သစ်ခက်သံလွင် ကဗျာစင်မြင့်၊ မောင်အောင်ပွင့်၊ ရိုးမြေ၊ ခင်လွန်းတို့၏ကဗျာများ

တော ဘောလုံးကွင်း

www.metmuseum.org

ဘောလုံးသမားအားလုံး

တအားကြုံးကြုံးကန်ကြ

ဘောလုံးထက် ရှေ့ကို

လူတွေ လွန်လွန်သွား

ဘောလုံးတခြား လူတခြား

လွဲလွဲသွား

တဂိုးမှ မသွင်းနိုင်ကြသေးဘူး

အခုထိ။ ။

မောင်အောင်ပွင့်

၁၂. ၅. ၁၉၉၅

….

တက်တူး

b1103113haa102.blogspot.com

 ခဲတလုံးထဲနဲ့ငှက်တအုပ်ထပျံသွား
စီးကရက်ငွေ့တွေနဲ့မိုးရေစက်တွေရောထွေး
မီးခိုးတွေကရေမစိုဘူး
တနေရာထဲမှာအရှည်ကြီး
အလွယ်တကူပဲဖြတ်လျှောက်မိတယ်
ဆေးစက်နည်းနည်းသွေးစက်များများ
တပွဲပြီးတပွဲ
အပြင်မှာတော့ခဏလေးပဲ
စစ်ထဲမှာသေတာကလွဲပြီးကျန်တဲ့ဒုက္ခတွေကြာလွန်း
ဟိုတစသည်တစလွတ်ကျသွားတဲ့အား
ညီလာခံတေး
သစ်ပင်ပေါ်မှာငှက်တွေပြန်လာနားချိန်။

ရိုးမြေ
၃၁/၈/၂၀၁၆

…

ငါ ငှက်လိုပျံပြီး ...

news.artnet.com

ငါ ငှက်လိုပျံပြီး
လေထဲကဗျာရေးလိုက်ရ
ငါ ငှက်လိုပျံသန်း
လေထဲ ဒိုင်ယာ လော့လိုက်ရ ...၊

ပြောမရရင်
ငှက်တွေလို ပျံလာပြီး
သူ့အိမ်ခေါင်ပေါ်တည့်တည့်
ဗုံးကျဲ ဆော်ထည့် ပစ်လိုက်ရ...

ဒါဆို
ငှက်တွေလောက
ငါ အကြမ်းဖက်သမား ဖြစ်သွားမလား .. ။

အရေးကြီးဆုံးက
အမေ့အိမ်အိုလေးဆီ အချိန်မီပြန်နိုင်ဖို့
ငှက်တွေလိုပျံသွား ...
နောက်ဆုံးအဖြစ်
ဇရာအိုဆီခမ်း အမေ့ပါးလေး
နမ်းလိုက်ရ ....။ ။

ခင်လွန်း

၁၀.၂.၂၀၁၅

(မှတ်ချက်- အမေသည် ထိုကဗျာရေးအပြီး တစ်လအကြာတွင် ဆုံးပါသည်။)