ဝါကျလေး တကြောင်းရေးမိတယ်
မောင်နောင်မွန်
 |
| Joan Miró, 'Painting' 1927 |
ကျနော်ရေးခဲ့တဲ့ကဗျာတွေက ရေခဲလို အေးတိအေးစက်နဲ့။ တခါတလေ အန္တာတိက ကဗျာဆရာလို့တောင် ဘဝင်တွေ လေဟပ်ဖူးတယ်။ တခါတလေ ဟဲမင်းဝေးလို တံငါသည် ဝတ္ထုလေးတွေရေးနေမိတယ်။
ကန္တာရပမာ ခြောက်ကပ်ကပ်စက္ကူပေသားထက်မှာ စာလုံးတွေ ဟိုမှဒီ ပြေးပြေးလွှားလွှား။ ကန္တာရထဲက သဲမုန်တိုင်းတခုပမာ စိတ်အစဉ်တွေက ဟင်းလင်းပြင်မျောလွင့်။ ကန္တာရသဲမုန်တိုင်းတခုနဲ့ ကျနော်ရဲ့ရင်ဘတ်ထဲကနေ ဖြောခနဲထွက်ကျလာနေတဲ့ စာလုံးတွေကို ရေးနေမိတယ်။
ဒါပေမဲ့ ဘာအဓိပ္ပာယ်သက်ရောက်မှုမှမရှိသောစကားလုံးတွေနဲ့ဝါကျတွေ တည်ဆောက်နေမိ လျက်သား။
စိတ်ထဲမှာ ၀ိုးတိုးဝါးတားဖြစ်နေတဲ့အကြောင်းအရာလေးတွေပေါ့။ ထိုဝါကျတွေထဲ အဓိပ္ပာယ်ကို တော့ ကိုယ်တိုင် ရှာနေဆဲ။ တကယ်တော့ ဘာမှမရှိတဲ့စာရွက်တခုနဲ့ လက်ရေးစာလုံးတွေပါပဲ။ ပုဒ်ထီးပုဒ်မချလိုက်ရင်ပဲ အရာအားလုံးပြီးဆုံးသွားသလို ခံစားရတယ်။ စာရွက်တွေက တဖြည်းဖြည်း ဝါကျင်လာတယ်။ မင်ရည်တွေက တဖြည်းဖြည်းပါးလျဖျော့တော့လာတယ်။
အင်္ဂါအခက်အလက်မစုံတဲ့ဝါကျတကြောင်းဟာ အဆုံးသတ်ဖို့ ခက်လှပါဘိတော့။
ဘဝကို ရေနဲ့လျှော်ဖွတ်သလိုမျိုး လျှော်ဖွတ်ဖို့ ကြိုးစားကြည့်မိတယ်။ အတွေ့အကြုံတွေ ကျင့်ဝတ်တွေ တန်ဖိုးတွေအကြောင်း စီကာပတ်ကုံး ရေးပြချင်နေမိဆဲ။ ရည်ရွယ်ချက်မဲ့နေတော့ အစကလည်း အဆုံးဖြစ်လို့ အဆုံးကပဲ အစဖြစ်လို့နဲ့ ကမောက်ကမ နိုင်နေဆဲ။
တရွက်လှန်လိုက်တိုင်း ဝါကျတွေက လှေနံဓားထစ်တွေ ပုံသေကားကျတွေ။
အဲဒီလှေတွေနဲ့ပဲ ပဲခူးရောက်အောင် ထိုးမယ်ဆိုတဲ့ တဇောက်ကန်းကဗျာတွေ ရေးခဲ့ဖူးတယ်။ အဲဒီတုန်းက ကျနော်ရေးခဲ့တဲ့ကဗျာတွေက ရေခဲလို အေးတိအေးစက်နဲ့။ တခါတလေ အန္တာတိက ကဗျာဆရာလို့တောင် ဘဝင်တွေ လေဟပ်ဖူးတယ်။ တခါတလေ ဟဲမင်းဝေးလို တံငါသည် ဝတ္ထုလေးတွေရေးနေမိတယ်။ တခါတလေ ဒေးကာနက်ဂျီလို တက်ကျမ်းတွေ ရေးမိတယ်။ ဆိုလိုတာက စာရွက်တွေပေါ်မှ ဝါကျတွေက အဓိပ္ပာယ်ရှိစွာ လှုပ်ရှားနေတာပါပဲ။
စာရွက်တွေက အဝါရောင်သန်းလာတယ်။ ဝါကျတွေက နာမဝိသေသနများစွာနဲ့ ကခုန်တတ် လာတယ်။ တချို့ဝါကျတွေက ဂုဏ်သရေတွေ တလက်လက်တက်လို့။ တချို့ဝါကျတွေက ဂျပ်ပစီလို လွင့်ချင်တိုင်း လွင့်လို။
တချို့ဝါကျတွေကိုတော့ အင်္ဂါအစုံတပ်ပေးရတယ်။ ဒါမှကန္တာရကို ဖြတ်သန်းကျော်လွှားနိုင်မှာကိုး။
ကန္တာရကိုဖြတ်လာတဲ့ဝါကျတစုကို အကျဉ်းထောင်ထဲထည့်ပိတ်၊ ပြီးတော့ဆိုလိုတဲ့အဓိပ္ပာယ်တွေ ရအောင် အစ်မေးကြတယ်။ တချို့ဝါကျတွေက အဖြေကိုတွေ ထွက်လာနိုင်ပေမယ့် တချို့ဝါကျတွေက တဆတ်ဆတ် ခုန်နေဆဲ နှလုံးသားတွေ ထွက်လာတယ်။
တချို့ဝါကျတွေက သေပေးရတယ်။ နှလုံးရှိတဲ့ဝါကျလက်တဆုပ်စာကို စကြဝဠာထဲ ဖြန့်ကြဲ လိုက်တယ်။
အဲဒီညက ကန္တာရကောင်းကင်ထဲမှာ နက္ခတ်ပွဲသဘင် ကျင်းပကြတယ်။ တချို့ဝါကျတွေက ကဗျာတွေ ရွတ်ကြ။ တချို့တွေက ဆမ်ဘာတေးသွားနဲ့ ကခုန်ကြ။ တချို့ဝါကျတွေက ကိုယ်ပိုင်အလင်းတွေနဲ့တလဲ့လဲ့ တလက်လက်။ တချို့ဝါကျတွေကျတော့ သူတပါးအလင်းကိုမှီခိုရှာပေါ့။ ဒါပေမဲ့ ဝါကျတော့ ဝါကျပါပဲ။ စကားလုံးတွေနဲ့တည်ဆောက်ထားဆဲ။
တခါတလေ စကားလုံးလေးတွေ ကိုယ့်အထုပ်ကိုယ်ထမ်းကာ အိမ်ပြန်တဲ့အခါတွေဆိုရင်တော့ ဝါကျတွေဟာ ရင်တွေကွဲလို့။
စာရွက်ဖြူဖြူပေါ်ဝါကျတကြောင်းကိုအသက်သွင်းဖို့ ကျနော်ကြိုးစားနေဆဲ။
အသက်ဝင်ခါနီး ဝါကျတကြောင်းက ကျနော့်ကို ပြန်လှမ်းမေးတယ်။
"သူတို့က ဘာတွေလဲတဲ့"
အဓိပ္ပာယ်ကို ကျနော် စဉ်းစားနေရတယ်။ ထိုမေးခွန်းက ကျနော်ရင်ဘတ်ထဲက အရွယ်မရောက်သေးတဲ့ စကားလုံးတွေဆီ တောမီးပမာ ပျံ့နှံ့သွားရပေါ့။ ဝါကျတချို့နဲ့စကားလုံးတချို့တွေဟာ ကုန်ပစ္စည်းဖလှယ်သလို သူတို့ရဲ့အဓိပ္ပာယ်ကို ဖလှယ်နေကြတယ်။
ဒါဟာ ယဉ်ကျေးမှုနယ်နိမိတ်တခုကို ဘောင်ကျော်သွားတဲ့ အနုပညာပြကွက်တခုလို ခမ်းနားနေခဲ့တယ်။
တခါတလေ ဝါကျအချင်းချင်းအယူအဆတွေ ကွဲပြားကာ အုပ်စုတွေ ပါတီတွေကွဲ ပဋိပက္ခတွေ ဖြစ်နေခဲ့။
ကျနော်အတွက် အထင်အရှားဆုံးဝါကျတကြောင်းအတွက် ပုဒ်ထီးပုဒ်ဖြတ်တွေ မလိုဘူး။ ကြိယာတွေ ဝိဘတ်တွေ မလိုဘူး။ ချစ်ခြင်းတွေမုန်းခြင်းတွေ မလိုဘူး။ တခုပဲလိုတယ်။
ထိုအရာက ကျနော့်နှလုံးအိမ်နဲ့သွေးကြောတွေကို ယှက်ဖောက်ဆက်သွယ်ထားတဲ့ စာရေးကိရိယာနဲ့ ဘောင်အကန့် မျဉ်းအသပ်တွေမပါတဲ့ ပကတိဖြူလွှလွှ စာရွက်တရွက်။
ကျနော်ချရေးမိတယ် ဝါကျတကြောင်းက. ..
" ဆိုလိုသည့်အဓိပ္ပာယ်ရောက်အောင် စနစ်တကျဖွဲ့စည်းထားသော ပုဒ်အစုအပေါင်းကို ဝါကျဟုခေါ်သည်" ဟုပေါ့။
မောင်နောင်မွန်
Comments
Post a Comment