သစ်ခက်သံလွင် ကဗျာသုံးသပ်ချက်၊ ကိုနိုင်း ၏ " ခေတ်ထဲမှ အွန်လိုင်းအချစ်ကာရန်များ"


ပြတင်းတံခါးအဖွင့် ဇာခန်းဆီးအလွင့်( ၂၂ )

ခေတ်ထဲမှ အွန်လိုင်းအချစ်ကာရန်များ
ကိုနိုင်း

ဒီနေ့ခေတ်ဟာ ပုံနှိပ်မီဒီယာနဲ့ အွန်လိုင်းမီဒီယာဆိုပြီး မီဒီယာ နှစ်မျိုးပေါ်ပေါက်လာတဲ့ ခေတ်ပါ။ တခြားနိုင်ငံတွေကိုထားလိုက်ပါတော့။ ကျနော်တို့နိုင်ငံကိုကြည့်ရင် ပုံနှိပ်မီဒီယာထက် အွန်လိုင်းမီဒီယာ က ပိုပြီးကျယ်ပြန့်နေပါတယ်။ ခေတ်ပေါ်ကဗျာတွေမှာလည်း ပုံနှိပ်မဂ္ဂဇင်း၊ ဂျာနယ်ပါကဗျာတွေနဲ့အွန်လိုင်း၊ ဖေ့ဘုတ်ပေါ်တင် တဲ့ ကဗျာတွေနှစ်မျိုးနှစ်စား ကွဲပြားနေပါတယ်။ တချို့ကဗျာရေးသူတွေကပုံနှိပ် မဂ္ဂဇင်း၊ ဂျာနယ်တွေမှာဖော်ပြခံရတဲ့ ကဗျာတွေကို ပိုအလေးထားကြသလို၊ တချို့ကဗျာရေး သူတွေက ဖေ့ဘုတ်ပေါ်မှာတင်ရေးတဲ့ ကဗျာတွေကို ပိုအလေး ထားတာ တွေ့ရပါတယ်။
          ဒီ ပုံနှိပ်ကဗျာတွေနဲ့ ဖေ့ဘုတ်ကဗျာတွေ ကွာတာက ပုံနှိပ်မဂ္ဂဇင်း၊ ဂျာနယ်တွေမှာ ကဗျာဖော်ပြနိုင် ဖို့ အရင်ဦးဆုံး မဂ္ဂဇင်း၊ ဂျာနယ်တွေရှိရာကိုပို့ရပါတယ်။ ပို့ပြီးတဲ့ကဗျာတွေက အယ်ဒီတာလက်ထဲရောက် ဖို့၊ အယ်ဒီတာကြိုက်ပြီးရွေးတာကို စောင့်ရပါတယ်။ နောက်ဆုံး မဂ္ဂဇင်း၊ ဂျာနယ်တွေကဖော်ပြမယ့်အချိန်ကို စောင့်မျှော်နေရပါတယ်။ ကဗျာရေးသူတွေအများ အပြားပေါ်လာတဲ့ခေတ်မှာ ပုံနှိပ်ကဗျာတပုဒ်ပါဖို့ အတွက်ကလည်း ခက်ခဲပါတယ်။ မဂ္ဂဇင်းတွေ၊ ဂျာနယ်အယ်ဒီတာတွေက နာမယ်ကြီးကဗျာဆရာတွေဆီက ကဗျာတွေ တောင်း ထည့်နေကြပါတယ်။ နောက်တခုက နီးစပ်ရာကဗျာတွေကို ထည့်ပေးနေကြပါ တယ်။ အခုအချိန်မှာ ဘာပြဿနာရှိလဲဆိုရင် ကဗျာတွေရေးနေကြတဲ့ ကဗျာမျိုးဆက်သစ်တွေအတွက် နေရာမရနိုင်တော့ဘူးဆိုတာပါပဲ။ နာမယ်ရှိပြီးသူတွေသာ နေရာရနေသလိုဖြစ် နေပါတယ်။


အရင်ကနာမယ်ကြီးမဂ္ဂဇင်းတွေဖြစ်တဲ့ ရှုမဝနဲ့မိုးဝေမဂ္ဂဇင်းတွေမှာ ကဗျာတပုဒ်ရွေးချယ်ခံရဖို့ အင်မတန်မှခက်ခဲ့သလို၊ အဲဒီမဂ္ဂဇင်း တွေမှာကဗျာဖော်ပြခံရရင် စာပေနယ်ကကဗျာဆရာ တယောက် အဖြစ် အသိအမှတ်ပြုခဲ့ကြပါတယ်။ စာပေနယ်ကလည်း အဲဒီ မဂ္ဂဇင်းတွေကို တန်ဖိုးထားခဲ့ရပါတယ်။ အဲဒီမဂ္ဂဇင်းတွေကလည်း ရောက်လာတဲ့ကဗျာတွေကို သေသေချာချာဖတ်ပြီး ကောင်းမှရွေး ချယ်ပါတယ်။ ကဗျာမျိုးဆက်သစ်တွေအဆက်မပြတ် ပေါ်ပေါက် လာပါတယ်။ အဲဒီမဂ္ဂဇင်းတွေမှာလည်း ကဗျာကိုနားလည်တတ် ကျွမ်းသူတွေက ရွေးချယ်ကြပါတယ်။

အခုမဂ္ဂဇင်းတွေ၊ ဂျာနယ်တွေမှာလုပ်ကိုင်နေကြတဲ့ အယ်ဒီတာ တွေကလည်း စာပေ၊ ကဗျာကို နားမလည်တဲ့သူများနေပါတယ်။ နာမယ်ကြီးကဗျာဆရာတယောက်ရေးပေးတဲ့ကဗျာဆိုရင် ခေါင်း စဉ်အောက်မှာ နှစ်ကြောင်းလောက်ရေးပေးလိုက်ရင်လည်း ခေတ်ပေါ်ကဗျာဆိုပြီး မဂ္ဂဇင်း၊ ဂျာနယ်ထဲမှာ ဖော်ပြနေကြပါ တယ်။

နာမယ်ကြီးကဗျာဆရာရဲ့ကဗျာပါရင် ပြီးရောဆိုသလို တာဝန်မဲ့လုပ်လိုက်ပါတော့တယ်။ အဲဒီလိုဖြစ်နေတော့စာပေ၊ ကဗျာမျိုးဆက်တွေအတွက် နေရာမရဖြစ်သွားရပါတယ်။ မျိုးဆက်သစ်ကဗျာရေးသူတွေအနေနဲ့ကလည်း အွန်လိုင်းမီဒီယာတွေ၊ ဖေ့ဘုတ်တွေပေါ်မှာပဲ ရေးနေကြရပါတော့တယ်။

အခုကျွန်တော်ခံစားသုံးသပ်ချင်တဲ့ကဗျာတွေဟာ အွန်လိုင်း၊ ဖေ့ဘုတ်ပေါ်ကခေတ်ပေါ် အချစ်ကဗျာတွေ ကို စပြီးခံစားကြည့်ချင်ပါတယ်။ နောက်ပိုင်းမှ ခေတ်ပေါ်ကဗျာတွေထဲက ကျနော်ခံစားမိတဲ့ ကဗျာတွေကို ဆက်ပါ့မယ်။ ခေတ်ပေါ်ကဗျာတွေထဲမှာလည်း မဂ္ဂဇင်း၊ဂျာနယ်တွေမှာပါနေတဲ့ ကဗျာဆရာတွေရော၊ မဂ္ဂဇင်း၊ ဂျာနယ်တွေမှာမပါသေးတဲ့ ကဗျာရေး သူတွေ ဖေ့ဘုတ်ပေါ်မှာရေးနေကြတဲ့အထဲက ခေတ်ပေါ် ကဗျာတွေဖြစ်ပါတယ်။

အရင်ဆုံးခံစားမိတဲ့ခေတ်ပေါ်အချစ်ကဗျာကတော့ အခုတလောဖေ့ဘုတ်ပေါ်မှာခေတ်ပေါ် အချစ်ကာရန် တွေ တပွင့်ပြီးပွင့်ပြနေတဲ့ ကဗျာဆရာ သျှီသူအောင် ရဲ့ ဖုံးဖိထားတဲ့ အလွမ်း ကဗျာလေးတပုဒ်နဲ့ ခံစားမှု ပြတင်းတံခါးကို စဖွင့်လိုက်ပါတယ်။
        
အမှောင်တွေ ထပွက်သလိုလို
ထင်ရတာပဲ
ရင်ထဲမြုပ်ထားတဲ့ အိပ်မက်ကိုတူးဖော်မိ
         စိတ်ကူးနဲ့ထိရင်တောင်
         ပိုးပိုးပေါက်ပေါက်ကျမယ့် မျက်ရည်
         ဖွဖွလေးသုတ်ရင်း
         အလင်းနဲ့ထွေးပွေ့မိတဲ့ ညတွေ။

ဒီကဗျာလေးကိုဖတ်မိတော့ ကဗျာဆရာကိုယ်တိုင်လွမ်းနေတာကို လှမ်းမြင်လိုက်ရပါတယ်။ ခေတ်ပေါ်ကဗျာမှာသုံးသွားတဲ့စကားလုံးတွေကိုလည်း ဖွဖွလေးသုတ်ကြည့်လိုက်မိပါတယ်။ အလွမ်းတွေ ကိုဖုံးဖိထားလို့မရနိုင်ပဲ အတွေးတွေပါထွက်ကျလာခဲ့ပါတယ်။ အမှောင်လိုမျိုး လောကအတွက် မကောင်းမှုတွေကိုကြေကွဲနေရတာတွေကို တွေ့ရပါတယ်။ ဒီကြေကွဲမှုတွေကို ကောင်းမှုဆိုတဲ့ အလင်းရောင်နဲ့ထွေးပွေ့ထားချင်စိတ်ကိုလည်း တွေ့ရပါတယ်။
          ခေတ်ပေါ်အချစ်ကဗျာတွေထဲမှာလည်း လောကအတွေးတွေပါပါတယ်။ ကဗျာဆိုတာမျိုးက လည်း ရေးသူကဖွင့်ဆိုပြဖို့ခက်ပေမယ့်၊ ကဗျာကိုဖတ်သူအနေနဲ့ တွေးမိသလို ခံစားနိုင် ခွင့်ပါတယ်။ ခေတ်ပေါ်ကဗျာမှာ လွတ်လပ်တဲ့ကာရန်နဲ့ရေးဖွဲ့သလိုကဗျာတပုဒ်ကပေးတဲ့အတွေးက လွတ်လပ်ပါ တယ်။ လေဟာနယ်တခုထဲမှာ စီးမျောသလို အစအဆုံးမရှိ ကျယ်ပြန့်ပါတယ်။ ဒီနေရာမှာ ခေတ်ပေါ် ကဗျာရဲ့အလှဆိုတာကို တွေ့ရှိနိုင်ပါတယ်။
          တကယ်တော့ ခေတ်ပေါ်ကဗျာတွေဟာ အတွေးတွေ ပါနေပါတယ်။ ဒီအတွေးတွေကလည်း အဖြေမရှိတဲ့ ပုစ္ဆာတပုဒ်တော့ မဟုတ်ပါဘူး။ ဒါကို ခေတ်ပေါ်အချစ် ကဗျာတပုဒ်အဖြစ် ကဗျာဆရာမ အက်ဆစ်ချို က ခဏလေးများကဗျာနဲ့ ကာရန်တွေ သီလိုက်ပါတယ်။

          တိကျသေချာတဲ့ အစပြုခြင်းက
         ဧပြီနွေရဲ့ ပထမပါတ်မှာဆုံတယ်
         သူ့ခြေသံတွေ နားစိုက်ထောင်ရင်း
         ကိုယ့်ဘဝဟာ ခဏလေးသာယာဖူး။
        
         အတူကြိုက်တဲ့ ရော့ခ် သီချင်းတွေ
         သန်းခေါင်ယံကျော်ထိ ဆိုညည်းရင်း
         စိတ်ကူးကော်ဖီထဲ နှလုံးသားပဲ့ပါသွားတယ်
         ခဏလေးဟာ တညတာပြီးပြည့်စုံလို့
         တစ်ဘဝစာလုံလောက်သွားခဲ့တယ်။

         ခိုင်လုံတဲ့အကြောင်းပြချက်မရှိပဲ
         သူစိတ်ပျက်အောင်ကိုယ်မှားခဲ့တာလား
         အဖြေမရှိတဲ့ ပုစ္ဆာတစ်ပုဒ်တွက်ချက်ရင်း
         ကိုယ့်ညတွေဟာ ခုထိသတ်ပုံမှားနေဆဲ။

         သူ့ဥပေက္ခာတရားလက်ဆောင်ရခဲ့လို့
         ညဘက်တွေဟာ မျှော်လင့်ချက်တွေကင်းမဲ့
         ဆိုးဝါးတဲ့တဖက်သတ်ဆန်မှုတွေနဲ့ပွေ့ဖက်
         ငြိမ်သက်ရင်း ခဏလေးအချိန်တွေ လွမ်းတယ်။
        
လောကမှာလည်း တခါတရံမထင်မှတ်ပဲခဏတာအချိန်လေးကို တဘဝစာလို့ထင်ခဲ့ကြပါတယ်။ သူကပဲဖြစ်ဖြစ်၊ ကိုယ်ကပဲဖြစ်ဖြစ် အမှားတခုကိုမရည်ရွယ်ပဲ မှားသွားနိုင်ပါတယ်။ တခါတရံမှာတော့ မထင်မှတ်တဲ့အမှားကနေ မထင်မှတ်နိုင်လောက် အောင် အထင်လွဲသွားတတ်ပါတယ်။ ကိုယ့်အမှားကို ကိုယ်သိနေတာက ဘာမှမဖြစ်လောက် ဘူးထင်ပေမယ့်၊ သူ့ဘက်က၊ သူ့စိတ်ထဲကိုစွဲမြဲသွားတတ်ပါ တယ်။ ဒီအမှားကို ကိုယ့်ဖက်က အကြောင်းပြလို့မရပေမယ့်၊ သူ့ဖက်ကစိတ်ထိခိုက်သွားလောက်အောင် ဖြစ်တတ်ပါတယ်။ တယောက်နဲ့တယောက်နားလည်မှုတွေ လွဲချော်နေတာပါ။ ဒီနားလည်မှုလွဲချော်နေ တာကို မဖြေရှင်းပြပဲနေလိုက်မယ်ဆိုရင် အဖြေမရှိတဲ့ပုစ္ဆာတပုဒ်ကိုတွက်ချက်နေရင်း တသက်တာ လွမ်းစိတ်နဲ့ ကုန်ဆုံးသွားရပါလိမ့်မယ်။
          ဒီခေတ်ပေါ်ကဗျာထဲမှာလည်း လောကအတွက်အတွေးတွေ ပါနေပါတယ်။ အချစ်ပဲဖြစ်ဖြစ် အရှိ တရားနဲ့ယဉ်တွေးနိုင်မယ်ဆိုရင် တွေးစရာတွေပါပါလိမ့်မယ်။ ဒီလိုအဖြစ် အပျက်တွေဟာ လောကထဲမှာ ရှိနေပါတယ်။ ဒီလိုလမ်းခွဲခဲ့လို့ ခံစားနေရတဲ့ခံစားချက်တွေ ကိုလည်း ကဗျာဆရာမ လင်းမယ်သော့က ကြွေကျသွားတဲ့တိမ်တအုပ်မှာ ကဗျာနဲ့ရေးဖွဲ့လိုက်ပါတယ်။

          မဖြစ်နိုင်တော့ဘူးလို့ ပြောပြောပြီး
         တိတ်တခိုးရှိုက်လိုက်ရတဲ့ ရှိုက်သံလေးအဆုံး
         တိမ်တွေကမျက်ရည်မိုးအဖြစ်ပြောင်းလဲတတ်တော့
         မင်းကြောင့်ပါလို့မပြောရက်ခဲ့ဘူး။

         ပန်းပွင့်လေးတွေသိတယ်
         ကောင်းကင်ပြာကိုတိုင်တည်ထားတယ်
         ဘဝမှာနှစ်ခါပြန်မရနိုင်တဲ့ချစ်ခြင်းတခုကို
         နာကျင်ပေမယ့် လွှတ်မချနိုင်ခဲ့ဘူး။

         မင်းစိတ်နဲ့စတင်ခဲ့ရတဲ့မနက်ခင်းတိုင်း
         မင်းစိတ်နဲ့မိုးစုန်းစုန်းချုပ်ပစ်လိုက်ဖို့
         ရည်ရွယ်ချက်တွေကတရားမဝင်တော့တဲ့
         စာချုပ်တခုကို။

         ဘာကြောင့်လဲ
         သိပ်ချစ်ပါတယ်လို့ ပြောပြောပြီး
         ခွဲခွာသွားတတ်တာ
         လောကဓံတရားပဲဆိုဆို
         ကိုယ်ကတော့ မကျေနပ်နိုင်ဘူး။

အချစ်တွေကလည်း အမြဲမတည်မြဲတတ်တာလောကရဲ့သဘာဝတရားတခုလို့ပြောရမှာပါပဲ။ အချစ်မှာသတိရခြင်းတွေ၊ လွမ်းဆွတ်ခြင်းတွေက အမြဲကပ်ပါတတ်နေပါတယ်။ 

ဘဝမှာအချစ်စိတ်တွေကအကြိမ်ကြိမ်ပေါ်လာတတ်ပါတယ်။ တဘဝမှာတခါပဲချစ်ပြီး မပေါင်းဆုံရတဲ့အခါ တဘဝလုံးတသက်သက်လွမ်းနေရတဲ့အချမျိုးကတော့ အလွန်အင်မတန်မှ ရှားပါးပါလိမ့်မယ်။ ဒါကိုကဗျာဆရာမ လင်းမယ်သော့ ကဘဝမှာနှ စ်ခါပြန်မရနိုင်တဲ့ ချစ်ခြင်းတခုလို့ လှပစွာ တင်စားဖွဲ့ပြ ထားပါတယ်။

ဘဝမှာအချစ်စိတ်တွေခဏခဏ ပေါ်လာ တတ်ပေမယ့်၊ လူတယောက်အတွက် တဘဝမှာအချစ်တခုကို တော့ တန်ဖိုးထားလေးနက်တတ်ပါတယ်။ ဒီလိုတန်ဖိုးထားခဲ့တဲ့အချစ်ကို တရားဝင်စာချုပ်တွေကလည်း တရားမဝင်ဖြစ် သွားပါတယ်။ ဒါဆိုရင် တရားဝင်လက်မှတ်ထိုးထားတဲ့ စာချုပ်တွေကရော၊ လူတယောက် ကို ချုပ်ကိုင်ထားနိုင်ပါ့မလား။ တရားဝင်စာချုပ်အရ လူသားတယောက်ကိုတယောက်က ပိုင်ဆိုင်တယ် ထင်ခဲ့ရပေမယ့် တကယ့်ဘဝကိုမပိုင်ပါဘူး။ ငြင်းဆန်လို့မရနိုင်တာက ရုပ်ဝတ္ထုတခုပါ၊ လူမှာအဓိကကျတဲ့ စိတ်ကို တရားဝင်စာချုပ်နဲ့ချုပ်ချယ်ထားလို့မရပါဘူး။

တယောက်နဲ့တယောက်ချစ်ကြတယ်၊ ပိုင်ဆိုင်ကြတယ်ဆိုတာကိုပြန်တွေးကြည့်လိုက်ရင် ရုပ်တခုထဲကို 
ပိုင်ဆိုင်တာလို့ပြောနိုင်ပါတယ်။ အချစ်ဆိုတဲ့နေရာမှာအဓိကကျတာက စိတ်ပါပဲ။ ကိုယ်ချစ်ရတဲ့ချစ်သူက ခွဲခွာသွားတဲ့အခါ အဲဒီခွဲခွာသွားသူအတွက် ဆုံးရှုံးလိုက်ရပြီဆိုတဲ့ စိတ်က ဖြေမဆည်နိုင်အောင်ပါပဲ။ ဒီကဗျာမှာ “မင်းစိတ်နဲ့ပဲ မိုးစုန်းစုန်းချုပ်ပစ်လိုက်ဖို့” ဆိုတဲ့ စကားလုံးက အရမ်းလှပါတယ်။ တကယ်တော့ အချစ်တခုမှာ စိတ်ပြောင်းလဲသွားရင် အရာရာ ပြီးဆုံးသွားပါတော့တယ်။ ဒါကို ဆောင်းခါးခါး(လမ်းသစ်) က ကျွန်မရဲ့ည ကဗျာထဲမှာ ရေးဖွဲ့ ထားပါတယ်။
          
         အဲဒီ့ညဟာ
         ဂယောင်ခြောက်ခြား အေးစက်စက်နဲ့
         မမြင်ရတဲ့ကြယ်တွေကိုခူးယူ၊ စိတ်ကူးနဲ့
         ညကိုအမှောင်ချလိုက်တယ်
         အာရုံထဲကိုလေပြင်းတချက်မွှေ့သွားသလို
         ရမ္မက်တွေ ကျွန်မ မာနတရားအပေါ်
         အနမ်းမြစ်က ခပ်ပြင်းပြင်းစီးဆင်းသွားတယ်
         အစဉ်လိုက်မကျတဲ့ နာမ်  ခန္ဓာရုပ်ကိုပြိုလဲသွားစေခဲ့တယ်
         ဒါမဟုတ်ဘူး၊ ဒီလိုမဖြစ်ရဘူး၊ အသိမဲ့ခြင်းခလုပ်ကိုတချက်နှိပ်လိုက်
         ကျွန်မရဲ့ည လင်းပြက်သွားတယ်
         ဒါ ပြီးဆုံးသွားပြီ
         နွမ်းလျအိမ်အပြန်မှာ မိုးလင်းလုလု။

စိတ်ကူးယဉ်အချစ်တွေဟာ တကယ့်လောကမှာ မတည်မြဲနိုင်ဘူးဆိုပေမယ့် အချစ်မှာ ရုပ်ရောနာမ်ရော ပါဝင်သက်ဆိုင်နေမှ အချစ်ကပြည့်စုံပါတယ်။ အရေးကြီးတာက အချစ်စိတ်ပါပဲ။ ချစ်သူနှစ်ယောက်ကြားမှာအချစ်စိတ်တည်မြဲနေရင် ခွဲခွာခြင်းဆိုတာ မရှိနိုင်ပါဘူး။ ရုပ်ချင်းကွဲကွာနေကောင်းနေရပေမယ့် တကယ်တော့ ခွဲခွာနေရတယ်လို့ပြောလို့ မဖြစ်နိုင်ပါဘူး။ စိတ်ချင်းက အမြဲဆက်သွယ်နေပါလိမ့်မယ်။ဒါကိုခေတ်ပေါ်အချစ်ကဗျာတွေမှာ တွေ့နိုင်ပါတယ်။ ဒီလိုပါပဲ။ လောကမှာအရာရာတိုင်းအတွက် အရေးကြီးတာကစိတ်ပါပဲ။ ရုပ်ကြောင့်စိတ်ပြောင်းလဲတာတွေလည်း အများကြီးပါပဲ။ လှလို့ချစ်တယ်။ ပိုပြီးလှသူကိုတွေ့သွားတဲ့အခါ အရင်လှတယ်လို့ထင်ထားသူထက် ပိုချစ် သွားတယ်ဆိုတာတွေ က ရုပ်ကြောင့်စိတ်ပြောင်းလဲခြင်းတွေပါ။ ဒါတွေကမခိုင်မာမတည်မြဲနိုင်ပါဘူး။ ချစ်လို့လှတယ်၊ အချစ်စိတ်နဲ့ကြည့်ရင် ဘယ်အချိန်ကြည့်ကြည့်လှနေမှာပါပဲ။ ငယ်ရွယ်တဲ့အချိန်မှာလည်း လှနေသလို အိုသွားတဲ့အချိန်မှာလည်း လှနေပါတယ်။ ဒါဟာ စိတ်ကြောင့်ရုပ်ပြောင်းလဲခြင်းကိုပြတာပါ။
        
ပြောရမယ်ဆိုရင် ခေတ်ပေါ်အချစ်ကဗျာတွေထဲမှာလည်း အချစ်တွေ၊ ဘဝတွေ၊ အတွေးတွေ ပါဝင် နေပါတယ်။ အချစ်ကို လောကကြီးနဲ့တင်စားသင့်ပါတယ်။ ဒီလိုတင်စား ရေးဖွဲ့လိုက်မှုကို ထင်ငြိမ်း (မအူပင်) ရဲ့ ခေါင်းစဉ်မပေးထားတဲ့ကဗျာစကားလုံးတွေမှာ တွေ့လိုက်ရပါတယ်။

         ဝန်းကျင်တခုလုံး ထုံထိုင်းအေးစက်
         လိပ်ပြာတောင်ပံတဖျတ်ဖျတ်ခတ်သလို
         သူမမျက်တောင်ကလေးပုတ်ခတ်လိုက်တာကိုက
         ကမ္ဘာဦးမှာ
         ဘယ်သူမှဖတ်ခွင့်မရခဲ့တဲ့ကဗျာ။

ဒီလောက်ဆို ခေတ်ပေါ်အချစ်ကဗျာတွေကိုလည်း တန်ဖိုးထားနိုင်လာမှာပါ။ ခေတ်ပေါ်အချစ် ကဗျာတွေ မှာလည်း လှပတဲ့အရေးအဖွဲ့တွေပါနေသလိုလေးနက်တဲ့ အတွေးတွေလည်း ပါနေတဲ့အကြောင်းကိုပြော ရင်း ဒီအပတ်ဒီမျှပါပဲ။

ကိုနိုင်း
ခံစားသုံးသပ်မိတဲ့ကဗျာများ။

သျှီသူအောင်(ဖုံးဖိထားတဲ့အလွမ်း)။ အက်စစ်ချိုခဏလေးများ)။ လင်းမယ်သော့(ကြွေကျသွားတဲ့တိမ်တအုပ်မှာ)။ ဆောင်းခါးခါး-လမ်းသစ်(ကျွန်မရဲ့ည)
ထင်ငြိမ်း(မအူပင်) တို့ရဲ့သက်ဆိုင်ရာဖေ့ဘုတ်များ။

The Sun RaysVol 1.No 158. 29 July 2017











 
 

Comments