သစ်ခက်သံလွင်- ကဗျာခံစားမှုဆောင်းပါး (ငြိမ်းဝေ-ကဗျာ့ အိုးဝေ) ၏ " မောင်ချောနွယ်ရဲ့ အရိပ်ခြွေသစ်ပင်ကို ခြွေကြည့်ခြင်း "

မောင်ချောနွယ်ရဲ့ အရိပ်ခြွေသစ်ပင်ကို ခြွေကြည့်ခြင်း

မူရင်းဓာတ်ပုံရှင်ကို လေးစားမှုဖြင့်ဖော်ပြသည်။

ကဗျာဆိုတာ အရိပ်ပြအကောင်ထင်အောင် ကြည့်ရတဲ့သဘော။ မှော်နဲ့ရေးတာကို မှော်နဲ့ပဲ ခံစားယူရတဲ့ သဘော။ လူမှာအတွေ့ နတ်မှာ အငွေ့ ဆိုတဲ့အခြေအနေမျိုးအထိ ရှေ့တိုး အလုပ်လုပ်ရတဲ့ကိစ္စ။

၁၉၇၀ ခုနှစ်လောက်က မြန်မာကဗျာနယ်ပယ်မှာ အတတ်ပညာနဲ့အကြောင်းအရာကိစ္စ ကျယ်ကျယ်လောင်လောင် ဆွေးနွေးခဲ့ကြဖူးပါတယ်။
ကွယ်လွန်သူ စာရေးဆရာနိုင်ဝင်းဆွေရဲ့ တောင်ဥက္ကလာပနှင်းဆီးခြံလေးထဲက တဲတလုံးပေါ်မှာ အတတ်ပညာမြှင့်တင်ရေးကိစ္စ ဆွေးနွေးခဲ့ကြဖူးတာကို သတိရနေမိပါတယ်။ ဒီတုန်းက အကြောင်းအရာ ကိစ္စကို ကျွန်တော်တို့မပြောခဲ့ကြပါဘူး။

အဲဒီဆွေးနွေးပွဲမှာ ပါဝင်ခဲ့ကြသူတွေအားလုံး ဘက်တဖက်တည်းက ရပ်တည်ကြသူတွေဖြစ်တော့ အတတ်ပညာကိုပဲ ပြောခဲ့ဆိုခဲ့ကြတာပါ။ ဒီတုန်းက ကျွန်တော်တို့ ဘယ်ဘက်က ရပ်တည်သင့်သလဲ ဆိုတဲ့မေးခွန်းကို ဖြေဖို့မလိုလောက်အောင် အတွေးမျဉ်းပြတ်နေတဲ့ကာလ ဖြစ်ပါတယ်။ ကြပ်တည်းခက်ခဲလာတဲ့ အခြေအနေတခုအောက်မှာ ကဗျာဆရာတွေ အတတ်ပညာ မချို့တဲ့ရလေအောင် နည်းလမ်းရှာကြဖို့ကိုပဲ ဆော်သြခဲ့ကြပါတယ်။ စာပေဆည်းဆာလှုပ်ရှားမှုလို့ တွင်ခဲ့ပါတယ်။

အတတ်ပညာမြှင့်တင်ရေးကိစ္စနဲ့ အကြောင်းအရာရှင်းလင်းပြတ်သားရေးဟာ (one devided into two) တခုထဲမှာရှိတဲ့နှစ်ခုပါ။ ခေါင်းနဲ့ပန်းပါ။ နှစ်ခုစလုံးအရေးကြီးတဲ့ကိစ္စတွေချည်းပါပဲ။ ဒါပေမဲ့ ကာလဒေသ ပယောဂအပေါ်မူတည်ပြီး နှစ်ခုအနက်တခုကို တစုံတရာဦးစားပေးစဉ်းစားကြရတဲ့ အချိန်ကာလမျိုးလည်း ရှိတတ်ပါတယ်။

လက်ရှိကျွန်တော်တို့ဖြတ်သန်းနေကြရတဲ့ကွင်းကိုကြည့်တော့ “ခေတ်ပေါ်ကဗျာ”က တပ်ဦးမှာ ရှိနေပါ တယ်။ ဒါကြောင့်မို့ ခေတ်ပေါ်ကဗျာတွေ မီးရှုးမီးပန်းမဖြစ်ဖို့၊ ယမ်းမမြုံဖို့၊ ကဗျာအတတ် ပညာကို ကဗျာရေးသူတိုင်းက ခါးဝတ်ပုဆိုးလိုသဘောထား ကြရမှာပါ။

ကဗျာအတတ်ပညာကို ဆွေးနွေးငြင်းခုန်နေခဲ့ကြတာကတော့ ကြာပါပြီ။ ဒါဟာ ကိစ္စကောင်း ဖြစ်ပါတယ်။ ဒီလိုဆွေးနွေးငြင်းခုန်ကြရင်းကပဲ ထူးချွန်ထက်မြက်တဲ့ ခေတ်ပေါ်ကဗျာဆရာတွေ ထွက်ပေါ်လာခဲ့ကြတာပါ။

ခေတ်ပေါ်ကဗျာဆရာထဲက ကျွန်တော်ချစ်ခင်လေးနက်တဲ့ ကဗျာဆရာတယောက်ကိုပြောပါဆိုရင် “မောင်ချောနွယ်”ကို ကျွန်တော်ဦးစားပေးရွေးချယ်ရမှာပါ။ သူ့ကဗျာတွေက ကျွန်တော့်အပေါ် လွှမ်းမိုးခဲ့ တာ နှယ်နှယ်ရရနှစ်တွေမှ မဟုတ်တာပဲ။ ကျွန်တော့်ရင်ထဲတည့်တည့်ကြီး စိုက်ဝင်စူးဖူးတဲ့ သူ့ကဗျာတပုဒ် ရဲ့ခေါင်းစဉ်ကိုကြည့်ပါဦး။ “ကြွေတာကိုက ပွင့်ခြင်းပဲ” တဲ့။ ၁၉၆၉ က တော်လှန်ကဗျာစာအုပ်မှာ သူရေးခဲ့တဲ့ကဗျာ။

၂၀၀၀ ခုနှစ်လွန်နှစ်တွေထဲမှာ သူ့ကဗျာစာအုပ်တွေ တန်းစီထုတ်ရင်းက “မောင်ချောနွယ်ဆန် သွားသောနေ့ များ” ကဗျာစာအုပ်ကို ကျွန်တော် ဖတ်ခွင့်ကြုံပါတယ်။ ဒီကဗျာစာအုပ်ရဲ့အဖွင့်ကဗျာက “အရိပ်ခြွေသစ်ပင်” တဲ့။ ဒါလည်း နာမည်ကြီးကဗျာတပုဒ်ပါပဲ။

ပထမဆုံးသတိပြုမိတဲ့ အချက်က၊ ၁၉၆၉ ခုနှစ်က ထုတ်ဝေတဲ့တော်လှန်ကဗျာစာအုပ်ထဲက “ကြွေတာကိုက ပွင့်ခြင်းပဲ” ကဗျာနဲ့ အခု “အရိပ်ခြွေသစ်ပင်” ကဗျာကို ဆက်စပ်ပြီး သတိပြုမိတဲ့ အချက်ပါ။

ကဗျာနှစ်ပုဒ်စလုံး “သစ်ပင်” နဲ့ ပတ်သက်တဲ့ကဗျာတွေချည်းပါပဲ။ ဒါပေမဲ့ “အရိပ်ခြွေသစ်ပင်” ကဗျာကို နှစ်ပေါင်း ၃၀ ကျော်ခြားပြီးမှရေးဖွဲ့သည့်တိုင် ကျွန်တော့်စိတ်ထဲ “ကြွေတာကိုက ပွင့်ခြင်းပဲ” ဆိုတဲ့ ကဗျာလောက် မငြိနိုင်အောင် ဖြစ်ရတယ်။ ဒါနဲ့ပဲ သေချာသွားအောင် ဆိုပြီး “အရိပ်ခြွေသစ်ပင်” ကဗျာကို အထပ်ထပ်အခါခါ ဖတ်ပါတယ်။

---------------------
အရိပ်ခြွေသစ်ပင်
----------------------
အရိပ်ခြွေသစ်ပင်ဟာ
ကမ္ဘာပေါ်မှာတပင်တည်းရှိတယ်
အရိပ်ခြွေသစ်ပင်ဟာ
သစ်ရွက်တွေမခြွေဘူး
အရိပ်တွေသာ ခြွေခြွေချပေးနေတယ်
(သူခြွေချတဲ့ အရိပ်ထဲမှာ
ဆန်းသစ်တဲ့ နေ့ရက်တွေပါတယ်
ပန်းသစ်ဝေေ၀ မနက်ခင်းတွေပါတယ်
ရွှန်းလက်ဝင်းပတဲ့ သစ်သီးတွေပါတယ်
ပြန်ကျမိုးစက်တွေပါတယ်
ဘာဖြစ်လို့များ
သူက အရိပ်တွေခြွေလိုက်တိုင်း
အဲဒါတွေ ပါဝင်နေရတာလဲ)
ငါစဉ်းစား
ငါ့မှာစဉ်းစားခြင်းဘူတာ
ဆိုက်ကပ်ကပ်နေမိ
ငါ့မှာ
ထထပျံဝဲနေမိ
ငါ့မှာ
သီးချင်းထထ အော်ဟစ်ဆိုမိ။
ဘာဖြစ်လို့ပါလိမ့်
ငါစဉ်းစား
ငါတွေးကြည့်
ငါသိချင်မိ
ထူးဆန်းလှတဲ့
ဒီအရိပ်ခြွေသစ်ပင်အကြောင်း
သူကတော့ ဘာသိဘာသာပဲ
အရိပ်တွေဘဲခြွေခြွေပေးနေ
ငါစူးစမ်း
ငါမနေနိုင်တော့ဘူး
ဒါနဲ့ငါဟာ အရိပ်ခြွေသစ်ပင်ဆီသွားကာ
သွားကိုင်တွယ်ကြည့်မိ
ငါသိလိုက်ရပြီ
သူ့တကိုယ်လုံးမှာ ကျီးပေါင်းတက်ဒဏ်ရာတွေချည်း
နိုင်းချင်း
ကမ္ဘာပေါ်မှာ ဒဏ်ရာရ သစ်ပင်တွေလောက်လှတာ
ဒဏ်ရာရသစ်ပင်ပဲရှိ၊
သြော် . . .
ဒါကြောင့် သူက အရိပ်တွေခြွေပေးနိုင်တာကိုး။

အခုတခါ မူရင်း “အရိပ်ခြွေသစ်ပင်” ကဗျာရဲ့ ပါဒ (၈)ခုကို ကွင်းစကွင်းပိတ် လုပ်ပြထားခဲ့တာ ရှိပါတယ်။ အဲဒီ ကွင်းစကွင်းပိတ်လုပ်ထားတဲ့ ပါဒတွေကိုဖြုတ်ကြည့်ပြီး ကျွန်တော့်သဘောနဲ့ ကျွန်တော် ဒီကဗျာကို ပြန်စီကြည့်ပါတယ်။

----------------------
အရိပ်ခြွေသစ်ပင်
----------------------
အရိပ်ခြွေသစ်ပင်ဟာ
ကမ္ဘာပေါ်မျာတပင်တည်းရှိတယ်
အရိပ်ခြွေသစ်ပင်ဟာ
သစ်ရွက်တွေမခြွေဘူး
အရိပ်တွေသာ ခြွေခြွေချပေးနေတယ်
ငါစဉ်းစား
ငါ့မှာ စဉ်းစားခြင်းဘူတာ
ဆိုက်ကပ်ကပ်နေမိ
ငါ့မှာ
ထထပျံဝဲနေမိ
ငါ့မှာ
သီးချင်းထထ အော်ဟစ်ဆိုမိ၊
ဘာဖြစ်လို့ပါလိမ့်
ငါစဉ်းစား
ငါတွေးကြည့်
ငါသိချင်မိ
ထူးဆန်းလှတဲ့
ဒီအရိပ်ခြွေသစ်ပင်အကြောင်း
သူကတော့
ဘာသိဘာသာပဲ
အရိပ်တွေဘဲ
ခြွေခြွေပေးနေ
ငါစူးစမ်း
ငါမနေနိုင်တော့ဘူး
ဒါနဲ့ငါဟာ အရိပ်ခြွေသစ်ပင်ဆီသွားကာ
သွားကိုင်တွယ်ကြည့်မိ
ငါသိလိုက်ရပြီ
သူ့တကိုယ်လုံးမှာ ကျီးပေါင်းတက်ဒဏ်ရာတွေချည်း
နိုင်းချင်း
ကမ္ဘာပေါ်မှာ ဒဏ်ရာရ သစ်ပင်တွေလောက်လှတာ
ဒဏ်ရာရသစ်ပင်ပဲရှိ၊
သြော် . . .
ဒါကြောင့် သူက အရိပ်တွေခြွေပေးနိုင်တာကိုး။

ဒါကတော့ ပါဒ ၈ ခုဖြုတ်ချထားခဲ့တဲ့ကဗျာပါ။ ဘာပြုလို့ အဲဒီပါဒ ၈ ခုကို ဖြုတ်ချထားခဲ့ရသလဲ ဆိုတော့ ဒီပါဒ ၈ ခုမပါရင် “ အရိပ်ခြွေသစ်ပင်”ဟာ ပိုပြီး ကျစ်လစ်သိပ်သည်းအားကောင်းတဲ့ ကဗျာဖြစ်လာလိမ့်မယ်လို့ ယူဆပြီး ဖြုတ်ထားကြည့်တာပါ။

ဖြုတ်ထားတဲ့ ပါဒ ၈ ခုအနက်က အပေါ်ဆုံးပါဒ “သူခြွေတဲ့အရိပ်ထဲမှာ” ဆိုတဲ့ပါဒဟာ ကဗျာဖတ်သူကို လက်ဆွဲခေါ်ပြီး ရှင်းပြဖို့ကြိုးစားတဲ့ပါဒဖြစ်ပါတယ်။ အောက်က ပါဒ ၄ ခုကတော့ အဲဒီသစ်ပင်ကခြွေချတဲ့ အရိပ်တွေထဲမှာပါဝင်တဲ့အကြောင်းအရာတွေကို ဖော်ပြတဲ့ ပါဒတွေပါ။ ဒီပါဒတွေက ကဗျာဖတ်သူကို ပိုပြီးနားလည်အောင် ဒါမှမဟုတ် ကဗျာရဲ့ လျှိူ့ဝှက်ထားတဲ့အရာကို ကဗျာဖတ်သူတွေ မသိမှာ မထိမှာ မငြိမှာစိုးလို့ မောင်ချောနွယ်က ရှင်းပြတဲ့သဘော သက်ရောက် တဲ့ ကဗျာပါဒတွေပါပဲ။ ဒီနေရာမှာ တကယ်တော့ မောင်ချောနွယ်ရေးပြဖြေပြတဲ့ အဓိပ္ပာယ်တွေ ထက်ပိုများတဲ့အဓိပ္ပာယ်တွေ “အရိပ်” ထဲမှာ ရှိတယ်လို့ တောင်ဆိုရမှာပါ။

ကျွန်တော့်စိတ်ထဲမှာ “အရိပ်ခြွေသစ်ပင်” ကဗျာမှာ သစ်ရွက်တွေမခြွေဘဲ၊ အရိပ်တွေသာ ခြွေခြွေချနေတဲ့ သစ်ပင်ကို ဘာကြောင့်များ အရိပ်တွေကိုပဲခြွေခြွေချနေရတာလဲ ဆိုတဲ့ မေးခွန်းကိုစဉ်းစားရင် “ငါ့မှာ ထထ ပျံဝဲနေမိ၊ ငါ့မှာ သီချင်းထထ အော်ဟစ်ဆိုမိ” ဆိုတဲ့ ပါဒတွေနဲ့ “ငါသိလိုက်ရပြီ သူ့ တကိုယ်လုံးမှာ ကျီးပေါင်း တက်ဒဏ်ရာတွေ နိုင်းချင်း” ဆိုတဲ့ပါဒေတွေနဲ့တင် လုံလောက်တဲ့အဖြေ ရှာနိုင်မယ်ထင်ပါတယ်။

ကျွန်တော်ထင်ပါတယ်။ သစ်ပင်သစ်ရိပ်ဆိုတာ လူတွေအတွက်ကောင်းမှုဟူသမျှ အကျွမ်းဝင်တဲ့ သင်္ကေတ အဖြစ်ကလွဲပြီး ဘေးထွက်ဆိုးကျိုးကိုဖော်ပြလို့မရတဲ့ သင်္ကေတပါ။ ဒီ လုံလောက်တဲ့ သင်္ကေတကို အသုံးပြုပြီးကာမှ မောင်ချောနွယ်က ဘာပြုလို့များ “အရိပ်” ကိုဖြေပြဖို့ကြိုးစားခဲ့တာပါလိမ့်။ အရိပ်ကိုပြထားပြီးရင် အကောင်အထည်ကို ကဗျာဖတ်သူက ကြိုးစားပြီး တွေးယူတူးယူ လိမ့်မပေါ့။

ဒီနေရာမှာ မောင်ချောနွယ်လိုပဲ သစ်ပင်တပင်အကြောင်းဖွဲ့တဲ့ သြစတြီးယား ကဗျာဆရာ “ကလာရာကွက်နာဘီနစ်နီ”ရဲ့ “သစ်ပင်တပင်” ကဗျာကို ဖတ်ကြည့်စေချင်ပါတယ်။

---------------------
သစ်ပင်တပင်
--------------------
လှဲလိုက်တယ်
သစ်ပင်တပင်
သူ့အရွက်တွေ
ရှင်သန်နေတုန်း
သူ့အသီးတွေ
ဝင်းမှည့်နေတုန်း
သူ့အကိုင်းပေါ်မှာ
ငှက်တွေနားနေတုန်း
သစ်ပင်တပင်
လှဲခဲ့တယ် ။

ဘီနစ်နီရဲ့ ဒီကဗျာဟာ မောင်ချောနွယ်တချိန်ကရေးခဲ့ဖူးတဲ့ “ကြွေတာကိုက ပွင့်ခြင်းပဲ” ကဗျာနဲ့ အနက်တူတဲ့ကဗျာပါ။ အာဇာနည်မျိုး သေရိုးမရှိ” ဆိုတဲ့အနက်၊ အမျိုးမျိုးဖိနှိပ်ထားတဲ့ကြားက မျိုးဆက်သစ်တွေ ဆက်လက်ဖွံ့ဖြိုးလာနေတဲ့အကြောင်းကို ဖော်ပြတဲ့ကဗျာပါ။ 

ဒီကဗျာမှာ ဘီနစ်နီက အလှဲခံလိုက်ရပြီးတဲ့ သစ်ပင်လို့လည်းပြောတယ်။ အဲဒီသစ်ပင်ရဲ့အရွက်တွေ၊ အသီးတွေရှင်သန်ဝင်းမှည့်နေတုန်း၊ သူ့အကိုင်းတွေပေါ်မှာ ငှက်တွေနားနေတုန်းလို့လည်း ဆိုလိုက် ပြန် တယ်။ ဒီမှာတင် ဘီနစ်နီက ကဗျာကို ရပ်ထားလိုက်တာပါ။ 

ဘာကြောင့်အသီးတွေအရွက်တွေက ဆက်လက်ဝင်းမှည့်ရှင်သန်နေရတာလဲ၊ သူ့အကိုင်းတွေပေါ်မှာ ငှက်တွေဘာကြောင့်ဆက်ပြီး နားနေနိုင်တာလဲဆိုတဲ့ မွေးခွန်းကို ဖြေကြားဖို့ကြတော့ ကဗျာဖတ်သူအတွက် ချန်ထားလိုက်ပါတယ်။ သူက “အရိပ်” ကိုပဲပြပြီး အကောင်အထည်ကိုဖော်ယူဖို့ ကဗျာဖတ်သူရဲ့လက်ထဲ လွှဲထားခဲ့ပါတယ်။ ဒီနည်းကြောင့် သူ့ကဗျာ “သစ်ပင်တပင်” ဟာ ကျစ်လစ်သိပ်သည်းနက်နဲတဲ့ ကဗျာ တပုဒ်ဖြစ်လာခဲ့ပါတယ်။

ကဗျာဆိုတာ အရိပ်ပြအကောင်ထင်အောင် ကြည့်ရတဲ့သဘော။ မှော်နဲ့ရေးတာကို မှော်နဲ့ပဲ ခံစားယူရတဲ့ သဘော။ လူမှာအတွေ့ နတ်မှာ အငွေ့ ဆိုတဲ့အခြေအနေမျိုးအထိ ရှေ့တိုး အလုပ်လုပ်ရတဲ့ကိစ္စ။ ဒါကြောင့်မို့ မောင်ချောနွယ်ရဲ့ “အရိပ်ခြွေသစ်ပင်”ကဗျာကို ကျွန်တော် ပြောတဲ့ ကွင်းစကွင်းပိတ်အတွင်းက ကဗျာပါဒတွေကို ဖြုတ်ချလိုက်ရင် သည့်ထက်လေးနက် ကျစ်လစ်တဲ့ ကဗျာတပုဒ် ဖြစ်လာလိမ့်မယ်လို့ ယူဆမိပါတယ်။

ဒီနေရာမှာ လိုအပ်မယ်ထင်လို့ စကားတခွန်းတော့ ပြောလိုက်ပါရစေ။ မောင်ချောနွယ်ဆိုတာ သာမာန်ကဗျာ ဆရာမဟုတ်တဲ့ အင်မတန်အောင်မြင်တဲ့ ကဗျာဆရာဆိုတာ ကျွန်တော်လက်ခံပါတယ်။ ကွယ်လွန်လေပြီးတဲ့ မြင့်မားတဲ့ကဗျာဆရာတယောက်ကို နှိမ့်ချပြီးပြလိုတဲ့သဘော ကျွန်တော့်မှာ မရှိပါဘူး။ အဲသလိုပြောဖို့ဆိုဖို့ရာလည်း အကြောင်းမရှိပါဘူး။ မောင်ချောနွယ်ကို ကျနော်ချစ်ပြီးသား။ လေးစားပြီးသား ပါ။ ဒါပေမဲ့ သည့်ထက်ပိုကောင်းတဲ့ကဗျာမျိုးကို မျှော်လင့်ပြီးမှ ဆွေးနွေးလိုက်တာပါ။ ကျန်ရစ်တဲ့ တခြားကဗျာရေးသူတွေအတွက် အကျိုးရှိမယ်ထင်လို့ ဆွေးနွေးရခြင်းပါ။

မြန်မာကဗျာဖွံ့ဖြိုးတိုးတက်စေဖို့ဆိုရင် အတတ်ပညာကြွယ်ဝမှန်ကန်ရေးဟာလည်း အရေးပါလှတဲ့ လိုအပ်ချက်ဖြစ်တယ်လို့ ယူဆပါတယ်။ ။ 

ငြိမ်းဝေ(ကဗျာ့အိုးဝေ)

ကိုးကား
(၁) မောင်ချောနွယ် “ မောင့်ချောနွယ် ဆန်သွားသောနေ့များ”
(၂) မောင်သင်းခိုင် ဘာသာပြန်ဆိုတဲ့ “မမြင်ရတဲ့မြစ်” ကဗျာစာအုပ်
 

စာရေးသူ၏မှတ်ချက်။ ။  ဒီကဗျာခံစားမှုဆောင်းပါး   ရေးထားခဲ့တာလည်း ဆယ်နှစ်ကျော်ပါပြီ။