သစ်ခက်သံလွင် ကဗျာသုံးသပ်ချက်၊ ကိုနိုင်း " ခေတ်ကိုထင်ဟပ်သော ခေတ်ပေါ်ကဗျာရေးဟန်များ(၁) "

ပြတင်းတံခါးအဖွင့် ဇာခန်းဆီးအလွင့်( ၂၃ )

ခေတ်ကိုထင်ဟပ်သော ခေတ်ပေါ်ကဗျာရေးဟန်များ(၁)

ပြတင်းတံခါးကိုဖွင့်လိုက်တဲ့အချိန်တိုင်းမှာဇာခန်းဆီးလှုပ်ခတ်သလိုလှုပ်ခတ်နေတဲ့ခေတ်ကို အစဉ်အမြဲတွေရမှာပါ။ ကျွန်တော်တို့အနေနဲ့လည်းလှုပ်ခတ်နေတဲ့ခေတ်တွေကို ကျော်လွန် ဖြတ်သန်းနေရပါတယ်။ ဒီခေတ်တွေဟာ ဘယ်တော့မှမပြီးဆုံးနိုင် တဲ့ပြောင်းလဲမှုတွေနဲ့ ပြောင်းလဲတည်ရှိနေဦးမှာပါ။ မျိုးဆက်တွေ တဆက်ပြီးတဆက် ဆင့်ပွားရှင်သန်နေကြမှာပါ။

ပြောင်းလဲမှုတွေနဲ့အတူ အနုပညာအရာတွေလဲပြောင်းလဲနေပါ တယ်။ အနုပညာဖန်တီးသူတွေကလည်း ခေတ်ရဲ့ပြောင်းလဲမှုကို လိုက်ပါစီးဆင်းနေကြမှာပါ။ ခေတ်ပြိုင်တွေကလည်း အကန့် အသတ်ရှိပေမယ့် ခေတ်ပေါ်ဆိုတာကတော့ အကန့်အသတ် မရှိပါဘူး။ ဒီလိုပါပဲ။ ခေတ်ပေါ်ကဗျာဆိုတာ အစဉ်အမြဲပြောင်း လဲနေတဲ့ ခေတ်နဲ့အတူ ပေါ်ပေါက်နေပါလိမ့်မယ်။ အနုပညာ ဖန်တီးမှုအနေနဲ့ကြည့်မယ်ဆိုရင် ရှေးရိုးစွဲ ဂန္တဝင်အနုပညာတွေရှိနေသလို၊ ခေတ်မီတဲ့အနုပညာတွေလည်း ရှိနေပါတယ်။ ပေါ်ထွက်လာကြဦးမှာပါ ပဲ။

အခုခေတ်ပေါ်ကဗျာတွေမှာဆိုရင် နိုင်ငံတကာမှာ မော်ဒန်ကဗျာ (modern-poetry)၊ပေါ့ပ် ကဗျာ (Pop-poetry)၊ ဒီဇိုင်းကဗျာ(Graphic-poetry)တွေ စသဖြင့်ဖြစ်ပေါ်နေပါတယ်။ ကျွန်တော်တို့ မြန်မာနိုင်ငံအနေ နဲ့ ခေတ်ပေါ်ကဗျာခေတ်အထိတိုးတက်ဖြစ်ပေါ်လာမှုတွေဟာ ခေတ်တွေအလိုက် တဆင့်ပြီးတဆင့် ပြောင်း လဲလာတယ်လို့ပြောရမှာပါ။ ဒါဟာလည်း ကျွန်တော်ရဲ့အယူအဆသတ်မှတ်ချက်ပါ။ အငြင်းပွားနိုင်ပါလိမ့် မယ်။ အငြင်းပွားနိုင်ပေမယ့် ကျွန်တော်ကတော့ ခေတ်ကိုကိုယ်စားပြုနေတဲ့ခေတ်ပေါ်ကဗျာအဖြစ်ပဲ သုံးစွဲ ချင်ပါတယ်။

 ကျွန်တော်တို့နိုင်ငံမှာ ခေတ်တွေပြောင်းလဲလာတာနိုင်ငံရေးအခြေ အနေအရ ပြောင်းလဲလာရတာပါ။ ခေတ်တွေရဲ့နိုင်ငံရေး ပြောင်းလဲ လာခြင်းနဲ့အတူ ကဗျာတွေလည်း ပြောင်းလဲလာတဲ့ နိုင်ငံရေးကို ထင်ဟပ်ပြီး ပြောင်းလဲလာရတာပါ။ အခုခေတ်မှာ ခေတ်ကိုထင် ဟပ်ပြီးရေးတဲ့ ခေတ်ပေါ်ကဗျာတွေကလည်း စာဖတ်သူတွေရဲ့ အကြိုက်ဖြစ်နေပါတယ်။

ခေတ်ကိုထင်ဟပ်တဲ့ခေတ်ပေါ်ကဗျာကိုရေးဖွဲ့ပုံအမျိုးမျိုးနဲ့ရေးဖွဲ့ နေကြတာ တွေ့ရပါတယ်။

ဒီလိုရေးဖွဲ့ပုံအမျိုးမျိုးနဲ့ရေးဖွဲ့ကြတဲ့ခေတ်ပေါ်ကဗျာတွေ ခံစားမိ သလောက်သုံးသပ်ပြနေခြင်းပဲ ဖြဖစ်ပါတယ်။ ဒီအပတ် ခံစားမိတဲ့ ကဗျာတွေကို စာဖတ်သူတို့ရဲ့နှလုံးသားပြတင်းတံခါးကို ဖွင့်ကြည့်ဖို့ ပြောချင်ပါတယ်။

အရင်ဆုံး အခုခေတ်ရဲ့ပြကွက်တကွက်ကို ကဗျာဆရာ ဝင်းမြင့်က သီချင်းတစ်ပုဒ်နဲ့ ပြလိုက်ပါတယ်။

         

 “ဒီမှာ တောက်လျှောက်မိုးတွေယိုလို့

         ခေတ်ကိုက တဲ့

         ဟေ့လူ ငါ့အပေါ်ဖိတ်ကျမယ်နော်။

         အထားအသိုမမှန်

         လက်ခံဖြတ်ပိုင်းကလည်းမရှိ

         ဝါကတစ်ကြောင်းက ငါ့ကိုစောင့်ကြည့်နေရဲ့

         တံခါးကိုဖွင့်ပြီးရင် ပိတ်ခဲ့ပါရန်

         သစ်ရိပ်တွေမြေပေါ်မှာ လျှံကျနေချိန်၊

         မနက်ဖြန်

         သဘက်ခါ

         သူဆက်ဆက်လာမှာပါတဲ့

         ဒါဗမာစကားပဲလေ

         မြန်မာလိုပဲလာမှာပေါ့။

         နည်းနည်းလောက်ဖိနှိပ်ခံထားရတဲ့အတွေးအခေါ်နဲ့လား

         ဒါမှမဟုတ် ဆတ်ဆတ်ထိမခံတဲ့မျက်နှာနဲ့လား။

         နှင်းဆီ

         နှင်းဆီ

         နှင်းဆီ။”

ကဗျာဆရာကအဖွင့်ပိုဒ်မှာတင် အထားအသိုမမှန်တာတွေပြသွားပါတယ်။ အခုခေတ်မှာ အထားအသိုမမှန် တာတွေနဲ့ရေးဖွဲ့ပြီး ခေတ်ပေါ်ကဗျာလို့ဆိုနေကြသူတွေကို အများအပြား တွေ့နေရပါတယ်။ ခေတ်ပေါ်ကဗျာမှာ ကာရန်ပါခြင်း၊ မပါခြင်းကအကြောင်းမဟုတ်တော့ပါဘူး။ 

တချို့ခေတ်ပေါ်ကဗျာတွေကိုစကားပြေဆန်ဆန်ဖြန့်ရေးနေတာတွေလည်း တွေ့နေရပါတယ်။ 

အခုအချိန်မှာခေတ်ပေါ်ကဗျာမှာနိမိတ်ပုံကိုလည်း အဓိကမထားတော့တာတွေလည်း တွေ့နေရပါတယ်။ ခေတ်ပေါ်ကဗျာမှာ(Rhythm)ပြေပြစ်ညီညွတ်မှုကတော့ အရေးကြီးပါတယ်။ ခေတ်ပေါ်ကဗျာဟာ ခံစားမှု ကိုဖတ်သူရဲ့ရင်ထဲအထိ တိုးဝင်စူးစိုက်သွားနိုင်မယ်ဆိုရင် ကဗျာကောင်းတပုဒ်လို့ သတ်မှတ်ရမှာပါ။ အထားအသိုမညီရင်တော့ ခေတ်ပေါ်ကဗျာကောင်း မဖြစ်နိုင်ပါဘူး။ မြန်မာတွေရေးတဲ့ခေတ်ပေါ်ကဗျာတွေ မှာလည်း အင်္ဂလိပ်စာလုံးတွေ ကြားညှပ်သုံးတာ တွေတွေ့နေရပါတယ်။ အင်္ဂလိပ်စာလုံးတွေကိုတတ်နိုင် ရင် မြန်မာဝေါဟာရတွေနဲ့လဲလှယ်ပြီး အသုံးပြုကြစေချင်ပါတယ်။

နောက်ထပ်ခေတ်ပေါ်ကဗျာကိုအပြသဘောဆောင်တဲ့ကဗျာတပုဒ်အဖြစ် ဆရာမကြည်မွေ့ အိမ်ရဲ့”ပုစဉ်းရင်ကွဲအော်သံကို ကျွန်မမုန်းတယ်” ကဗျာမှာ တွေ့လိုက်ရပါတယ်။

          “မျက်တောင်တုတွေ

         ဆေးသားပြယ်ချိန်

         ပုစဉ်းရင်ကွဲအော်သံစူးစူးတွေ။

         ဇကာခုနှစ်ကွက်ထိပ်မှာ

         ဆေးပေါ့လိပ်မီးကရဲခနဲ

         ကြွေကျသွားတဲ့ပြာစမှာ

         အရိုးတွေ။”

ဒီကဗျာမှာအလွန်လှပတဲ့အတွေးကိုအပြသဘောအနေနဲ့ရေးဖွဲ့ထားတာတွေ့ရမှာပါ။ 

ခေတ်ကြီးကိုလည်းမြင်တွေ့နိုင်ပါတယ်။ အတုတွေဖယ်ရှားလိုက်တဲ့အခါ လူတွေရင်ကွဲနာကျရမှာပါ။ ဒေါသ၊ သောက၊ မောဟတွေ တမြည့်မြည့်လောင်ကျွမ်းနေတဲ့ ဘဝတွေဟာ နောက်ဆုံးမှာ အတ္တတွေအဖြစ် ပြာကျ သွားမှာပါ။ တခြားအမြင်အတွေးတွေအနေနဲ့လည်းမြင်နိုင်တွေးနိုင်ပါလိမ့်မယ်။ ခေတ်ပေါ်ကဗျာ(သို့မဟုတ်) အနုပညာပစ္စည်းတခုကိုဖတ်သူ (သို့မဟုတ်) ခံစားသူရဲ့အပေါ်မှာမူတည်ပါတယ်။ ဒီလိုအတွေး လှပပြီး ခေတ်ပေါ်ကဗျာမျိုးတွေရှားပါးနေကြပါပြီ။

ဒီဖက်ခေတ်က ခေတ်ပေါ်ကဗျာတွေမှာလည်း (Hybirtpoetry) ဖက်စပ်ကဗျာတွေများနေပါတယ်။ ဆိုလိုချင်တာက ခေတ်ပေါ်ကဗျာနဲ့ခေတ်ပြိုင်ကဗျာတွေ ရောထွေးနေတာကို ဆိုလိုချင်တာပါ။ 

ခေတ်ပေါ်ကဗျာကို အစစအရာရာလေ့လာပြီး ရေးစေချင်ပါတယ်။ ဆရာသစ္စာနီရဲ့ခေတ်ပေါ်ကဗျာဆိုင်ရာ ဆောင်းပါးတပုဒ်ထဲမှာတော့ ”ခေတ်ပေါ်ကဗျာဆရာ အမည်ခံလိုသော လူငယ်တော်တော်များများပင် ထိုကဲ့သို့လေ့လာရန် စိတ်ဇွဲသန်ခြင်းမရှိကြ၊ စမူဆာကြော်တတ်ဖို့လောက်ပင် ခက်ခက်ခဲခဲ သင်လိုက်ရ သည်မရှိဘဲ နတ်ရေကန်ထဲ ခုန်ချလိုက်သလို တမဟုတ်ချင်း ခေတ်ပေါ်ကဗျာဆရာဖြစ်ကုန်ကြတော့ သည်။ (ခေတ်ပေါ် ကဗျာ အတုများမြောက်မြာစွာထွက်ပေါ်နေခြင်းက ဤအချက်ကို သက်သေခံနေ ပါသည်” လို့ရေး ထားပါတယ်။ ဒါကိုကြည့်ရင် ခေတ်ပေါ်ကဗျာဆိုပြီး ရေးနေသူတွေကိုအကဲခတ်နိုင်မှာပါ။ လူငယ်မျိုဆက်တွေအနေနဲ့ သူများထက်ပိုလေ့လာစေချင်ပါတယ်။ ကြာလာရင် ကဗျာဖတ်သူတွေက ငြီးငွေ့သွားနိုင်ပါတယ်။

ဒီအကြောင်းကို ကဗျာဆရာချောဘသစ်က “ငြီးတစီစီတငွေ့ငွေ့ငြီးငွေ့”ဆိုပြီးရေးထားပါတယ်။

          “သွေးဆုတ်ဖြူလျော်

         လောင်းရိပ်မိနေတဲ့ပြက္ခဒိန်

         ခဏခဏ နေထုတ်လှန်းလည်း

         မှိုနံ့စွဲနေတဲ့ကဗျာ

         စကားလုံးတွေကိုမီးပြင်းတိုက်လည်း

         ကမမ်းလောင်နေတဲ့အနုပညာဟာ

         ပေါင်မြင်လည်းစိတ်မလာတော့

         လူ့အဖြစ်က ဆားပေါ့လာသလို

         လူ့အရသာက အုန်းခွံဝါးရသလို

         ဖွယ်တယ်တယ် ဖန်တွတွ

         သံပတ်မကုန်သေးတဲ့ရထား

         ပြန်ချိုးကွေ့လာပြန်ပေါ့

         အသက်ကို အလံချိုးပြ ပြန်ရပေါ့

         သွေးဆုံးနေတဲ့မိန်းမ ကလေးလိုချင်နေသလိုမျိုး

         မဖြေထားတဲ့စာမေးပွဲကို အောင်စာရင်းကြည့်ချင်နေတဲ့

         အဖြစ်များ/အပျက်များ

         ငြီးတငွေ့ငွေ့။”

အခုခေတ်ပေါ်ကဗျာတွေကိုတကယ်လေ့လာပြီးရေးနိုင်မှ ခေတ်ပေါ်ကဗျာလောကတိုးတက် လာနိုင်မှာပါ။ တော်တော်ကြိုးစားရဦးမှာပါ။ ပွင့်ပွင့်လင်းလင်းပြောရရင် အခုအချိန်မှာ ရသစာပေတောင် ကျဆင်းနေတဲ့ အချိန်ပါ။ ခေတ်ပေါ်ကဗျာဟာ ရသစာပေထဲမှာ လူစိတ်မဝင် စားဆုံးဖြစ်နေပါတယ်။

ခေတ်ပေါ်ကဗျာလောကဟာအခုအချိန်မှာသာမန်ပြည်သူအများစုကြီးက စိတ်မဝင်စားကြ သေးပါဘူး။ (စိတ်မဝင်စားနိုင်တဲ့အခြေအနေတွေလည်းဖြစ်နေပါတယ်)။ ခေတ်ပေါ်ကဗျာ စာအုပ်ထုတ်တဲ့သူတွေ သိပါတယ်။ ပြည်သူတွေထဲမှာ စာပေကိုသာမန်လူတွေထက်ပိုပြီးစိတ်ဝင်စားသူအနည်းငယ်လောက်နဲ့ ခေတ်ပေါ်ကဗျာရေးချင်တဲ့လူငယ်တွေလောက်ပဲ ရှိနေပါတယ်။
 

ဒါပေမဲ့ ဒီအနုပညာလောကထဲမှာပျော်ရွှင်နေကြတဲ့လူငယ်တွေများလာတာအင်မတန်မှ ဝမ်းသာစရာပါပဲ။ ခေတ်ပေါ်ကဗျာတွေကလည်း ခေတ်ကိုရဲရဲတင်းတင်းရေးပြနိုင်တာ တွေ့ရ ပါပါတယ်။ နောက်တခုက အစိုးရတွေဘယ်အစိုးရတက်တက်သူတို့ကြောက်တဲ့အထဲမှာ ကလောင်စွမ်းကိုအကြောက်ဆုံးပါ။ ဒီအတွေးနဲ့ကျေနပ်နိုင်ပါပြီ။ ဒါကိုရေးပြလိုက်တဲ့ခေတ်ပေါ် ကဗျာတပုဒ်က ကဗျာဆရာ စိုင်းဝင်းမြင့်ရဲ့” ကျေးဇူးတော်လမ်း(မရှိမုန့်)”ပါပဲ။

          “တရိပ်ရိပ်တက်သွားလည်း သွား

         တဟုန်ထိုး ကျချင်လည်းကျ

         ဖေဖေတို့က ဖြည်းဖြည်းမှန်မှန်ပ။

         တရားတော်ထဲမှာတော့

         ဒီနေ့အတွက် လုံလောက်တဲ့အစားအစာ

         တယောက်ကိုတယောက်ထားနိုင်တဲ့မေတ္တာ

         ဉာဏ်ပညာရှိလို့သာ ပင်လယ်ရေအနက်ကိုလှမ်းထောက်မိခဲ့ကြတာ

         တဦးထက်ပိုတဲ့အချစ်တွေကတော့

         ပင်လယ်ကို ဆားအငံမလျော့

         ကိုယ့်ဒုက္ခနဲ့ကိုယ်ပေါ့

         ဒီလောက်ဆိုရင် ရနေ ရောက်နေပါပြီ ချစ်မိတ်ဆွေများပေါ့။

         နောင်ခါလာ နောင်ခါဈေး

         ဘဝကို ဘယ်ဈေးမှပေးလို့မရ

         လူ့အောက်မကျဖို့သာ တို့အရေး

         နှလုံးသားကိုသာ အစာမှန်မှန်ကျွေး

         တွေးချင်သေးရင် ပြတင်းတံခါးဖွင့်

         ပန်းပွင့်တွေ သွေးရောင်လွှမ်းလို့

         ခြံထဲကသစ်ပင် ရေမှန်မှန်လောင်း

         အိမ်ရှေ့ကမြောင်း မှန်မှန်ဖော်

         တကိုယ်ရည်ပျော်ရာပျော်ကြောင်းမှ

         အားလုံးပျော်ရွှင်ပါစေကြောင်း။”

ကဗျာဆရာစိုင်းဝင်းမြင့်ဆန္ဒပြုသလိုပါပဲ။ အခေတ်ခေတ်ကိုကျော်ဖြတ်လာရတဲ့ ခေတ်ပေါ် ကဗျာလမ်းဟာ ဖြောင့်ဖြောင်းတန်းတန်းလျှောက်လှမ်းနိုင်ပါစေ။ လူငယ်မျိုးဆက်တွေလည်း တိုးတက်ပါစေ။ ခေတ်ပေါ်ကဗျာအတုတွေ ကင်းဝေးပါစေ။

*ခေတ်ကိုထင်ဟပ်သော ခေတ်ပေါ်ကဗျာရေးဟန်များ(၂)ကို ဆက်ရေးပါမယ်ခင်ဗျာ”

ကိုနိုင်း

ခံစားသုံးသပ်မိသောခေတ်ပေါ်ကဗျာများ

၁။ ဝင်းမြင့်(သီချင်းတစ်ပုဒ်)။(၂၉.၇.၂၀၁၇)

၂။ ကြည်မွေ့အိမ်(ပုစဉ်းရင်ကွဲအော်သံကို ကျွန်မမုန်းတယ်)၊(၁၈.၆.၂၀၁၇)

၃။ ချောဘသစ်(ငြီးတစီစီတငွေ့ငွေ့ငြီးငွေ့)။(၂၆.၇.၂၀၁၇)

၎။ စိုင်းဝင်းမြင့်(ကျေးဇူးတော်လမ်း)။(၁၃.၇.၂၀၁၇)

သက်ဆိုင်ရာဖေ့ဘုတ်များ။