူ၊ အာရဗီ၊ ပါဠိ၊ သက္ကဋ ၊ ဘင်္ဂါလီ စသည့် ဘာသာစကားများကို ကျွမ်းကျွမ်းကျင်ကျင် တတ်မြောက် ထားသော၊ အင်္ဂလိပ်စာ ထွန်တုံးပေါ်ရောက်ရေး ရည်ရွယ်ချက်ဖြင့် ဗုဒ္ဓသာသနာပြု အမျိုးသား အထက်တန်း ကျောင်းကြီး ကို ထူထောင်ပြီး ကိုယ်တိုင်ကျောင်းအုပ်လုပ်ခဲ့သော၊ ကျမ်းစာအုပ်ပေါင်းများစွာကိုရေးသားပြုစု ခဲ့သော တောင်တွင်းကြီး နတ်မှီတောရဆရာတော် ရှင်ဥက္ကဋ္ဌသည် တော်လှန်သော ပညာရှင်တို့ တွေ့ကြုံရ သည့်လောကဓံအမျိုးမျိုးကို အပြုံးမပျက် ဖြတ်သန်းကာ ၁၉၇၈ ခုနှစ် နိုဝင်ဘာလ ၂၇ တွင် ပျံလွန်သွားခဲ့ သည်။
ဆရာတော်သည် ဘာသာရေး၊သာသနာရေး၊ အမျိုးသားရေး၊ နိုင်ငံရေး၊ ပညာရေး အစစတွင် ကိုယ်တိုင် ဆင်းရဲဒုက္ခခံကာ ပြုပြင်ပြောင်းလဲရေးကို အားစိုက်ခွန်စိုက် ဆောင်ရွက်ခဲ့ပါသည်။ နိုင်ငံနှင့်ချီသော၊ တမျိုးသားလုံးနှင့်ချီသော ပြုပြင်ပြောင်းလဲရေးလုပ်ငန်းမျိုးသည် စကားလှရုံ ပါးစပ်ပြောလောက်နှင့် လည်းကောင်း၊ တော်ရုံ စွန့်လွှတ်မှုနှင့်လည်းကောင်း မဖြစ်နိုင်ပုံကို ဆောင်းပါးရေး၍ သတိပေးခဲ့ သည်။
ယင်းသတိပေးစကားသည်ကား “ပြုပြင်ပြောင်းလဲရာ၌ တကယ့် သံမဏိခေါင်းဆောင် လိုချေသည်။ ယခုလက်ရှိ အပျော့စား၊ ဗန္ဓတ်ကပြား၊ ယောကျားမမည်၊ မိန်းမ မမည်၊ ပရိယာယ်များလှတဲ့၊ မနုဿီဟ ဖင်နှစ်ခွ၊ ခေါင်းဆောင်မျိုးဖြင့်ကား၊ ဘာမျှ အကျိုးမထင်ဘဲ၊ သောင်ပြင်ရေကျ၊ တထေဝ ဖြစ်ပေလိမ့် မည်” 
ဟူလို။ ။

 မောင်သာမည
စာရေးသူ၏ ခွင့်ပြုချက်အရ ဖော်ပြသည်။
သစ်ခက်သံလွင်